༢༠༡༣ ཟླ་ ༧ ཚེས་ ༡༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༡༠ དང་ ༡༡ ཉིན་གྲངས་གཉིས་རིང་ཨ་རིའི་རྒྱལ་ས་ཝ་ཤིང་ཊོན་ཌེ་སིའི་ནང་ཨ་རི་དང་རྒྱ་ནག་གི་འགོ་ཁྲིད་བར་ཐབས་བྱུས་དང་དཔལ་འབྱོར་གོང་འཕེལ་ཐོག་གྲོས་མོལ་བྱེད་འཆར་ཡོད་པ་དང་སྟབས་བསྟུན། ཁུལ་དེའི་འགྲོ་བ་མིའི་ཐོབ་ཐང་ཚོགས་པ་དང་ཨ་རིའི་ནང་གི་བོད་དོན་རྒྱབ་སྐྱོར་ཚོགས་པ་སོགས་ཀྱིས་གོ་སྒྲིག་འོག་ཨ་རིའི་ཕོ་བྲང་དཀར་པོའི་ཉེ་འདབས་སུ་ལས་འགུལ་ཞིག་སྤེལ་འཆར་ཡོད་འདུག
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ལས་འགུལ་དེ་བཞིན་རྒྱལ་སྤྱིའི་ཉེས་ཡངས་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་སོགས་ཀྱི་གོ་སྒྲིག་གནང་རྒྱུ་ཡིན་པ་མ་ཟད། ཚོགས་པ་དེ་དག་གིས་མཉམ་འབྲེལ་ཐོག་སྤེལ་བའི་གསར་འགོད་གསལ་བསྒྲགས་ནང་འཁོད་དོན། ཕྱི་ཚེས་ ༡༠ ནས་ ༡༡ བར་ཨ་རིའི་རྒྱལ་ས་ཝ་ཤིང་ཊོན་ཌེ་སིའི་ནང་ཨ་རིའི་ཕྱི་སྲིད་བློན་ཆེན་སྐུ་ཞབས་ཇོན་ཀ་རེ་མཆོག་གིས་གཙོས་ནོར་སྲིད་བློན་ཆེན་སྐུ་ཞབས་ཇེ་ཀབ་ལིའུ་ལགས་གཉིས་ནས་རྒྱ་ནག་གི་ཕྱི་སྲིད་བློན་ཆེན་ཝང་ཅན་ཇི་དང་སྲིད་བློན་གཞོན་པ་ཝང་ཡང་ལྷན་ཨ་རིའི་དང་རྒྱ་ནག་གཉིས་དབར་འཐབ་བྱུས་དང་དཔལ་འབྱོར་གྱི་གནས་བབས་ཐོག་གྲོས་མོལ་བྱེད་གཏན་འཁེལ་ཡོད། ཨ་རིའི་གཞུང་ཕྱོགས་ནས་ཐེངས་འདིའི་གྲོས་མོལ་སྐབས་གཙོ་བོ་བོད་ནང་གི་ཛ་དྲག་གནད་དོན་དེ་བཞིན་ཨ་རིའི་གྲོས་གཞི་གཙོ་གྲས་ཁོངས་སུ་འཇུག་དགོས་པའི་རེ་འདུན་བཏོན་ཡོད་པ་མ་ཟད། རྒྱ་ནག་གཞུང་གི་འགོ་ཁྲིད་གསར་པ་ཚོའི་ངོས་ནས་ཀྱང་བོད་མིའི་ཐོག་འཛིན་བཞིན་པའི་དྲག་པོའི་སྲིད་བྱུས་ལ་བསྐྱར་ཞིབ་བྱེད་དགོས་སྐོར་སོགས་འཁོད་འདུག་པ་བཅས། །
