༢༠༡༣ ཟླ་ ༦ ཚེས་ ༧ རེས་གཟའ་པ་སངས།
༄༅། །ཉེ་ལམ་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༥ ཚེས་ ༢༠ ཉིན་རྒྱ་གཞུང་ཉེན་རྟོག་པས་མགོ་ལོག་ཁུལ་པད་མ་རྫོང་ནས་ཡིན་པ་བོད་མི་ཝ་ཤུལ་རྡོར་ཕྲུག་ལགས་སུ་སི་ཁྲོན་ཞིང་ཆེན་གྱི་ཁྲིན་ཏུའུ་ཡི་ཁྲིམས་ཁང་ཞིག་ནས་མི་ལོ་ ༡༠ ཡི་དུས་བཀག་བཙོན་འཇུག་ཁྲིམས་བཅད་བཏང་འདུག དེ་ཡང་ཕྱི་ལོ་ ༢༠༡༢ ཟླ་ ༡༢ ཚེས་ ༣ ཉིན་རྡོར་ཕྲུག་ལགས་སུ་པདྨ་རྫོང་སེ་ལེ་ཐང་ཡུལ་ཚོའི་པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས་རང་ལུས་མེར་སྲེག་བཏང་བའི་ཉིན་ཁོང་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་དང་། དེ་ནས་བཟུང་ཁོང་གར་ཡོད་ཅི་བྱུང་གི་གནས་ཚུལ་ཤེས་རྟོགས་མེད་པར་ཡུན་རིང་ལྷག་ཡོད་ཀྱང་། ཕྱི་ཟླ་ ༥ ཚེས་ ༢༠ ཉིན་སི་ཁྲོན་ཞིང་ཆེན་གྱི་ཁྲིན་ཏུའུ་ཡི་ཁྲིམས་ཁང་ཞིག་ནས་མགོ་ལོག་པད་ནག་དགོན་ཀ་དག་སྤྲོས་བྲལ་གླིང་གི་གྲྭ་བློ་བཟང་དགེ་འདུན་ལགས་ཀྱིས་རང་ལུས་མེར་སྲེག་གི་ལས་འགུལ་སྐབས་ཁོང་གིས་ཉེན་རྟོག་པས་སྐུ་ཕུང་བཙན་འཁྱེར་བྱེད་པར་བཀག་འགོག་དང་། ཕྱི་ལོ་ ༢༠༠༨ དང་ ༢༠༠༩ ལོའི་བོད་མིའི་ཞི་རྒོལ་ནང་མཉམ་ཞུགས་བྱས་པ་བཅས་ཀྱི་ཉེས་མིང་འོག་རྡོ་ཕྲུག་ལགས་སུ་ལོ་ ༡༠ ཡི་ཁྲིམས་བཅད་བཏང་འདུག ཝ་ཤུལ་རྡོར་ཕྲུག་ལགས་རང་ལོ ༥༧ ཡིན་ཞིང་། ཁོང་གི་ཁྱིམ་ལ་རང་ལོ་ ༧༠ ཡན་གྱི་ཕ་མ་གཉིས་དང་བཟའ་ཟླ་སྐར་མ་སྐྱིད། ཁོང་གཉིས་རང་ལོ་ ༡༩ སོན་པའི་བུ་མོ་སྐལ་བཟང་སྒྲོལ་མ་དང་། རང་ལོ་ ༡༣ ལ་སོན་པའི་བུ་དཀོན་མཆོག་རྡོ་རྗེ་བཅས་ཡོད་པ་མ་ཟད། ཁོང་ཁྱིམ་མི་རྣམས་མགོ་ལོག་པད་མ་རྫོང་དུ་གནས་སྡོད་ཀྱིས་ཞིང་ལས་གཉེར་ཏེ་འཚོ་བ་སྐྱེལ་བཞིན་ཡོད་ལ། རྒྱུན་དུ་སྡེ་བའི་ནང་རྩོད་རྙོག་རིགས་བྱུང་སྐབས་རྡོར་ཕྲུག་ལགས་ཀྱིས་བདེན་དཔང་བྱེད་པ་སོགས་སྤྱི་ཚོགས་ཀྱིས་བརྩི་མཐོང་འཇོག་ས་ཞིག་ཡིན་འདུག
