༢༠༠༩ ཕྱི་ཟླ་ ༦ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༦ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕ་རན་སིའི་རྒྱལ་ས་པ་རེ་སེའི་པཀ་མགྲོན་ཁང་གི་ཚོམས་ཆེན་ནང་ཕ་རན་སིའི་རྒྱལ་སའི་ཁུལ་དུ་གནས་སྡོད་རྒྱ་རིགས་ཚོར་མཇལ་འཕྲད་གནང་བ་དང་ཆབས་ཅིག་ཁུལ་དེར་བཞུགས་པའི་རྒྱ་རིགས་རྩོམ་སྒྲིག་པ་དང་མང་གཙོ་དོན་གཉེར་བ། སློབ་ཕྲུག་སོགས་ཁྱོན་རྒྱ་རིགས་གྲངས་ ༧༠ ཙམ་ལ་བོད་མི་མང་གིས་རང་དབང་བརྩོན་ལེན་བྱེད་བཞིན་པ་འདི་དག་ལ་རྒྱ་ནག་གཞུང་ཕྱོགས་ནས་འཁྱོག་བཤད་ཀྱི་དྲིལ་བསྒྲགས་ཤུགས་ཆེ་བྱས་དང་བྱེད་མུས་རེད། དེ་དག་གི་ཐད་དྲང་པོའི་ཞིབ་འཇུག་བྱེད་དགོས་སྐོར་བཀའ་སློབ་སྩལ་ཡོད།
༸གོང་ས་༸སྐྱབས་མགོན་ཆེན་པོ་མཆོག་ནས་ཕ་རན་སིར་རྒྱ་རིགས་རྩོམ་སྒྲིག་པ་དང་མང་གཙོ་དོན་གཉེར་བ་ཁག་གཅིག་དང་མཇལ་འཕྲད་གནང་བཞིན་པ།
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་ཕེབས་དོན། ང་ཚོ་ཐབས་སྐྱོ་པོ་ག་རེ་འདུག་ཟེར་ན། དངོས་ཡོད་གནས་ཚུལ་དེ་དག་རྒྱ་ནག་ནང་དུ་སླེབས་ཐུབ་ཀྱི་མི་འདུག རྒྱ་ནག་ནང་གསར་འགྱུར་བཀག་སྡོམ་ཧ་ཅང་ཤུགས་ཆེ་བྱེད་ཀྱི་འདུག ང་ཚོ་བོད་པས་བོད་པར་ཤ་ཚ་བྱས་ན་ཁ་བྲལ་རིང་ལུགས་པ་རེད་ཅེས་དང་། ཡང་ཕྱི་རྒྱལ་བ་ཚོས་བོད་ཀྱི་གནད་དོན་ལ་ཕྱོགས་ལྷུང་མེད་པར་རྒྱབ་སྐྱོར་བྱེད་བཞིན་པ་དེ་ནི་ཕལ་ཆེར་རྒྱ་ནག་ལ་དགྲ་འཛིན་གྱིས་ཁ་བྲལ་སྟོབས་ཤུགས་རེད་ཅེས་སྐད་ཆ་ཤོད་ཀྱི་ཡོད། དེར་བརྟེན་ཁྱེད་རྣམ་པས་རྒྱལ་ཞེན་ཡོད་པའི་ཐོག་ནས་དངོས་སུ་མཐོང་བའི་གནས་ཚུལ་རྣམས་འགྲེལ་བརྗོད་བྱས་ན་དེ་ནི་ཧ་ཅང་ཕན་ཐོགས་ཆེན་པོ་ཡོང་རྒྱུ་རེད་བསམས་བྱུང་། དེ་ཡང་ཁྱེད་ཚོར་གྲོགས་པོ་ངོ་ཤེས་ཡོད་པ་རེད། ཆ་འཕྲིན་བརྒྱུད་ལམ་གྱི་དྲ་རྒྱ་ཡོད་པ་རེད། དེ་བཞིན་གསར་འགྱུར་ཚགས་ཤོག་ནང་རྩོམ་ཡིག་འབྲི་རྒྱུའི་ཐབས་ཤེས་ཡོང་གི་རེད། དེ་དག་ཁྱེད་ཚོས་གནང་རོགས་གནང་ཞུ་རྒྱུ་ཡིན། ངོས་ནས་ནུབ་ཕྱོགས་པ་བོད་དོན་ཐད་ཤ་ཚ་གནང་མཁན་ཚོ་བོད་པར་ཕྱོགས་པ་ཞིག་ལ་ངོས་འཛིན་ཞུ་གི་མེད། དེ་དག་ནི་བློ་གཟུ་བོར་གནས་པ་དང་བདེན་པར་ཕྱོགས་པ་ཞིག་རེད། ཅེས་ཤོད་ཀྱིན་ཡོད། བློ་གཟུ་བོར་གནས་པའི་ཐོག་ནས་བདེན་པ་གང་དུ་འདུག་དེར་ཁྱེད་ཚོས་བསམ་བློ་བཏང་སྟེ་རྒྱབ་སྐྱོར་བྱས་པ་ཡིན་ན་ཡག་པོ་ཞེ་དྲག་འདུག ཅེས་བཀའ་སློབ་སྩལ་ཡོད།
