༢༠༡༠ ཕྱི་ཟླ་ ༡ ཚེས་ ༢༢ རེས་གཟའ་པ་སངས།
༄༅། །བོད་མི་མང་ས་སྐྱའི་སྤྱི་འཐུས་དགེ་བཤེས་ག་ཟི་ཚེ་རིང་པོ་ལགས་ཀྱིས་འདི་གར་བཏང་གནས་ནང་འཁོད་དོན། བསྐལ་བཟང་རྣམ་འདྲེན་བཞི་པ་སྐུ་འཁྲུངས་པའི་གནས་མཆོག་ལུམ་བི་ནི་རུ་དཔལ་ས་སྐྱའི་འཛམ
་གླིང་ཞི་བདེའི་སྨོན་ལམ་ཆེན་མོ་སྐབས་བཅོ་བརྒྱད་པ་དང་བསྟུན། དཔལ་ས་སྐྱའི་སྐྱབས་མགོན་གོང་མ་བདག་ཆེན་ཁྲི་འཛིན་རིན་པོ་ཆེ་མཆོག་ལུག་གཉིས་ཀྱི་ཁྲི་ལ་ཕེབས་ཏེ་ལོ་ལྔ་བཅུ་འཁོར་བའི་དུས་ཆེན་སྲུང་བརྩི་གཟབ་རྒྱས་ཤིག་དཔལ་ས་སྐྱའི་ལྷ་སྡེ་མི་སྡེ་ཡོངས་ནས་ཞུས་ཡོད་པ་རེད། དེ་ཡང་ཕྱི་ལོ་ ༡༩༥༡ ལོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཡེ་ཤེས་དབྱིངས་གཟིགས་ཀྱིས་དཔལ་ལྡན་ས་སྐྱ་པའི་ཆོས་སྲིད་ལུག་གཉིས་ཀྱི་ཁྲི་འཛིན་དབང་བཀུར་བཀའ་ཡིག་གསེར་དམ་འབྱར་མ་བཀའ་དྲིན་སྩལ་སོན་ལྟར། ཕྱི་ལོ་ ༡༩༥༢ ལོར་གདན་ས་ཆེན་པོ་དཔལ་ལྡན་ས་སྐྱར་བཀའ་ཡིག་རིན་པོ་ཆེ་སྒྲོགས་སྱང་དང་འབྲེལ་ཁྲི་པར་ཐུགས་གཏན་འཁེལ་བའི་གསལ་བསྒྲགས་དང་སྦྲགས་སྔོན་འགྲོའི་ཁྲི་འདོན་མཛད་སྒོ་སྟབས་བདེ་ཞིག་གནང་། ཕྱི་ལོ་ ༡༩༥༩ ལོར་དཔལ་ལྡན་ས་སྐྱ་པའི་ཁྱབ་ཁོངས་ལྷ་མི་ཡོངས་ནས་དངོས་གཞི་ཁྲི་སྟོན་རྒྱས་པ་ཞུས་ཏེ་ཆོས་སྲིད་ལུག་གཉིས་ཀྱི་བདག་པོར་མངའ་གསོལ་གཟབ་རྒྱས་ཞུས།
དེ་ནས་བཟུང་དཔལ་ས་སྐྱའི་ཁྲི་འཛིན་དུ་ཕེབས་ནས་ལོ་ལྔ་བཅུ་འཁོར་བ་ལྟར། གནས་མཆོག་ལུམ་བི་ནི་ཚར་དགོན་བཀྲ་ཤིས་རབ་བརྟན་གླིང་དུ་དཔལ་ས་སྐྱའི་འཁོན་གདུང་སྐྱབས་མགོན་རཏཌྷ་བ་རིན་པོ་ཆེ་མཆོག་གིས་དབུས་བླ་ཆེན་རྣམས་དང་། མཁན་སྤྲུལ་དགེ་སློང་བསྙེན་སོང་དང་བགྲེས་གྲས་བསྡོམས་ལྔ་བརྒྱ་བརྒལ་བས་ཉིན་གསུམ་གྱི་རིང་སྒྲོལ་དཀར་འཆི་མེད་ཡིད་བཞིན་འཁོར་ལོའི་སྒོ་ནས་ཚེ་སྒྲུབ་འབྱོར་དངོས་རྗེས་གཙང་གནད་སྨིན་མཛད་དེ། ཕྱི་ལོ་ ༢༠༠༩ ཟླ་ ༡༡ ཚེས་ ༢༥ ཉིན་སྔ་དྲོ་ཆུ་ཚོད་ ༨ པའི་ཐོག་ལམ་གྱི་གཡས་གཡོན་དུ་བོད་ཕྱི་ནང་དང་འཛམ་གླིང་ས་གནས་གང་ས་ནས་ཕེབས་པའི་སྱིན་བདག་སློབ་མ་ཆོས་སྡེ་མི་མང་བཅས ༧༠༠༠ བརྒལ་བ། རང་གཞུང་མཛད་གཙོ་རྣམ་པས་དབུས་གནད་ཡོད་སྐུ་མགྲོན་ ༥༠༠ བརྒལ་བ་དང་། དཔལ་ས་སྐྱའི་འཁོན་གདུང་རྣམ་པས་དབུས་བླ་ཆེན་དང་མཁན་སྤྲུལ་གྲྭ་བཙུན་ ༥༠༠༠ ལྷག་ཙམ་གྱི་གདུགས་རྒྱལ་མཚན་གྱི་གཙོས་མཆོད་རྫས་སྣ་ཚོགས་དང་རྟ་དང་གླང་པོ་ཆེའི་མདུན་བསུས་ཏེ། སྐྱ་སེར་ཡོངས་ནས་བཀྲ་ཤིས་དབྱངས་ཀྱི་བརྒྱན་ནས་ཕེབས་བསུ་གཟབ་རྒྱས་ཞུས་ཏེ་གཙུག་ལག་ཁང་གི་ཚོགས་ཆེན་གྱི་ཁྲི་འཕང་མཐོན་པོར་ཞབས་སོར་འཁོད་འཕྲལ། འཁོན་གདུང་སྐྱབས་མགོན་རཏཌྷ་བ་རིན་པོ་ཆེ་མཆོག་ནས་མལ་རྟེན་གསུམ་འདེགས་འབུལ་ཞུས།དེ་རྗེས་རིམ་པ་བཞིན་ཆོ་གའི་ཚིག་མཚམས་དང་འབྲེལ། དཔལ་ས་སྐྱའི་སྤྱི་འཐུས་ག་ཟི་དགེ་བཤེས་ཚེ་རིང་པོ་དང་ཚོགས་ཟུར་པད་མ་འབྱུང་གནས་ལགས་རྣམ་གཉིས་ནས། དངོས་གཞི་གསེར་གྱི་མལ་མཐོན་པོར་འདེགས་བཞིན་རྡོ་རྗེ་སློབ་དཔོན་སྒྲོལ་མ་ཕོ་བྲང་འཁོན་གདུང་སྐྱབས་མགོན་རཏཌྷ་བ་རིན་པོ་མཆོག་ནས་མལ་ལྗགས་བཤད་གནང་། ངོར་མཁན་པོ་ཁྲི་པ་སྐྱབས་རྗེ་ཐར་རྩེ་མཁན་རིན་པོ་ཆེ་མཆོག་ནས་སྐུ་གསུང་ཐུགས་ཡོན་ཏན་འཕྲིན་ལས། སྒྲོལ་ཕའི་འཁོན་གདུང་ྙ་ན་བ་རིན་པོ་ཆེ་མཆོག་ནས་འབུལ་སྒོའི་མལ། ཕུན་ཕོའི་འཁོན་གདུང་ཨ་བྷི་ཀིརྟ་བ་རིན་པོ་ཆེ་མཆོག་ནས་ཞལ་བཞེས་གསོལ་འདེབས། ཕུན་ཕོའི་གདུང་སྲས་ཨ་སྒ་བ་རིན་པོ་ཆེ་མཆོག་ནས་ཞལ་བཞེས་གཏང་རག་མལ། ག་ཞབས་དྲུང་རིན་པོ་ཆེ་མཆོག་ནས་རྒྱལ་སྲིད་སྣ་བདུན། རྫོང་པ་སྐྱབས་རྗེ་སྤྲུལ་སྐུ་རྡོ་རྗེ་གདན་པ་རིན་པོ་ཆེ་མཆོག་ནས་བཀྲ་ཤིས་རྫས་བརྒྱད་བཅས་འདེགས་འབུལ་ཞུས། དེ་མཚམས་དཔལ་ས་སྐྱའི་ཕོ་བྲང་རྣམ་གཉིས། གདན་ས་ཁག་གི་བླ་ཆེན་དང་རང་གཞུང་བཀའ་སྤྱི་གཉིས་ཀྱི་གཙོས་རིས་མེད་བླ་ཆེན་རྣམ་པའི་སྐུ་ཚབ་དགོན་སྡེ་ཆོས་སྒར་ཚོགས་སྐྱིད་ཕྱི་རྒྱལ་ཆོས་ཚོགས་བཅས་ཁྱོན་བསྡོམས་བརྒྱ་དང་ལྔ་བཅུ་བརྒལ་བ་ཁུངས་སོ་སོ་ནས་མལ་སྐུ་གསུང་ཐུགས་རྟེན་འདེགས་འབུལ་དང་འབྲེལ་འབུལ་བའི་རྣམ་གཞག་བསྟར་འབུལ་གྲུབ་མཚམས་སྔ་དྲོའི་མཛད་རིམ་ལེགས་པར་གྲུབ། ཕྱི་དྲོ་ཆུ་ཚོད་ ༢ སྐར་མ་ ༤༥ ཐོག་གནས་ཆེན་ལུམ་བིའི་ནི་དབུ་གུར་ཆེན་མོའི་ནང་དཔལ་ས་སྐྱ་གདན་ས་ཁག་གི་བླ་ཆེན་རྣམ་པ་དང་། བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག། བོད་མི་མང་སྤྱི་འཐུས་ཚོགས་གཙོ་མཆོག་དང་གནད་ཡོད་མི་སྣ་བཅས་ནས་སྤོས་རྒྱ་དང་བཀྲིས་ཞོལ་པས་ཕེབས་བསུ་ཞུས། ཞབས་སོར་འཁོར་བསྟུན་སྣང་གསལ་ཞལ་ཕྱེ་དང་མང་བཀུར་གློ་བོ་ཆོས་རྒྱལ་མཆོག་ནས་གསེར་གྱི་འཁོར་ལོ་འདེགས་འབུལ་ཞུས། སྐད་རིག་སྣ་ཚོགས་ཀྱི་བསྟོད་དབྱངས་གྲུབ་སྐབས། དྲུང་ཆེ་འཇམ་དབྱངས་ལེགས་བཤད་ལགས་ཀྱིས་༸གོང་ས་མཆོག་གི་གསུང་འཕྲིན་རིན་པོ་ཆེ་སྙན་སྒྲོན་དང་མཛད་སྒོའི་ངོ་སྤྲོད་གསུང་བཤད་གནང་།
དེ་རྗེས་རིམ་བཞིན་རྫོང་གསར་མཁན་ཁྲི་འཇམ་དབྱངས་བློ་གསལ་རིན་པོ་ཆེ། དཔལ་ས་སྐྱ་མཐོ་སློ་མཁན་ཆེན་ངག་དབང་བསོད་ནམས་རྒྱ་མཚོ་རིན་པོ་ཆེ། བལ་ཡུལ་ནང་པའི་ཆོས་ཚོགས་ཀྱི་ཚོགས་གཞོན། ཚར་པ་བཅོད་བརྒྱད་ཞབས་དྲུང་རིན་པོ་ཆེ། རྫོང་པ་གོང་དཀར་སྤྲུལ་སྐུ་རྡོ་རྗེ་གདན་པ་རིན་པོ་ཆེ། ངོར་མཁན་པོ་ཁྲི་པ་ཐར་རྩེ་མཁན་རིན་པོ་ཆེ་མཆོག