༢༠༡༣ ཟླ་ ༦ ཚེས་ ༢༥ རེས་གཟའ་མིག་དམར།

༄༅། །ཉེ་ལམ་རྒྱ་གར་བྱང་ཕྱོགས་ཨུཏྟར་ཁཎྜ་ Uttarakhand.མངའ་སྡེའི་ནང་རྟེན་གཞི་བྱས་པའི་ཧིན་དུའི་གནས་ཆེན་ཁག་གིས་གཙོས་ས་ཁུལ་ཁག་གཅིག་ཏུ་ཆར་ཞོད་ཧ་ཅང་ཆེ་བས་རྐྱེན་གྱིས་ཆུ་ལོག་དང་ས་ཉིལ་བ་སོགས་ལ་རྟེན་ནས་མི་ནོར་ཕྱུགས་གསུམ་ལ་གོད་ཆག་ཚབས་ཕོག་ཡོད། དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༦ ཚེས་ ༢༤ རེས་གཟའ་ཟླ་བའི་ཉིན་རྒྱ་གར་གྱི་སྲིད་བློན་སྐུ་ཞབས་མན་མོ་ཧན་སིངྒ་ Prime Minister Manmohan Singh མཆོག་དང་འབྲེལ་ཡོད་མངའ་སྡེའི་བློན་ཆེན་སྐུ་ཞབས་ཝི་ཇེ་བྷ་ཧུ་གུ་ན་ Vijay Bahuguna མཆོག་རྣམ་གཉིས་ལ་ཐུགས་གསོའི་གསུང་འཕྲིན་ཞིག་སྩལ་ཡོད་པའི་ནང་འཁོད་དོན། ཨུཏྟར་ཁཎྜ་མངའ་སྡེའི་ནང་ཆར་ཞོད་ཧ་ཅང་ཆེ་བས་རྐྱེན་གྱིས་སྔར་བྱུང་མྱོང་མེད་པའི་ཆུ་ལོག་དང་ས་ཉིལ་བ་སོགས་ལ་རྟེན་ནས་མི་ནོར་ཕྱུགས་གསུམ་ལ་གནོད་འཚེ་ཧ་ཅང་ཆེན་པོ་ཕོག་པར་ངོས་རང་བློ་ཕམ་ཧ་ཅང་ཆེན་པོ་བྱུང། ངོས་ཀྱིས་གོད་ཆག་འོག་རྐྱེན་འདས་སུ་གྱུར་བ་རྣམས་ལ་སྨོན་ལམ་དང་རྗེས་ཤུལ་ནང་མི་སྤུན་མཆེད་ཚོར་གདུང་སེམས་མཉམ་སྐྱེ་ཞུས་པ་དང་སྦྲགས། ཏཱ་ལའི་བླ་མའི་ཐེབས་རྩ་བརྒྱུད་རྒྱ་གར་དབུས་ས་གཉིས་ཀྱི་འབྲེལ་ཡོད་ངལ་སེལ་རོགས་སྐྱོབ་ཚོགས་ཆུང་ལ་ཞལ་འདེབས་ཕྲན་བུ་འབུལ་རྒྱུ་ཡིན་ཞེས་གསུང་འཕྲིན་ནང་འཁོད་འདུག