༢༠༡༣ ཟླ་ ༧ ཚེས་ ༡༨ རེས་གཟའ་ཕུར་བུ།
༄༅། །ཐེ་ཝན་བོད་ཀྱི་སྐུ་ཚབ་དོན་ཁང་དང་ཐེ་ཝན་བོད་རིགས་ཚོགས་པ་གཉིས་ཟུང་འབྲེལ་གྱིས་ཕྱི་ལོ་ ༢༠༡༣ ཟླ་ ༧ ཚེས་ ༡༦ ཉིན་ནས་འགོ་འཛུགས་ཐོག་ཐེ་ཝན་གྱི་རང་དབང་ཐང་ཆེན་དུ་བོད་མིས་རང་ལུས་མེར་སྲེག་གཏོང་དགོས་ཐུག་པའི་རྒྱུ་རྐྱེན་གང་ལ་ཐུག་ཡོད་མེད་དང་རང་ལུས་མེར་སྲེག་གཏོང་མཁན་རྣམས་ཀྱི་ཁ་ཆེམས་རྒྱ་ཡིག་ཐོག་བསྒྱུར་ནས་མང་ཚོགས་ལ་བརྒྱུད་བསྒྲགས་གནང་རྒྱུའི་འགྲེམས་སྟོན་གྱི་ལས་འགུལ་ཞིག་སྤེལ་འགོ་བཙུགས་འདུག།
དེ་ཡང་གུར་ཆེན་པོ་བཞིའི་སྟེང་རྒྱ་ཡིག་ཐོག་གལ་སྲིད་རྒྱ་ནག་ལ་ཐེ་ཝན་ལྟར་མང་གཙོ་དང་རང་དབང་གི་ལམ་ལུགས་ཤིག་ཡོད་ན། བོད་མིའི་རང་ལུས་མེར་སྲེག་གི་གནད་དོན་དེ་འདྲ་བྱུང་མེད། ཅེས་བཀོད་དེ་འགྲེམས་སྟོན་གྱི་ལས་འགུལ་སྤེལ་བཞིན་འདུག འགྲེམས་སྟོན་དེའི་ནང་གཙོ་བོ་བོད་ཕྱི་ནང་གཉིས་ཀྱི་རང་ལུས་མེར་སྲེག་གཏོང་མཁན་བོད་མི་རྣམས་ཀྱི་མངོན་འདོད་མང་ཚོགས་ལ་ངོ་སྤྲོད་གནང་རྒྱུ་མ་ཟད། ལྷག་པར་ཐེ་ཝན་ནང་ཡུལ་སྐོར་སྤྲོ་འཆམ་དུ་སླེབས་པའི་རྒྱ་ནག་སྐམ་ས་ཆེན་མོའི་རྒྱ་རིགས་མི་དམངས་ལ་བོད་དོན་གསལ་སྟོན་གནང་རྒྱུ་ཡིན་འདུག
ཕྱོགས་མཚུངས་ལས་འགུལ་དེའི་ཐོག་བོད་དོན་དྲིལ་བསྒྲགས་ཀྱི་དཔེ་དེབ་ཁག་གཅིག་རྒྱ་ཡིག་ཐོག་ཕབ་སྒྱུར་གནང་བ་དང་། ཐེ་ཝན་སྐུ་ཚབ་དོན་ཁང་ནས་འདོན་སྤེལ་གནང་བའི་༸གོང་ས་མཆོག་གིས་རྒྱ་རིགས་ཤེས་ཡོན་ཅན་དང་གསར་འགོད་པ་སོགས་ལ་སྩལ་བའི་བཀའ་སློབ་ཕྱོགས་བསྒྲིགས་ཞུས་པ་རྣམས་མང་ཚོགས་ལ་རིན་མེད་ཐོག་འགྲེམས་སྤེལ་གནང་བཞིན་ཡོད་འདུག
འགྲེམས་སྟོན་དེ་བཞིན་འདི་ཟླའི་ཕྱི་ཚེས་ ༡༦ ནས་ ༢༡ བར་གནང་རྒྱུ་ཡིན་འདུག་པ་བཅས།
