༢༠༡༣ ཟླ་ ༦ ཚེས་ ༡༠ རེས་གཟའ་ཟླ་བ།
༄༅། ཉེ་ལམ་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༦ ཚེས ༥ ཉིན་བོད་ཁམས་བྲག་མགོ་རྫོང་གི་དགེ་འདུན་པ་ཚེ་དབང་གྲགས་པ་ལགས་རྒྱ་གཞུང་གིས་བཙོན་ནས་གློད་བཀྲོལ་གྱི་རང་ཁྱིམ་དུ་འབྱོར་ཡོད་ཀྱང་། མནར་གཅོད་ཚད་མེད་བཏང་རྐྱེན་སྐུ་གཟུགས་ཀྱི་གནས་སྟངས་ཧ་ཅང་སྐྱོ་བོ་ཆགས་ཡོད་པ་མ་ཟད། ཁོང་གི་ཕྱག་ཡ་གཅིག་ལ་གནོད་སྐྱོན་ཆེན་པོ་བཟོས་འདུག
དེ་ཡང་ཕྱི་ལོ་ ༢༠༠༨ ཟླ་ ༦ ཚེས་ ༦ ཉིན་བྲག་མགོ་རྫོང་གི་དགེ་འདུན་པ་ཚེ་དབང་གྲགས་པ་ལགས་དང་ཁམས་རྟའུ་རྫོང་གི་དགེ་འདུན་པ་ཐུབ་བསྟན་རྒྱ་མཚོ་ལགས། ཡུལ་ཤུལ་ཁུལ་རྫ་སྟོད་རྫོང་གི་དགེ་འདུན་པ་བྱང་ཆུབ་ཉི་མ་ལགས་བཅས་ཀྱིས་ཁམས་བྲག་མགོ་རྫོང་ཐོག་ཏུ་ང་ཚོ་བོད་མི་རིགས་ཀྱི་ཆབ་དཔལ་རིག་གསུམ་ལ་རང་དབང་དགོས་པ་དང་། མི་ལོ་ལྔ་བཅུའི་རིང་ང་ཚོ་བོད་མི་རིགས་རྒྱ་མིའི་ཆབ་སྲིད་ཀྱི་འོག་བཙན་དབང་དང་འཇིགས་སྐུལ། རྡུང་རྡེག་དྲག་པོའི་འོག་བཅིངས་བསྡོམས་བྱས་ཡོད། ང་ཚོ་མི་རིགས་ལ་བཅིངས་འགྲོལ་དགོས། སོགས་ཀྱི་ཞི་རྒོལ་སྐད་འབོད་གནང་བ་མ་ཟད། བསྐྱར་དཔར་བྱས་པའི་བོད་ཀྱི་རྒྱལ་དར་མང་པོ་གཏོར་འགྲེམས་བྱེད་སྐབས། རྒྱ་གཞུང་གི་ཉེན་རྟོག་པས་ཁོང་ཚོར་ཉེས་རྡུང་ཚད་མེད་བཏང་ནས་འཛིན་བཟུང་གིས་བྲག་མགོ་རྫོང་ཐོག་ཏུ་བཀག་ཉར་བྱས་རྗེས། ཕྱི་ལོ་ ༢༠༠༨ ཟླ་ ༡༡ ཚེས་ ༥ ཉིན་དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་གིས་དགེ་འདུན་པ་བྱང་ཆུབ་ཉི་མ་ལགས་སུ་དུས་བཀག་བཙོན་འཇུག་ཁྲིམས་བཅད་ལོ་ ༣ དང་། དགེ་འདུན་པ་ཐུབ་བསྟན་རྒྱ་མཚོ་ལགས་སུ་ལོ་ ༤ ། དགེ་འདུན་པ་ཚེ་དབང་གྲགས་པ་ལགས་སུ་ལོ་ ༥ བཅས་ཀྱི་དུས་བཀག་བཙོན་འཇུག་གི་ཁྲིམས་ཆད་བཏང་སྟེ་སི་ཁྲོན་མེན་ཡཱང་བཙོན་ཁང་དུ་བཙོན་འཇུག་བྱས་ཡོད་པ་དང་། ཕྱི་ལོ་ ༢༠༡༡ ལོ་དང་ ༢༠༡༢ ལོ་བཅས་ལ་བྱང་ཆུབ་ཉི་མ་ལགས་དང་ཐུབ་བསྟན་ཉི་མ་ལགས་གཉིས་སྔ་རྗེས་སུ་དུས་བཀག་རྫོགས་ཏེ་གློད་བཀྲོལ་དང་། དགེ་འདུན་པ་ཚེ་དབང་གྲགས་པ་ལགས་མནར་གཅོད་འོག་ད་བར་བཞུགས་དགོས་བྱུང་འདུག་པ་བཅས།།