ཡང་༸གོང་ས་མཆོག་ནས་སྔ་ལོ་ཕྱི་ཟླ་ ༣ ཚེས་ ༡༣ བར་བོད་མི་ཞི་རྒོལ་བ་ཚོར་རྣམ་པ་འདྲ་མིན་གྱི་ཐོག་ནས་རྡུང་རྡེག་དང་བཙོན་འཇུག་བྱས་ཡོད། ཚེས་ ༡༤ ཞོགས་པ་མི་མང་པོ་འཛོམས་ཏེ་ཁང་པ་མེར་སྲེག་བཏང་བའི་མཚོན་གང་བྱུང་གཏོར་སྐྱོན་གཏོང་དུས་ཉེན་རྟོག་པ་དང་དམག་མི་ཚོས་བཀག་འགོག་བྱེད་རྒྱུའི་ཚབ་ལ་ལྟད་མོ་བལྟས་ནས་སྡོད་པ་དང་། པར་ལེན་བྱས་ཏེ་དོན་དམ་འཁྲབ་སྟོན་ལྟ་བུ་ཞིག་བྱས་མི་འདུག་གམ། གནད་དོན་འདིའི་ཐད་རྒྱལ་སྤྱིའི་སྟེང་འབོད་སྐུལ་ཞུས་ཡོད་ལ་དེ་དང་ཕྱོགས་མཚུངས་རྒྱ་རིགས་བློ་མཐུན་ཚོས་ཀྱང་བློ་གཟུ་བོར་གནས་པའི་ཐོག་ནས་ཞིབ་འཇུག་ཅིག་གནང་རོགས། ཞེས་འབོད་སྐུལ་བྱེད་ཀྱི་ཡོད། དེ་རྗེས་རྒྱ་རིགས་ཤིག་གིས་ཞུས་དོན། ཕྱི་ལོ་ ༡༩༥༨ ལོར་ངའི་པ་ལགས་བོད་མིར་དྲག་གནོན་བྱེད་མཁན་གྱི་དམག་དཔུང་ནང་ཞུགས་ཏེ་བོད་མིར་རྡུང་རྡེག་གཏོང་མཁན་གྱི་གྲས་སུ་ཞུགས་ཡོད། དེ་མིན་ངའི་གྲོགས་པོ་གཉིས་ཀྱང་དམག་ནང་ཞུགས་ཏེ་བོད་མིར་དཀའ་ངལ་བཟོ་མཁན་གྱི་གྲས་སུ་ཡོད། དེ་བཞིན་ང་ཚོའི་གཞུང་ཕྱོགས་ནས་བོད་མིར་འཛིན་པའི་སྲིད་བྱུས་དེ་རྟག་ཏུ་ནོར་འཁྲུལ་ཁོ་ནའི་ཕྱོགས་སུ་ཕྱིན་པ་དེར་ང་ཚོ་མི་རབས་གསར་པ་ཚོའི་ངོས་ནས་དགོངས་དག་ཞུ་བཞིན་ཡོད། ཅེས་ཞུས་པ་དང་དེ་བཞིན་རྒྱ་རིགས་གཞན་ཚོས་ཀྱང་རྒྱ་ནག་གཞུང་ཕྱོགས་ནས་བོད་མིའི་ཐོག་འཛིན་པའི་སྲིད་བྱུས་དེ་དག་ལ་སྐྱོན་བརྗོད་དང་ཆབས་ཅིག་༸གོང་ས་༸སྐྱབས་མགོན་ཆེན་པོ་མཆོག་གིས་བཏོན་གནང་མཛད་པའི་དབུ་མའི་ལམ་ལ་རྒྱབ་སྐྱོར་ཡོད། ཅེས་ཞུས་ཡོད་པ་རེད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་ཐུགས་རྗེ་ཞུ་བ་དང་ཆབས་ཅིག་ལམ་སྟོན་བཀའ་སློབ་སྩལ་རྗེས་རྒྱ་རིགས་ཚོ་དང་ལྷན་དུ་དྲན་རྟེན་མཚོན་ཆེད་སྐུ་པར་ཡང་སྒྲོན་ཡོད་པ་བཅས།།
