༢༠༡༣ ཟླ་ ༧ ཚེས་ ༡༠ རེས་གཟའ་ལྷག་པ།

༄༅། །ཕྱི་ལོ་ ༢༠༡༣ ཟླ་ ༧ ཚེས་ ༤ ཉིན་དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་བོད་ཁང་ The Office of Tibet གིས་གོ་སྒྲིག་འོག ལེ་ག་ཊམ་བསྟི་གནས་ཁང་གི་ཚོགས་ཁང་ཆེན་མོའི་ནང་ Legatum Institute ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༨ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། སྐབས་དེར་དབྱིན་ཡུལ་གྱི་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་དང་སླེ་ལུང་རིན་པོ་ཆེ། ལོན་ཌོན་ནང་རྟེན་གཞི་བྱས་པའི་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་འཐུས་མི་དང། ཁུལ་དེར་རྟེན་གཞི་བྱས་པའི་གཞུང་ཚབ་པ་ཁག་གཅིག དེ་བཞིན་གསར་འགོད་པ་བཅས་ལྷན་འཛོམས་ཐོག་སྲུང་བརྩི་གཟབ་རྒྱས་ཞུས་ཡོད།

ཕྱེད་ཡོལ་སྐུའི་འཁྲུངས་སྐར་སྲུང་བརྩིའི་མཛད་སྒོའི་ཐོག་སྐུ་ཚབ་དོན་གཅོད་ཀྱིས་གཙོས་ས་གནས་བོད་མི་རྣམས་འདུ་འཛོམས་ཀྱི་སྨོན་ལམ་གསུང་འདོན་གནང། དེ་རྗེས་སྐུ་ཚབ་དོན་གཅོད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་འཕྲིན་ཁྲོད་གཙོ་བོ་འགྲོ་བ་ཡོངས་ལ་ཐུགས་བྱམས་བརྩེའི་གཟིགས་པའི་འོག་འགྲོ་བ་མིའི་བཟང་པོ་རིན་ཐང་དང་། ཆོས་ལུགས་མཐུན་སྒྲིལ། དེ་བཞིན་བོད་ཀྱི་རིག་གཞུང་དང་འབྲེལ་བའི་བོད་བརྒྱུད་ནང་བསྟན་མི་ཉམས་གོང་འཕེལ་དང་ཉམས་པ་སོར་ཆུད་མཛད་དང་མཛད་མུས་ཡིན་པ་དང།

ལྷག་པར་རྒྱ་རིགས་རྣམས་ལ་ཐུགས་བརྩེ་ཆེན་པོ་མཛད་པ་བརྒྱུད་བོད་རྒྱའི་མི་རིགས་གཉིས་དབར་འཆམ་མཐུན་གོང་མཐོར་གཏོང་གནང་མཛད་བཞིན་པ་སོགས་རླབས་ཆེན་གྱི་མཛད་འཕྲིན་ཁག་ངོ་སྤྲོད་གནང་གྲུབ་མཚམས། གཞས་སྣ་འཁྲབ་སྟོན་གནང་། ཕྱི་ཚེས་ ༦ ཉིན་༸གོང་ས་མཆོག་གི་སྐུའི་འཁྲུངས་ཚེས་དངོས་སུ་འཁེལ་བཞིན་པར་བརྟེན། རྒྱལ་ས་ལོན་ཌོན་དུ་གནས་སྡོད་བོད་མི་ཚོས་དེ་ཉིན་གཞས་སྣ་འཁྲབ་སྟོན་ཞུས་པ་བརྒྱུད་དུས་ཆེན་སྲུང་བརྩི་གཟབ་རྒྱས་ཞུས་ཡོད་པ་བཅས།།