༢༠༡༣ ཟླ་ ༥ ཚེས་ ༢༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༩ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོང་ཁྱེར་ནིའུ་ཨོར་ལེན་ཌིའི་ New Orleans ནང་མཛད་འཕྲིན་ཁག་ཡོངས་སུ་ལེགས་གྲུབ་ཀྱིས་ཀེན་ཊ་ཀིའི་ Kentucky མངའ་སྡེའི་གྲོང་ཁྱེར་ལུ་ཝི་སི་ཝེལ་ལིར་ Louisville ༸ཞབས་སོར་འཁོད་མཚམས། གནམ་ཐང་དུ་ལུ་ཡི་སི་ཝིལ་ལེ་གྲོང་སྡེའི་སྤྱི་ཁྱབ་པ་སྐུ་ཞབས་གེ་རེཀ་ཕི་ཤར་ Mayor Greg Fischer མཆོག་དང་ཁོང་གི་སྐུ་ཟླ་མཆོག དེ་བཞིན་འབྲས་སྤུངས་ཁྲི་པ་མཁན་ཟུར་བློ་བཟང་བསྟན་པ་མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། ༸གོང་ས་མཆོག་སྟོན་འཁོར་དང་བཅས་གནམ་ཐང་ནས་ཐད་ཀར་འབྲས་སྤུངས་སྒོ་མང་གྲྭ་ཚང་གི་ཆོས་ཚོགས་སུ་ཆིབས་སྒྱུར་བསྐྱངས་ཏེ་༸ཞབས་སོར་འཁོད་བསྟུན། བོད་ཕྲུག་ན་གཞོན་ཁག་གཅིག་གིས་བོད་ལུགས་གྲོ་སོ་ཕྱེ་མར་འདེགས་འབུལ་ཞུས་ཏེ་ཕེབས་བསུ་གཟབ་རྒྱས་ཞུས།
དེ་རྗེས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་མཆོག་གིས་ཆོས་ཚོགས་ཀྱི་མཆོད་ཁང་གསར་པ་ལེགས་གྲུབ་བྱུང་བར་ཐུགས་སྨོན་རབ་གནས་བཀའ་དྲིན་བསྐྱངས་རྗེས་དེར་འདུས་མང་ཚོགས་རྣམས་ལ་བཀའ་སློབ་སྩལ་དོན། འདིར་འབྲས་སྤུངས་སྒོ་མང་གྲྭ་ཚང་གི་རྟེན་གཞི་གསར་འཛུགས་ཐུབ་པ་ཧ་ཅང་ཡག་པོ་བྱུང་འདུག སྔ་ལོ་ངོས་ལ་འདིར་ཡོང་རོགས་བརྗོད་པ་ལྟར་ད་ཐེངས་འདིར་དངོས་སུ་བཅར་ཏེ་ལས་འགན་ཆ་ཚང་ཞུ་ཐུབ་པ་བྱུང་སོང། འདིར་འབྲས་སྤུངས་ཁྲི་པ་སྒོ་མང་མཁན་ཟུར་མཆོག་ཀྱང་ཕེབས་ཐུབ་པ་ཡག་པོ་ཞེ་དྲག་བྱུང་བཞག འཛམ་གླིང་ས་གནས་འདྲ་མིན་ནང་ཆོས་ལུགས་འདྲ་མིན་ཐོག་ཉམས་ལེན་བྱེད་མཁན་ཡོད། འདི་ག་ཨ་རི་ལྟ་བུར་མཚོན་ན། བྱུང་རབས་ཐོག་ཡུ་རོབ་དང་འབྲེལ་བ་ཡོད་པར་བརྟེན། ཆོས་ལུགས་གཙོ་ཆེ་བ་ཇུ་དོ་ཁི་རི་སི་ཊེན་ Judeo-Christian