༢༠༡༣ ཟླ་ ༧ ཚེས་ ༡༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སེར་བྱེས་གྲྭ་ཚང་གི་ཚན་རིག་བསྟི་གནས་ཁང་གསར་པ་དབུ་འབྱེད་རབ་གནས་དང་འབྲེལ་གྲྭ་ཚང་དེའི་དགེ་འདུན་པ་ཚན་རིག་སློབ་སྦྱོང་གནང་དང་གནང་མུས་ཡིན་པ་བརྒྱ་དང་ཉི་ཤུ་རྩ་གྲངས་ཡོད་པ་རྣམ་ལ་ལམ་སྟོན་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་ཚན་རིག་སློབ་སྦྱོང་བྱེད་མཁན་རྣམས་དང་ཁྱུག་ཙམ་ཐུག་རྒྱུ་བྱུང་བར་ཧ་ཅང་དགའ་པོ་བྱུང། ཁྱེད་རང་ཚོ་ཚང་མར་འཚམས་འདྲི་ཡོད། ཁྱེད་རང་ཚོས་ཚན་རིག་ལ་སློབ་སྦྱོང་བྱེད་རྒྱུ་དེ་སོ་སོའི་ཤེས་བྱའི་གནས་གཅིག་པུ་མ་ཡིན། སངས་རྒྱས་ཀྱི་བསྟན་པ་དུས་རབས་ཉེར་གཅིག་པ་འདིིའི་ནང་ཚན་རིག་པས་འཛམ་གླིང་འདིའི་ཐོག་བདེན་དོན་རྩོད་ཀྱི་ཡོད་པ་རྩོད་མེད་ཡོངས་གྲགས་རེད། ང་ཚོའི་སངས་རྒྱས་པའི་ཆོས་དེ་ཚན་རིག་པ་དང་མཉམ་དུ་འགྲེལ་བཤད་རྒྱག་ཐུབ་པ་དང་ལག་སྦྲེལ་གཏོང་ཐུབ་པ་ཞིག་བྱུང་ན། དེ་ཡང་ངོས་ཀྱིས་སངས་རྒྱས་པའི་ཆོས་སྤེལ་རྒྱུའི་དོན་དག་མིན་པར། འཛམ་གླིང་འདིའི་ཐོག་མིའི་རྣམ་དཔྱོད་སྤེལ་རྒྱུར་ངོས་ཀྱིས་འབད་བརྩོན་བྱེད་བཞིན་ཡོད།
དེ་ནི་ང་རང་ཚོས་དོན་གྱི་སངས་རྒྱས་པའི་ཆོས་ཀྱི་ཞབས་འདེགས་ཆེན་པོ་ཞིག་སྒྲུབ་ཀྱི་ཡོད། གང་ལྟར་སངས་རྒྱས་པའི་ཆོས་ཀྱིས་མི་བཟང་པོ་ཞིག་བྱེད་དགོས་གསུང་གི་ཡོད། དེ་བཞིན་སེམས་ཅན་ཐམས་ཅད་ཅེས་གསུང་གི་ཡོད། ཁྱེད་རང་ཚོས་དུས་རབས་ཉེར་གཅིག་གི་ནང་པའི་བསྟན་པ་འཛིན་སྐྱོང་སྤེལ་གསུམ་བྱེད་རྒྱུར་འགན་ཁུར་ཤུགས་ཆེ་ཙམ་ལེན་དགོས། ངོས་རང་ཚན་རིག་ལ་དངོས་སུ་སློབ་སྦྱོང་དེ་འདྲ་གང་ཡང་བྱས་མྱོང་མེད་ཀྱང་ཚན་རིག་པ་དང་མཉམ་དུ་འབྲེལ་བ་དང་གོ་བསྡུར་བྱས་ཏེ་ལོ་མང་པོ་ཞིག་ཕྱིན་ཡོད། ང་རང་ཚོའི་ནམ་རྒྱུན་རིགས་འགའ་ཤས་ནས་ཚན་རིག་ལ་སློབ་སྦྱོང་བྱས་ན། ཆོས་དད་ལ་གནོད་སྐྱོན་ཡོང་གི་ཡོད་སྐོར་བརྗོད་མཁན་ཡོང་གི་འདུག ཚན་རིག་དངོས་གནས་ཤིག་དང་གཏིང་ཟབ་ཐོག་ཕྱིན་ན། ནང་ཆོས་ལ་རྒྱབ་སྐྱོར་བྱེད་ཀྱི་ཡོད་པ་རེད་མ་གཏོགས་ནང་ཆོས་དང་འགལ་ཟླ་གང་ཡང་མེད། གང་ལ་ཞེ་ན། ནང་ཆོས་ནི་རྒྱུ་མཚན་དང་འབྲེལ་ནས་འགྲོ་གི་ཡོད། ཚན་རིག་པས་ཀྱང་རྒྱུ་མཚན་ལ་བརྟེན་ནས་བརྟག་དཔྱད་བྱས་ཏེ་འགྲོ་གི་ཡོད། འོན་ཀྱང་བརྟག་དཔྱད་བྱེད་སྟངས་དེ་ཚན་རིག་པས་མིག་གིས་མཐོང་། རྩིས་བརྒྱབ་ནས་འགྲོ་གི་ཡོད། ང་ཚོས་བརྟག་དཔྱད་གཙོ་བོ་དེ་ཚད་མ་རིགས་པའི་འགྲོ་སྟངས་ཁྱབ་མི་ཁྱབ་ཐོག་ནས་བྱེད་ཀྱི་ཡོད། དེར་བརྟེན་དཔྱད་པ་བྱེད་སྟངས་མི་འདྲ་བ་རེད། ཅེས་སོགས་ཀྱི་བཀའ་སློབ་སྩལ་ཡོད། །
