༢༠༠༩ ཕྱི་ཟླ་ ༦ ཚེས་ ༡༠ རེས་གཟའ་ལྷག་པ།
༄༅། །བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་ཞུས་ཏེ་རྒྱལ་ཡུམ་ཆེན་མོའི་དྲན་ རྟེན་རྐང་རྩེད་སྤོ་ལོའི་འགྲན་བསྡུར་དེ་བཞིན་ཕྱི་ལོ་ ༢༠༠༩ ཟླ་ ༥ ཚེས་ ༣༡ ནས་ཕྱི་ཟླ་ ༦ ཚེས་ ༩ བར་ཉིན་གྲངས་ ༡༠ རིང་རྡ་ས་བཞུགས་སྒར་བོད་ཁྱིམ་སློབ་གྲྭའི་རྩེད་ཐང་དུ་འགྲན་བསྡུར་གནང་ཡོད།
བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ནས་ཐེངས་བཅོ་ལྔ་པའི་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་རྩེད་འགྲན་ཨང་དང་པོ་ཐོབ་མཁན་མོན་གྷོ་པོ་ཏཱ་ལའི་རྐང་རྩེད་རུ་ཁག་ལ་གསེར་གྱི་བུམ་པ་གནང་བཞིན་པ།
དེ་ཡང་རྩེད་འགྲན་ཉིན་མཐའ་མ་ཕྱི་ཟླ་ ༦ ཚེས་ ༩ ཕྱེད་ཡོལ་ཆུ་ཚོད་ ༣།༠༠ ཐོག་རྩེད་འགྲན་གྱི་ཐོག་མར་རུ་ཁག་གཉིས་རྩེད་ཐང་དུ་འཛོམས་རྗེས་དཔལ་ལྡན་ཁྲིམས་ཞིབ་པ་ཆེ་བ་མཆོག་རྩེད་ཐང་དུ་ཕེབས་ཏེ་རྩེད་འགྲན་པ་རྣམས་ལ་ཕྱག་བཏང་རྗེས་སྐུ་དཔར་ཡང་མཉམ་དུ་བརྒྱབ་ཡོད།
༢༠༠༩ ལོའི་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་རྩེད་འགྲན་རིམ་པར་བྱས་པའི་མཐའ་མ་མོན་གྷོ་པོ་ཏཱ་ལ་རྐང་རྩེད་སྤོ་ལོའི་རུ་ཁག་དང་། མ་རྡ་ར་སི་བོད་ཕྲུག་ཚོགས་པའི་རྐང་རྩེད་སྤོ་ལོའི་རུ་ཁག་གཉིས་དབར་འགྲན་བསྡུར་བྱས་འབྲས་འདི་ལོའི་རྒྱལ་ཡུམ་ཆེད་མོའི་རྐང་རྩེད་སྤོ་ལོའི་དྲན་རྟེན་གྱི་རྩེད་འགྲན་ཨང་དང་པོ་མོན་གྷོ་པོ་ཏཱ་ལ་རྐང་རྩེད་སྤོ་ལོའི་རུ་ཁག་དང་། ཨང་གཉིས་པ་མ་རྡ་ར་སི་བོད་ཕྲུག་ཚོགས་པའི་རྐང་རྩེད་སྤོ་ལོའི་རུ་ཁག་ལ་ཐོབ་ཡོད་པ་རེད། བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་ཞུས་ཏེ་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་འགྲན་བསྡུར་ཨང་རིམ་དང་པོར་དྲན་རྟེན་གསེར་གྱི་བུམ་པ་དང་བྱ་དགའ་ཧིན་སྒོར་ ༢༥༠༠༠།༠༠ དང་། ཨང་རིམ་གཉིས་པར་དྲན་རྟེན་བུམ་པ་དང་བྱ་དགའ་ཧིན་སྒོར་ ༡༥༠༠༠།༠༠ བཅས་སྐུ་མགྲོན་གཙོ་བོ་བོད་མི་མང་ནས་ཐད་ཀར་འོས་འདེམས་བྱས་པའི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་གནང་ཡོད།
རྒྱལ་ཡུམ་ཆེན་མོའི་རྐང་རྩེད་སྤོ་ལོའི་འགྲན་བསྡུར་ཐེངས་བཅོ་ལྔ་པའི་མཐའ་མའི་འགྲན་བསྡུར་ཐོག་སྐུ་མགྲོན་གཙོ་བོ་དཔལ་ལྡན་བཀའ་བློན་ཁྲི་པ་མཆོག་གི་དབུས་དཔལ་ལྡན་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག རང་དབང་ཅན་གྱི་འགན་འཛིན། སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། ཨི་ཊ་ལི་ནས་ཕེབས་པའི་སབྱིན་བདག་ཁག རྒྱ་གར་གླ་བྱེད་རླངས་འཁོར་ཚོགས་པའི་འགན་འཛིན་རྣམ་པ། དེ་བཞིན་རང་རིགས་སེར་སྐྱ་མི་མང་ ༤༠༠༠ བརྒལ་བ་གཟིགས་མོར་མཉམ་ཞུགས་གནང་བ་བཅས།།
