༢༠༡༣ ཟླ་ ༦ ཚེས་ ༡༤ རེས་གཟའ་པ་སངས།
༄༅།། ཉེ་ལམ་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༡༡ ཚེས་ ༩ ཉིན་གྱི་ཕྱི་དྲོ་རྨ་ལྷོ་རེབ་གོང་ཁུལ་དུ་སློབ་གྲྭ་ཁག་གི་བོད་རིགས་སློབ་མ་སྟོང་ཕྲག་ཁ་ཤས་ཀྱིས་སྤེལ་བའི་སྐད་ཡིག་རང་དབང་དང་མི་རིགས་འདྲ་མཉམ་དགོས་པའི་ཞི་བའི་སྐད་འབོད་ཁྲོམ་སྐོར་བྱས་རྗེས་རྒྱ་གཞུང་ཉེན་རྟོག་པས་སློབ་ཕྲུག་མང་པོར་ཉེས་རྡུང་ཚད་མེད་བཏང་ནས་རྨས་སྐྱོན་བཟོས་ཡོད་པ་མ་ཟད། སློབ་མ་མང་པོ་འཛིན་བཟུང་དང་སློབ་སྤྱི་ཁག་གཅིག་གནས་དབྱུང་བཏང་ཡོད་པ་ལྟར། སྐབས་དེར་འཛིན་བཟུང་བྱས་པའི་རྨ་ལྷོ་ཁུལ་མི་རིགས་སློབ་འབྲིང་གི་སློབ་མ་དབང་ཕྱུག་རྡོ་རྗེ་ལགས་སྐབས་དེའི་ལས་འགུལ་སྣེ་ཁྲིད་ཀྱི་མི་སྣ་གཙོ་གྲས་ཡིན་པའི་ཉེས་མིང་འོག་འཛིན་བཟུང་བྱས་ནས་ཡུན་རིང་འདྲི་རྩད་བཀག་ཉར་ཟླ་བ་ཁ་ཤས་བྱས་རྗེས་ཉེ་ལམ་ས་གནས་རྒྱ་ནག་གི་ཁྲིམས་ཁང་ནས་མི་ལོ་ ༤ ཡི་དུས་བཀག་ཁྲིམས་བཅད་བཏང་ནས་བཙོན་འཇུག་བྱས་ཡོད་པའི་གནས་ཚུལ་ཐོན་འདུག ཁོང་ནི་རྨ་ལྷོ་ཁུལ་རྩེ་ཁོག་རྫོང་ཉིན་ཤུག་ཤང་རོང་བོ་ཞེས་པ་ནས་ཡིན་པ་དང་། འཛིན་བཟུང་སྐབས་རྨ་ལྷོ་ཁུལ་མི་རིགས་སློབ་འབྲིང་གཉིས་བའི་སློབ་མ་ཡིན་འདུག
དེ་ཡང་ལོ་དེའི་ཕྱི་ཟླ་ ༥ ནང་ཁུལ་དེའི་སློབ་གསོ་བཅོས་བསྒྱུར་ཟེར་བའི་སྲིད་བྱུས་ཐད་རེབ་གོང་རྩེ་ཁོག་རྫོང་མི་རིགས་སློབ་འབྲིང་དང་པོ་དང་། རྩེ་ཁོག་རྫོང་མི་རིགས་སློབ་འབྲིང་གཉིས་པ། རེབ་གོང་དགེ་འདུན་ཆོས་འཕེལ་སློབ་འབྲིང་། རེབ་གོང་རྫོང་མི་རིགས་སློབ་འབྲིང་། དབྱི་ཧྥུ་སློབ་འབྲིང་། དེ་བཞིན་ལག་ཤེས་ལས་རིགས་སློབ་གྲྭ་སོགས་ཀྱི་སློབ་མ་སྟོང་ཕྲག་མང་པོས་རྩེ་ཁོག་རྫོང་མི་དམངས་སྲིད་གཞུང་དང་ཉེན་རྟོག་ལས་ཁུངས། རྫོང་དྲག་ཆས་ལས་ཁུངས་སོགས་ཀྱི་མདུན་དུ། སྐད་ཡིག་རང་དབང་དང་མི་རིགས་འདྲ་མཉམ་དགོས་པའི་ཁྲོམ་སྐོར་སྐད་འབོད་ཤུགས་ཆེན་བྱས་པར་བརྟེན་སྐབས་དེར་སློབ་མ་མང་པོ་འཛིན་བཟུང་དང་། མི་ཉུང་བར་དུས་བཀག་བཙོན་འཇུག་གི་ཁྲིམས་བཅད་དང་། དེ་བཞིན་སྐབས་དེའི་རེབ་གོང་དུ་བཅའ་སྡོད་སློབ་ཆུང་གི་སློབ་སྤྱི་པདྨ་ཚེ་བརྟན་དང་། དབྱི་ཧྤུ་སློབ་འབྲིང་གི་སློབ་སྤྱི་རྡོ་རྗེ་རྒྱལ། དགེ་འདུན་ཆོས་འཕེལ་སློབ་འབྲིང་གི་སློབ་སྤྱི
ཐུན་རིན་རྫོང་སློབ་གསོ་ཁང་གི་འགོ་ཁྲིད་ལྷ་འབུམ་མཁར། གཞན་ཡང་རྩེ་ཁོག་རྫོང་ཁོངས་ཀྱི་བོད་རིགས་སློབ་སྤྱི་ཁག་བཅས་རིང་པོར་མ་སོང་བར་ལས་གནས་ནས་ཕུད་ཡོད་འདུག་པ་བཅས།།
