༢༠༡༣ ཟླ་ ༧ ཚེས་ ༡༠ རེས་གཟའ་ལྷག་པ།

༄༅། །ཕ་རན་སི་སྐུ་ཚབ་དོན་ཁང་གི་གོ་སྒྲིག་ཐོག་ཕྱི་ལོ་ ༢༠༡༣ ཟླ་ ༧ ཚེས་ ༩ ཉིན་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༨ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩིའི་སྣེ་ལེན་མཛད་སྒོའི་ཐོག་བོད་དོན་རྒྱབ་སྐྱོར་གནང་མཁན་ཕ་རན་སི་གྲོས་ཚོགས་ཀྱི་འཐུས་མི་རྣམ་པ་དང་། གནད་ཡོད་མི་སྣ། དེ་བཞིན་ཚོགས་པ་ཁག་གི་སྐུ་ཚབ་བཅས་མཉམ་བཞུགས་གནང་ཡོད། འཁྲུང་སྐར་མཛད་སྒོ་དེ་བཞིན་ཕ་རན་སིའི་གྲོས་ཚོགས་འོག་མའི་འཐུས་མིས་མཐུན་འགྱུར་འོག་གྲོས་ཚོགས་ཀྱི་ཚོགས་ཁང་ཞིག་ཏུ་ཚོགས་ཡོད། སྐབས་དེར་ཕ་རན་སི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇིན་པེ་ཊི་རིཀ་གྷ་ཡེལ་ས་ Mr Jean Patrick Gilles ལགས་ཀྱིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚེ་ཧྲིལ་པོར་མཛད་འགན་གཙོ་བོ་གསུམ་ཐོག་ཐུགས་བརྩོན་ཧ་ཅང་མཛད་དང་མཛད་བཞིན་པར་བརྟེན། དྲང་བདེན་ལ་དགའ་བའི་མི་མང་ཚོས་ཁོང་གི་ལམ་སྟོན་གཞིར་བཟུང་མི་ཚེ་སྐྱེལ་ཐབས་བྱ་གལ་ཆེ་བ་མ་ཟད། ཁོང་རང་ཉིད་ལྟ་བུར་ཆ་མཚོན་ན། བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་ཞེས་སོགས་ཀྱི་གསུང་བཤད་གནང་ཡོད།

དེ་ནས་སྦར་སིལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་བ་ཆབས་ཅིག ཕ་རན་སི་གཞུང་མང་གཉིས་ལ་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད། དེ་བཞིན་ཕྱི་ཚེས་ ༦ དང་ ༧ བཅས་ཉིན་གྲངས་གཉིས་རིང་ཕ་རན་སི་བོད་རིགས་ཚོགས་པས་གོ་སྒྲིག་ཐོག་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། སྐབས་དེར་ཕ་རན་སི་ནང་བོད་པའི་ལྷ་མོ་ཚོགས་པ་ཐེངས་དང་པོ་དབུ་འབྱེད་དང་སྦྲགས་མང་ཚོགས་ལ་འཁྲབ་སྟོན་ཡང་གནང་འདུག་པ་བཅས།།