༢༠༡༣ ཟླ་ ༦ ཚེས་ ༡༨ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༡༦ ཉིན་གྱི་ཕྱི་དྲོར་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་དོན་དྲིལ་བསྒྲགས་དང་འབྲེལ་(Tibet Gathering) བོད་དོན་འདུ་འཛོམས་ཀྱི་ལས་རིམ་ཞིག་ཚོགས་འདུག
དེ་ཡང་༸གོང་ས་མཆོག་གིས་སི་ཌི་ནིའི་ཨིན་ཊར་ཊེན་མན་ཊི་(Sydney Entertaintment Center) ཞེས་པའི་ཚོགས་ཁང་དུ་ཉིན་གྲངས་གཉིས་དང་ཕྱེད་ཀའི་ཆོས་འབྲེལ་མཇུག་སྒྲིལ་དང། དེ་བཞིན་མང་ཚོགས་ལ་ཉིན་རེའི་འཚོ་བའི་ཁྲོད་བཟང་སྤྱོད་བསྟེན་དགོས་ཚུལ་སྐོར་གྱི་བཀའ་སློབ་སྩལ་གྲུབ་མཚམས། ཨོ་སི་ཊོ་ལི་ཡ་བོད་རིགས་སྤྱི་མཐུན་ཚོགས་པ་ཁག་དང། ཐེངས་འདིའི་ཆིབས་སྒྱུར་གོ་སྒྲིག་ཚོགས་ཆུང་སོགས་ཀྱིས་གོ་སྒྲིག་གནང་དོན་བཞིན་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤ ནས་ ༦ བར་གྲོང་ཁྱེར་གྱི་ཚོགས་ཁང་ཆེན་མོ་(Town Hall) ཞེས་པའི་ས་ཚིགས་ཀྱི་ཉེ་འཁྲིས་སུ་ཡོད་པའི་ཐང་ཆེན་ཞིག་ཏུ་༸གོང་ས་མཆོག་དང། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན་སི་ཌི་ནི་གྲོང་ཁྱེར་ནང་རྟེན་གཞི་བྱས་པའི་ཡུ་ཊི་ཨེས་གཙུག་ལག་སློབ་གཉེར་ཁང་གི་རྒྱ་ནག་རིག་པའི་་མཁས་དབང་སྐུ་ཞབས་ཕེང་ཅོང་ཡི་ Dr Feng Chongyi སོགས་གནད་ཡོད་མི་སྣ་ཁག་གཅིག་གདན་ཞུས་ཀྱིས་བོད་དོན་བཀའ་སློབ་དང་གཏམ་བཤད། དེ་བཞིན་རིག་གཞུང་འཁྲབ་སྟོན་བཅས་གནང་ཡོད། ཁུལ་དེར་གནས་སྡོད་བོད་རིགས་དང་རྒྱ་རིགས་སོགས་མང་ཚོགས་ ༡༠༠༠ བརྒལ་བ་འདུ་འཛོམས་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་ཁོར་ཡུག་དང། ནང་ཆོས་དང་འབྲེལ་བའི་བོད་ཀྱི་རིག་གཞུང་སྲུང་སྐྱོབ་བྱེད་རྒྱུ་དེ་ནི་ཆབ་སྲིད་ཀྱི་རང་བཞིན་ཞིག་མིན་པར་ཚང་མས་ཁེ་ཕན་དང་འབྲེལ་བ་ཆགས་ཡོད་སྐོར་བཀའ་སློབ་སྩལ་ཡོད།
དེ་ཡང་ཐོག་མར་མགོན་པོ་གང་ཉིད་མཆོག་གིསབོད་མཐོ་སྒང་གི་ཁོར་ཡུག་གི་གལ་གནད་སྐོར་དང་འབྲེལ། བོད་ཀྱི་གཤམ་འོག་རྒྱལ་ཁབ་མང་པོའི་ཆུའི་འབྱུང་ཁུངས་ཆགས་ཡོད་པ་མ་ཟད། ཆུ་རྒྱུན་དེ་ལ་རྟེན་ནས་མི་དུང་ཕྱུར་མང་པོ་འཚོ་གནས་བྱེད་བཞིན་ཡོད་སྐོར་བཀའ་སྩལ་ཏེ་བོད་ཀྱི་ཁོར་ཡུག་གི་གལ་གནད་སྐོར་ཤེས་པར་བྱ་རྒྱུ་གལ་ཆེན་པོ་ཡིན་སྐོར་བཀའ་སློབ་སྩལ་ཡོད་པ་དང། དེ་བཞིན་བོད་བརྒྱུད་ནང་བསྟན་དང་དེ་དང་འབྲེལ་བའི་བོད་ཀྱི་ཐུན་མོང་མ་ཡིན་པའི་རིག་གཞུང་སྐོར་བཀའ་སློབ་སྩལ་སྐབས་༸གོང་ས་མཆོག་གིས་བོད་དང་རྒྱ་ནག་དབར་ཆོས་ཕྱོགས་ཀྱི་འབྲེལ་བ་ག་དུས་བྱུང་ཡོད་མེད་ངོ་སྤྲོད་དང། ལྷག་པར་དེང་སྐབས་རྒྱ་རིགས་ཚོས་བོད་བརྒྱུད་ནང་བསྟན་ལ་དོ་སྣང་ཇེ་མང་དུ་འགྲོ་བཞིན་པའི་དུས་མཚམས་འདིར་མགོན་པོ་གང་ཉིད་མཆོག་ནང་པའི་དགེ་འདུན་པ་ཞིག་དང་ཆོས་ཉམས་ལེན་བྱེད་མཁན་ཞིག་ཡིན་པའི་ཆ་ནས་ཁོང་ཚོར་ཕན་ཐོགས་སྒྲུབ་རྒྱུ་གང་ཉིད་མཆོག་གི་ལས་འགན་ཡིན་ཞེས་བཀའ་སློབ་སྩལ་ཡོད། གཞན་ཡང་མགོན་པོ་གང་ཉིད་མཆོག་གིས་དེང་སྐབས་རྒྱ་ནག་གི་ནང་དབུལ་ཕྱུག་གི་ཁྱད་པར་སོགས་དཀའ་ངལ་མང་པོ་འཕྲད་བཞིན་ཡོད་པའི་སྐབས་ལ་བྱམས་བརྩེ་དང་འཚེ་བ་མེད་པའི་བོད་ཀྱི་རིག་གཞུང་གི་ཕན་ཐོགས་གང་འཚམ་བསྒྲུབ་རྒྱུ་ཡོད་སྐོར་བཀའ་སློབ་སྩལ་ཡོད། ལྷག་པར་མགོན་པོ་གང་ཉིད་མཆོག་གིས་ད་ལྟ་བོད་མི་རྣམས་ནས་རྒྱ་ནག་གཞུང་གི་རྩ་ཁྲིམས་ནང་དུ་གསལ་བའི་མིང་དོན་མཚུངས་པའི་རང་སྲིད་རང་སྐྱོང་རྩོད་པའི་དུས་སྐབས་འདིར་རྒྱ་ནག་གཞུང་གིས་ཤོག་བུའི་སྟེང་ཙམ་མིན་པར་དོན་དངོས་ལག་བསྟར་བྱེད་རྒྱུ་གལ་ཆེ་ཡིན་སྐོར་བཀའ་སློབ་སྩལ་ཡོད། དེ་བཞིན་༸གོང་ས་མཆོག་ལ་ཉིན་ཤས་སྔོན་འདི་གའི་གསུང་ཆོས་རྭ་བའི་ཕྱི་ངོས་སུ་རྒྱ་རིགས་ཁ་ཤས་ཀྱི་སྐུ་ཉིད་ལ་ངོ་རྒོལ་ཆེད་བསླེབས་ཡོད་པའི་སྐོར་འཕྲོས་ཏེ་མགོན་པོ་གང་ཉིད་མཆོག་གིས་ངོ་རྒོལ་བྱེད་མཁན་ཚོར་དངོས་ཡོད་གནས་ཚུལ་ཤེས་པ་བྱེད་རྒྱུ་གལ་ཆེན་པོ་ཡིན་ཞིང། དེ་ལྟར་མ་བྱས་ན་སོ་སོ་རང་ཉིད་མགོ་སྐོར་བསླུ་ཁྲིད་འོག་ཚུད་ཀྱི་ཡོད་སྐོར་བཀའ་སློབ་སྩལ་ཡོད་པ་མ་ཟད། ལྷག་པར་བོད་པ་བོད་དོན་རྒྱབ་སྐྱོར་གནང་མཁན་དེ་དག་ལ་དངོས་ཡོད་གནས་སྟངས་གསལ་བཤད་གནང་རྒྱུ་གལ་ཆེན་པོ་ཡིན་པ་དང། གང་ལྟར་བོད་རྒྱའི་དཀའ་རྙོག་སེལ་བར་གཙོ་བོ་རྒྱ་རིགས་མང་ཚོགས་ལ་འབྲེལ་བ་ཡོད་པ་དང་ཁོང་ཚོའི་རྒྱབ་སྐྱོར་ལ་ཐུགས་ཡོད་རེད་ཅེས་བཀའ་སློབ་བཀའ་དྲིན་ཆེ་བ་སྩལ་ཡོད།
