༢༠༠༩ ཕྱི་ཟླ་ ༦ ཚེས་ ༩ རེས་གཟའ་མིག་དམར།
༄༅། འདི་གར་ཁུངས་ལྡན་གནས་ཚུལ་མུ་མཐུད་འབྱོར་བར་གཞིགས་ན། ༢༠༠༨ ཕྱི་ཟླ་ ༣ པའི་ནང་བོད་ཀྱི་རྒྱལ་ས་ལྷ་སར་ཞི་རྒོལ་ཤུགས་ཆེ་བྱུང་རྗེས་རྒྱ་ནག་གཞུང་གི་སྤྱི་བདེ་མི་སྣ་དང་དྲག་ཆས་དམག་མིས་བོད་མི་གང་བྱུང་འཛིན་བཟུང་དང་ཉེས་རྡུང་ཚད་མེད་བཏང་སྟེ་བཀག་ཉར་བྱས་ཡོད་པ་ལྟར། ༢༠༠༨ ཕྱི་ཟླ་ ༣ ཚེས་ ༡༤ དགོང་དྲོ་སྐྱེས་ཡུལ་མལ་དྲོ་གུང་དཀར་རྫོང་ཁོངས་བཀྲིས་སྒང་ཤང་ཁོངས་ནས་ཡིན་པའི་རང་ལོ་ ༢༡ ཙམ་དུ་སོན་པའི་ན་གཞོན་ཕུན་ཚོགས།
ལྷ་སའི་ཤར་ཕྱོགས་ཀརྨ་ཀུན་བཟང་ཁུལ་གྱི་ཁྱིམ་དུ་སྡོད་སྐབས་འཛིན་བཟུང་བྱས་ཡོད་པ་དང་། དེ་རྗེས་རྒྱ་གཞུང་དྲག་ཆས་ཉེན་རྟོག་དམག་མིས་རྒྱུ་མཚན་གང་ཡང་མ་བཤད་པར་ཉེས་རྡུང་ཚད་མེད་བཏང་སྟེ་ལྷ་སའི་མེ་འཁོར་བབས་ཚུགས་ཀྱི་མཛོད་ཁང་གཅིག་ནང་ཉེས་མེད་འཛིན་བཟུང་བྱས་པའི་བོད་མི་བཀག་ཉར་བྱས་ཡོད་པ་རྣམས་དང་མཉམ་དུ་བཅུག་སྟེ་ཉིན་གྲངས་ཉི་ཤུ་ཙམ་བཀག་ཉར་བྱས་རྗེས་གློད་བཀྲོལ་བཏང་ཡོད་འདུག ཡིན་ནའང་གློད་བཀྲོལ་བྱུང་རྗེས་མལ་དྲོ་གུང་དཀར་རྫོང་ཁོངས་སུ་ཡོད་པའི་ཁྱིམ་དུ་སླེབས་རྗེས་སྨན་བཅོས་གང་ཐུབ་བྱས་ཀྱང་དྲག་སྐྱེད་དེ་ཙམ་མ་བྱུང་བར་ད་ལྟ་ལག་གཉིས་ཁར་རྒྱུགས་ལ་བརྟེན་དགོས་པ་དང་། སྐེད་པ་ཀེར་ཀེར་བྱེད་རྒྱུ་མེད་པའི་གཅོང་ཅན་ཆགས་ཏེ་ལུས་བབས་གནས་སྟངས་ཧ་ཅང་སྐྱོ་པོ་ཆགས་ཡོད་འདུག ད་ལྟ་ཁྱིམ་དུ་བཟའ་ཟླ་དང་རང་ལོ་གཅིག་ལ་སོན་པའི་ཕྲུ་གུ་ཞིག་ཀྱང་ཡོད་འདུག ཁོང་ནི་རྒྱུན་གཏན་ལྷ་ས་ཁུལ་དུ་འཁོར་གསུམ་རླངས་འཁོར་བཏང་སྟེ་འཚོ་བ་སྐྱེལ་མཁན་ཞིག་ཡིན་ནའང་། སྔ་ལོ་ཕྱི་ཟླ་ ༣ པའི་ནང་ལྷ་སར་ཞི་བའི་ངོ་རྒོལ་བྱེད་སྐབས་ཁོང་ཞི་རྒོལ་ནང་འཛུལ་ཞུགས་བྱེད་མཁན་གྲས་སུ་མེད་ཀྱང་དྲག་ཆས་དམག་མིས་ཁྱིམ་ཚང་སྔོག་བཤེར་སྐབས་ཉེས་མེད་འཛིན་བཟུང་བྱས་ཏེ་ཉེས་རྡུང་བཏང་སྟེ་བཀག་ཉར་བྱས་པའི་གནས་ཚུལ་བྱུང་བ་བཅས་སོ།།
