༢༠༡༣ ཟླ་ ༧ ཚེས་ ༡༦ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༤ ཉིན་གྱི་ཕྱེད་ཡོལ་ཆུ་ཚོད་ ༢ པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྡེ་ར་ལྡུན་ཁུལ་གྱི་མཐོ་རིམ་སློབ་ཕྲུག་སོགས་ལ་བདེ་སྐྱིད་གླིང་སྤྱི་མི་ཚོགས་ཁང་ནང་གསུང་བཤད་གནང་དོན། དེ་རིང་ང་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བ་རེད། ཐོག་མར་ངས་བཀའ་ཤག་གི་ཚབ་ཞུས་ཏེ་ཚང་མར་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན།
སྤྱིར་བཏང་ང་རང་ས་ཕྱོགས་གང་དུ་སླེབས་ཀྱང་གཙོ་བོ་སློབ་ཕྲུག་ཚོ་དང་ཐུག་འཕྲད་བྱེད་རྒྱུ་དང་། ང་ཚོའི་མི་རབས་རྒན་པ་ཚོ་ང་ཚོར་བཀའ་དྲིན་ཆེན་པོ་ཡིན་ཆགས་ཡོད་སྟབས། ཁོང་ཚོ་ཡང་ཐུག་འཕྲད་བྱེད་ཀྱི་ཡོད། དེ་བཞིན་མི་མང་ལ་ཐུག་འཕྲད་བྱ་རྒྱུ་དེ་ནི་ངའི་འགན་རེད། དེ་རིང་འདི་གར་སྡེ་ར་ལྡུན་ཁྱབ་ཁོངས་ཀྱི་གཞོན་སྐྱེས་རྣམ་པ་དང་ཐུག་འཕྲད་བྱེད་རྒྱུ་བྱུང་བར་ཧ་ཅང་དགའ་པོ་བྱུང། བསྟན་འཛིན་སྒང་ཙམ་མ་གཏོགས་བཙན་བྱོལ་ནང་གི་སློབ་གྲྭ་ཁག་མང་ཆེ་བར་ཆེད་མངགས་སྐོར་བསྐྱོད་བྱས་པ་ཡིན། ཁྱེད་རང་ཚོས་ཀྱང་དཀའ་ལས་བརྒྱབ་ན་ཕྲན་བུ་བྱེད་ཐུབ་ཀྱི་རེད་ལ་དཀའ་ལས་རྒྱག་རོགས་ཞེས་ཞུ་གི་ཡོད།
མདོར་ན། ཁྱེད་རང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་དང་༸གོང་ས་མཆོག་གི་བཀའ་དྲིན་མ་བརྗེད་པ་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། རང་བཙན་ཁ་ལ་འཁྱེར་ནས་༸གོང་ས་མཆོག་ལ་མཚན་སྨད་དང་སྐྱོན་འཛུགས་བྱེད་རྒྱུ་དེ་ཧ་ཅང་ཐབས་སྡུག་གི་གནས་ཚུལ་རེད། སྐྱོན་འཛུགས་རྒྱ་ནག་གཞུང་ལ་བྱེད་དགོས། དེ་བཞིན་ང་ཚོས་ཉིན་ལྟར་བོད་ཆས་གྱོན་མི་ཐུབ་ནའང་རེས་གཟའ་ལྷག་པ་ནམ་ཡིན་ལ་བོད་ཆས་གྱོན་ཐུབ་ན་ཧ་ཅང་ཡག་པོ་ཡོད།
ལྷག་པར་ཁྱེད་རང་ཚོས་བོད་མིའི་སྒྲིག་འཛུགས་ཀྱི་དྲ་རྒྱ་ལྟ་ཀློག་བྱས་ན། བོད་མིའི་སྒྲིག་འཛུགས་ངོས་ནས་ལས་དོན་གང་ཞིག་བྱེད་ཀྱི་ཡོད་མེད་དང་། བོད་དོན་དྲིལ་བསྒྲགས་གང་འདྲ་བྱེད་ཀྱི་ཡོད་མེད་ཐོག་གནས་ཚུལ་གསལ་རྟོགས་ཡོང་གི་རེད། ཅེས་སོགས་ཀྱི་གསུང་བཤད་གནང་ཡོད།