བོད་དོན་འདུ་འཛོམས་དེའི་ཐོག་ཆེད་དུ་གདན་ཞུ་གནང་བའི་ཡུ་ཊི་ཨེས་གཙུག་ལག་སློབ་གཉེར་ཁང་གི་རྒྱ་ནག་རིག་པའི་མཁས་དབང་ཕེང་ཅོང་ཡི་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་བཀའ་སློབ་དེ་ནི་ད་ལྟའི་དུས་སྐབས་འདིར་འཛམ་གླིང་ཁྱོན་ཡོངས་ལ་ཧ་ཅང་གལ་ཆེན་པོ་ཆགས་ཡོད་པ་མ་ཟད། ཡང་སྒོས་རྒྱ་ནག་ལ་ཆེད་གནད་འགག་ཅན་ཞིག་ཆགས་ཡོད་སྐོར་གསུངས་ཏེ་མགོན་པོ་གང་ཉིད་མཆོག་ལ་གུས་བཀུར་ཆེ་བསྟོད་ཞུས་ནས་བོད་དོན་གཏམ་བཤད་གནང་ཡོད། སྐབས་དེར་སྐུ་ཞབས་ཕེང་ཅོང་ཡི་ལགསཀྱིས་༸གོང་ས་མཆོག་གིས་ལམ་སྟོན་མཛད་པའི་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་དང་འབྱུང་འགྱུར་ཡང་ཐབས་ལམ་དེ་ལ་བརྟེན་ནས་རྒྱ་རིགས་མང་པོས་རྒྱབ་སྐྱོར་ཐོབ་རྒྱུའི་སྐོར་ཁོང་གི་ཉམས་མྱོང་དང་སྦྲགས་ཏེ་གསུང་བཤད་གནང་ཡོད་པ་མ་ཟད། ལྷག་པར་ཁོང་གིས་ད་ལྟའི་རྒྱ་ནག་དམར་ཤོག་གི་འགོ་ཁྲིད་ཚོས་བོད་ཀྱི་དཀའ་རྙོག་སེལ་ཆེད་༸གོང་ས་མཆོག་གི་རྩ་ཆེའི་ལམ་སྟོན་ལ་འཇུག་གི་མེད་པ་དེ་ནི་གོ་སྐབས་བཟང་པོ་ཞིག་འཕྲོ་བརླག་གཏོང་གི་ཡོད་སྐོར་དང། ཁོང་གི་གཟིགས་ཚུལ་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་བོད་དང་རྒྱ་ནག་ཏུ་ཆིབས་སྒྱུར་བསྐྱངས་ཐུབ་ན་སྐུ་ཉིད་ཁ་བྲལ་བ་མིན་པ་ར་སྤྲོད་བྱུང་རྒྱུ་ཡིན་སྟབས། རྒྱ་ནག་གཞུང་ལ་ཞེ་སྣང་དང་རྫུན་རྐུབ་རྡོལ་གྱི་ཡོད་སྐོར་སོགས་ཀྱི་གསུང་བཤད་གནང་ཡོད།
དེ་བཞིན་འདུ་འཛོམས་དེའི་ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་དོན་རྒྱབ་སྐྱོར་གནང་མཁན་རྣམས་ནི་དཀའ་སྡུག་འོག་ཡོད་པའི་གཞིས་ལུས་བོད་མི་རྣམས་ལ་རེ་བ་དང་སེམས་ཤུགས་སྐྱེ་བྱེད་ཀྱི་རྐྱེན་གཞི་ཞིག་ཆགས་ཡོད་སྟབས། བོད་དོན་རྒྱབ་སྐྱོར་མུ་མཐུད་དགོས་གལ་ཡིན་སྐོར་གསུང་བཤད་གནང་ཡོད་པ་མ་ཟད། གོ་སྐབས་དེ་བརྒྱུད་ཚོགས་གཙོ་མཆོག་གིས་ཕྱི་ནང་གི་མང་ཚོགས་ལ་ད་ལྟའི་བོད་ནང་གི་ཛ་དྲག་གནས་སྟངས་དང་གཞིས་ལུས་བོད་མི་ ༡༡༨ ནས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་སྟེ་ཞི་རྒོལ་གནང་ཡོད་སྐོར། དེ་བཞིན་དེང་སྐབས་བོད་ནང་སྐད་ཡིག་གི་བརྗོད་གཞི་དེ་ནི་ཆབ་སྲིད་ཀྱི་རང་བཞིན་དུ་འགྱུར་ཡོད་པ་སོགས་ངོ་སྤྲོད་གནང་ཡོད་པ་མ་ཟད། ལྷག་པར་ཚོགས་གཙོ་མཆོག་གིས་རྒྱ་ནག་གི་འགོ་ཁྲིད་རྣམས་ནས་བོད་རྒྱའི་དཀའ་རྙོག་སེལ་ཆེད་དངོས་ཡོད་གནས་ཚུལ་དང་མཐུན་པའི་སྒོ་ནས་ཐབས་ལམ་བཏོན་དགོས་པའི་འབོད་སྐུལ་གནང་ཡོད། ཕྱོགས་མཚུངས་ཚོགས་གཙོ་མཆོག་གིས་ཨོ་སི་ཊོ་ལི་ཡ་གཞུང་མང་ཡོངས་ནས་བོད་དོན་ལ་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་ཡོད་པ་བཅས།།