གློ་བོ་ཆོས་རྒྱལ་བཅས་ནས་གསུང་བཤད་གནང་། དེ་ནས་རང་གཞུང་བཀའ་བློན་ཁྲི་ཚབ་མཆོག་གིས་བཀའ་ཤག་གི་གསུང་འཕྲིན་དང་གསུང་བཤད་གནང་། བོད་མི་མང་སྤྱི་འཐུས་ཚོགས་གཙོ་མཆོག་གིས་སྤྱི་འཐུས་ཀྱི་གསུང་འཕྲིན་སྒྲོགས་སྱང་གནང་། དེ་མཚམས་ཕུན་ཚོགས་ཕོ་བྲང་སྐྱབས་མགོན་གོང་མ་བདག་ཆེན་རིན་པོ་ཆེ་མཆོག་གིས་དཔལ་ས་སྐྱའི་གདུང་རབས་ངོ་མཚར་བང་མཛོད། དེའི་ཁ་སྐོང་དང་ཡང་སྐོང་བཅས་གསར་བསྐྲུན་དེབ་གསུམ་ཞལ་ཕྱེ་དང་འབྲེལ་བཀའ་སློབ་བཀའ་དྲིན་སྩལ། དེ་ནས་དཔལ་ས་སྐྱའི་སྐྱབས་མགོན་གོང་མ་ཁྲི་ཆེན་ ༤༡ པ་ངག་དབང་ཀུན་དགའ་ཐེག་ཆེན་དཔའ་འབར་འཕྲིན་ལས་བསམ་འཕེལ་དབང་གི་རྒྱལ་པོ་མཆོག་གིས་དཔལ་ས་སྐྱའི་གདན་རབས་ངོ་མཚར་བང་མཛོད་དང་། གཙང་གཡས་རུ་གདན་ས་འོག་མ་རྩེ་གདོང་གི་ངོ་སྤྲོད། དཔལ་ས་སྐྱའི་ཁྲི་རབས་གཅེས་བཏུས་འཕྲིན་ལས་ཀུན་ཁྱབ་བཅས་དེབ་གསུམ་པོ་ཞལ་ཕྱེ་དང་འབྲེལ་བཀའ་སློབ་རིན་པོ་ཆེ་བཀའ་དྲིན་སྩལ། ཚོགས་པ་ཁག་ནས་རིག་གཞུང་འཁྲབ་སྟོན་དང་། གཞས་པ་དང་གཞས་མ་རྣམས་ཀྱིས་བསྟོད་དབྱངས་མཆོད་སྤྲིན་ཕུལ་རྗེས། གདན་ས་ཁག་གི་དྲུང་ཆེ་རྣམ་པས་ཐུགས་རྗེ་ཆེ་ཞུའི་གསུང་བཤད་བོད་དབྱིན་བལ་སྐད་ཐོག་གནང་རྗེས་མཛད་སྒོ་རྒྱལ་ཁའི་ངང་ལེགས་པར་གྲུབ། དེ་བཞིན་བསྟན་འགྲོའི་དཔལ་མགོན་སྐྱབས་མགོན་གོང་མ་ཁྲི་ཆེན་རིན་པོ་ཆེ་མཆོག་དང་། སྐྱབས་རྗེ་ངོར་ཀླུ་ལྡིང་མཁན་ཆེན་འཇམ་དབྱངས་བསྟན་པའི་ཉི་མ་རྣམ་གཉིས་ཀྱི་བཀའ་དགོངས་ལྟར་བསྟན་འགྲོའི་དཔལ་མགོན་ཕུན་ཚོགས་ཕོ་བྲང་སྐྱབས་མགོན་གོང་མ་བདག་ཆེན་འཇིགས་བྲལ་ངག་དབང་ཀུན་དགའ་བསོད་ནམས་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ་མཆོག་ལ། དཔལ་ལྡན་ས་སྐྱ་པ་ལྷ་མི་ཡོངས་ནས་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་གཟབ་རྒྱས་ཤིག་འདེགས་འབུལ་ཞུས།
