༢༠༡༣ ཟླ་ ༦ ཚེས་ ༧ རེས་གཟའ་པ་སངས།
༄༅། །ཨ་རིའི་གྲོས་ཚོགས་ཀྱི་གནད་ཡོད་འཐུས་མི་ཁག་གཅིག་གིས་ཨ་རིའི་སྲིད་འཛིན་མཆོག་ལ་བོད་ནང་གི་གནས་སྟངས་ཡར་རྒྱས་ཡོང་ཆེད་དོན་ཕན་ལྡན་པའི་སྲིད་བྱུས་ཤིག་ལག་བསྟར་དགོས་སྐོར་གསུངས་ཡོད།
དེ་ཡང་ཕྱི་ལོ་ ༢༠༡༣ ཟླ་ ༦ ཚེས་ ༥ ཉིན་བོད་ནང་གི་འགྲོ་བ་མིའི་ཐོབ་ཐང་སྐོར་ལ་ཉན་ཞིབ་ཚོགས་སྐབས་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་མི་ཕེང་ར་ཝུ་མཆོག་གིས་གསུང་དོན། རྒྱ་ནག་གཞུང་ནས་བོད་ནང་གི་བོད་མིའི་ཆོས་དང་རིག་གཞུང་རྩ་བརླག་གཏོང་རྒྱུའི་སྲིད་བྱུས་བཟུང་དང་འཛིན་བཞིན་པར་ཨ་རིའི་གཞུང་ཕྱོགས་ནས་གནས་སྟངས་དེ་ལས་སྐྱོབ་ཐབས་སུ་སྔར་རྒྱུན་ལྟར་མ་ཡིན་པར་དོན་ཕན་ལྡན་པའི་སྲིད་བྱུས་ཤིག་ལག་བསྟར་གནང་དགོས། ཨ་རིའི་གཞུང་ནས་བོད་ཀྱི་གནད་དོན་ལ་ལྟ་ཕྱོགས་གསར་པ་ཞིག་བལྟ་ཐུབ་ཐབས་སུ་ཕྱི་སྲིད་ལས་ཁུངས་ནས་བོད་དོན་དམིགས་བསལ་འབྲེལ་མཐུད་ཀྱི་སྐུ་ཚབ་བསྐོ་གཞག་ཐོག་བོད་མིའི་སྤྱི་ཚོགས་ལ་གོ་བསྡུར་གནང་དགོས་སྐོར་གསུངས་འདུག
དེ་བཞིན་ཨ་རིའི་མང་གཙོའི་ཚོགས་པའི་འཐུས་མི་དང་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་མེཀ་གྷན་ཝེན་མཆོག་གིས་གསུང་དོན། ཨ་རིའི་གཞུང་ཕྱོགས་ནས་བོད་ཀྱི་གནད་དོན་དང་འབྲེལ་བའི་ཐད་སྲིད་བྱུས་ནུས་པ་ཐོན་པའི་ལག་བསྟར་བྱེད་ཐུབ་ཀྱི་མི་འདུག་པའི་སེམས་ཚོར་ཡོང་བཞིན་འདུག ཨ་རིའི་གཞུང་ཕྱོགས་ནས་བོད་ཀྱི་ཆབ་སྲིད་དཀའ་ངལ་སེལ་ཐབས་ཆེད་རྣམ་དཔྱོད་ལྡན་པའི་སྲིད་བྱུས་ཤིག་ལག་བསྟར་བྱེད་དགོས་པ་མ་ཟད། དམིགས་བསལ་ཨ་རིའི་ངོས་ནས་བོད་མིའི་རྩ་དོན་ལ་གདུང་སེམས་མཉམ་སྐྱེ་ཡོད་པའི་མཐུན་གྲོགས་རྒྱལ་ཁབ་གཞན་དང་མཉམ་རུབ་ཐོག་བོད་ཀྱི་རྩ་དོན་ལ་ཕན་པའི་ནུས་པ་མཉམ་སྤུངས་ཐུབ་པའི་འགན་ཁུར་ལེན་དགོས་སྐོར་གསུངས་འདུག་པ་བཅས། །
