༢༠༡༣ ཟླ་ ༧ ཚེས་ ༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སེར་སྨད་ཐོས་བསམ་ནོར་གླིང་གྲྭ་ཚང་དུ་གྲྭ་ཚང་གི་དགེ་འདུན་པ་ཞལ་གྲངས་ལྔ་བརྒྱ་ཙམ་ལ་བསྙེན་རྫོགས་ཀྱི་སྡོམ་འབོགས་སྩལ་དང་སྩལ་མུས་ཡིན་འདུག
དེ་ཡང་ཕྱི་ཚེས་ ༧ ཉིན་གྱི་ཕྱི་དྲོ་ཆུ་ཚོད་བཞི་པ་ཙམ་ལ་མགོན་པོ་གང་ཉིད་མཆོག་སེར་སྨད་ཐོས་བསམ་ནོར་གླིང་གྲྭ་ཚང་དུ་༸ཞབས་སོར་འཁོད་གྲུབ་མཚམས་ཐོག་མར་གྲྭ་ཚང་དེའི་གཙུག་ལག་ཁང་དུ་གནས་གཟིགས་མཛད་པ་དང་འབྲེལ་གྲྭ་ཚང་གི་གཙུག་ལག་ཁང་དུ་དགེ་འདུན་པ་རྣམ་པར་༸གོང་ས་མཆོག་གིས་བཀའ་སློབ་སྩལ་དོན། ངོས་རང་ཐེངས་འདིའི་ལྷོ་ཕྱོགས་ཁུལ་དུ་ཡོང་དོན་གཙོ་བོ་དགེ་འདུན་པ་ཚོར་བསྙེན་རྫོགས་ཀྱི་སྡོམ་པ་འབོགས་ཆོག་བྱེད་རྒྱུ་སོགས་ཀྱི་ཆེད་དུ་ཡིན། དེ་བཞིན་སེར་སྨད་གྲྭ་ཚང་དང་དགའ་ལྡན་ཤར་རྩེ་གྲྭ་ཚང་གིས་བསམ་བློ་རྒྱ་ཆེ་ས་ནས་བཏང་སྟེ་དཀའ་ངལ་ལ་གདོང་ལེན་གྱིས་ལྷག་བསམ་རྣམ་དག་ཐོག་དད་པ་དམ་ཚིག་གཡོ་བ་མེད་པ་བྱས་པར་སྙིང་ཐག་པ་ནས་ཐུགས་རྗེ་ཆེ་བརྗོད་རྒྱུ་ཡིན། ཕྱོགས་མཚུངས་ངོས་རང་གི་གཟུགས་པོའི་གནས་སྟངས་སྔ་ལོ་ལས་ཡག་ཏུ་ཕྱིན་འདུག དེ་ནི་སྤྱིར་བཏང་དད་ལྡན་མང་ཚོགས་རྣམས་ནས་དམ་ཚིག་གཡོ་མེད་ཐོག་སྨོན་ལམ་བརྒྱབ་པར་བརྟེན་ནས་བྱུང་བ་ཞིག་རེད། ཅེས་སོགས་ཀྱི་བཀའ་སློབ་སྩལ་ཡོད། ལྷག་པར་མགོན་པོ་གང་ཉིད་མཆོག་གིས་བསྙེན་རྫོགས་ཀྱི་སྡོམ་པ་འབོགས་ཆོག་ཉིན་དང་པོ་སེར་བྱེས་གྲྭ་ཚང་གི་གཟིམ་ཆུང་དུ་སྩལ་གྲུབ་མཚམས་ཕྱི་ནང་གི་དད་ལྡན་པ་ཁག་གཅིག་ལ་ཟུར་མཇལ་སྩལ་ཡོད། དེ་བཞིན་ཕྱེད་ཡོལ་ཆུ་ཚོད་ ༢ ཙམ་ལ་ལྷོ་ཕྱོགས་སྦེང་ལོར་ཁུལ་གྱི་མཐོ་སློབ་ནང་སློབ་སྦྱོང་བྱེད་བཞིན་ཡོད་པའི་འབྲུག་པའི་སློབ་ཕྲུག་བརྒྱ་སྐོར་ཙམ་ཞིག་ལ་མཇལ་ཁ་དང་སྐུ་པར་ལྷན་སྒྲོན་མཛད་ཡོད་པ་མ་ཟད། བཀའ་སློབ་ཀྱང་སྩལ་འདུག་པ་བཅས། །