ཕྱི་ཟླ་ ༡༡ ཚེས་ ༢༧ ཉིན་སྔ་དྲོའི་ཆུ་ཚོད་ ༨ པའི་ཐོག སྐྱབས་མགོན་གོང་མ་བདག་ཆེན་རིན་པོ་ཆེ་མཆོག་རྩེ་གཟིམ་ཆུང་ནས་འཁོན་གདུང་བླ་ཆེན་ས་སྐྱའི་སྤྱི་འཐུས་ལས་སྣེ་རྣམས་ནས་སྤོས་རྒྱས་སྤྱན་དྲངས་ཏེ་བཞུགས་ཁྲིར་ཞབས་སོར་འཁོད་བསྟུན་རྡོ་སློབ་སྒྲོལ་མ་ཕོ་བྲང་གི་འཁོན་གདུང་རཏཌྷ་བ་རིན་པོ་ཆེ་མཆོག་ནས་ཞབས་འཁོད་མལ་འདེགས་འབུལ་ཞུས། དེ་ནས་ཆོ་གའི་མཚམས་དང་བསྟུན་ས་གཞིས་སྤར་་ལའི་གཞིས་འགོ་དབང་རྒྱལ་ལགས་དང་ས་སྐྱ་སྤྱི་འཐུས་ག་ཟི་དགེ་བཤེས་ཚེ་རིང་པོ་རྣམ་གཉིས་ནས་དངོས་གཞི་གསེར་གྱི་མལ་མཐོན་པོར་འདེགས་བཞིན་ཕུན་ཚོགས་ཕོ་བྲང་གི་གདུང་སྲས་ཨ་བྷི་ཀིརྟ་བ་རིན་པོ་ཆེ་མཆོག་ནས་མལ་ལྗགས་བཤད་མཛད། སྐུ་གསུང་ཐུགས་ཡོན་ཏན་འཕྲིན་ལས་རྟེན་སྒྲོལ་ཕོའི་འཁོན་གདུང་ྙ་ན་བ་རིན་པོ་ཆེ་མཆོག་དང་། འབུལ་སྒོའི་མལ་ཕུན་ཕོའི་འཁོན་གདུང་ཨ་སྒ་བ་རིན་པོ་ཆེ་མཆོག། ཞལ་བཞེས་གསོལ་འདེབས་ངོར་སྐྱབས་རྗེ་ཀླུ་ལྡིང་མཁན་པོ་སྐུ་གཞོན་རིན་པོ་ཆེ། གཏང་རག་མལ་སྒྲོལ་ཕོའི་འཁོན་གདུང་རཏཌྷ་བ་རིན་པོ་ཆེ་མཆོག་དང་། རྒྱལ་སྲིད་སྣ་བདུན་བཅོ་བརྒྱད་ཞབས་དྲུང་རིན་པོ་ཆེ། བཀྲིས་རྫས་བརྒྱད་སྤྲུལ་སྐུ་རྡོ་གདན་པ་རིན་པོ་ཆེ་མཆོག་གི་འདེགས་འབུལ་ཞུས། ཕོ་བྲང་རྣམ་གཉིས་དང་། བླ་བྲང་ཁག གདན་ས་བཞི་དང་དགོན་སྡེ་གྲྭ་ཚང་ཚོགས་སྐྱིད་ཁག་བཅས་ནས་རིམ་པས་རྟེན་གསུམ་འདེགས་འབུལ་དང་འབུལ་བའི་རྣམ་གཞག་བསྟར་འབུལ་ཞུས་ཏེ་བཀྲ་ཤིས་ཕུན་སུམ་ཚོགས་པའི་ངང་ལེགས་པར་གྲུབ་པ་བཅས་སོ།།