ཡིན། འོན་ཀྱང་གོ་ལ་སྤྱིའི་དཔལ་འབྱོར་ཡར་རྒྱས་ཕྱིན་པ་དང་ལྷག་པར་ཡུལ་སྐོར་སྤྲོ་འཆམ་དར་གསོ་ཧ་ཅང་བྱུང་བར་བརྟེན། ཨེ་ཤི་ཡའི་ནང་ཡེ་ཤུའི་ཆོས་ལུགས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པ་མ་ཟད། ཡེ་ཤུ་དར་སའི་ས་ཁུལ་ནང་ཧིན་དུ་དང་ནང་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད། དེའི་ནང་ནས་ཤེས་ལྡན་མི་སྣའི་ཁྲོད་ནང་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་པའི་རྒྱུ་མཚན་ནི་གཙོ་བོ་ནི་ནང་ཆོས་དེ་བཞིན་དད་པ་ཙམ་ལ་ཆ་མ་བཞག་པར། རིག་པས་བརྡར་ཤ་བཅད་ནས་གཏན་ལ་ཕབ་པའི་ཆོས་ཤིག་ཡིན་པ་དེས་ཡིན། སྟོན་པ་རང་ཉིད་ཀྱིས་རྗེས་འཇུག་འདུལ་བྱ་ཚོར་སྟོན་པའི་བཀའ་ལ་ལེགས་པར་རྟགས་དགོས་པ་བཀའ་གནང་ཡོད། ཅེས་སོགས་ཀྱི་བཀའ་སློབ་སྩལ།
ཉིན་དགུང་ལྗགས་སྨིན་གྲུབ་བསྟུན་ཀེན་ཊ་ཀིའི་ཡམ་ཚོགས་ཁང་ KFC Yum Center དུ་ཆིབས་སྒྱུར་བསྐྱངས་ཏེ། བྱམས་བརྩེའི་ཉམས་ལེན་སྐོར་བཀའ་སློབ་སྩལ། སྐབས་དེར་ཐོག་མར་ལུ་ཡི་སི་ཝིལ་ལེ་གྲོང་སྡེའི་སྤྱི་ཁྱབ་པ་སྐུ་ཞབས་གེ་རེཀ་ཕི་ཤར་ Mayor Greg Fischer མཆོག་གིས་སྡིངས་ཆའི་སྟེང་འཁོད་པའི་ཆོས་ལུགས་འདྲ་མིན་གྱི་སྐུ་ཚབ་འཐུས་མི་རྣམས་དང་མང་ཚོགས་ ༡༤༠༠༠ བརྒལ་བར་༸གོང་ས་༸སྐྱབས་མགོན་ཆེན་པོ་མཆོག་ནི་འཚེ་མེད་ཞི་བའི་ལྟ་གྲུབ་གཙོ་འཛིན་མཛད་མཁན་གྱི་གང་ཟག་ཐུགས་གཤིས་ཧ་ཅང་འཇམ་པོ་དང་། མཐོང་སྣང་མི་མཐུན་པ་མེད་པ། རྟག་ཏུ་ཞི་བའི་མཛུམ་མདངས་ཀྱི་འོས་སྣང་མངོན་པར་འཕྲོ་བའི་སྐྱེ་བོ་ཕུལ་བྱུང་ཞིག་ཡིན་པ་ངོ་སྤྲོད་གནང། དེ་རྗེས་༸གོང་ས་མཆོག་གིས་མང་ཚོགས་རྣམས་ལ་བཀའ་སློབ་སྩལ་དོན།
སྐུར་འོས་ཆོས་ལུགས་འདྲ་མིན་གྱི་སྐུ་ཚབ་འཐུས་མི་རྣམས་དང་གྲོང་ཁྱེར་སྤྱི་ཁྱབ་པ་མཆོག དེ་བཞིན་ཆོས་གྲོགས་ཕོ་མོ་རྣམ་པར། ངོས་རང་ས་གནས་འདིར་སླར་ཡང་བཅར་རྒྱུ་བྱུང་བར་ཧ་ཅང་དགའ་པོ་བྱུང། དེ་སྔ་ངོས་རང་ས་གནས་འདིར་རྟེན་གཞི་བྱས་པའི་ངོས་ཀྱི་ཆོས་གྲོགས་སྐུ་ཞབས་ཐོ་མ་སི་མར་ཊིན་Thomas Merton མཆོག་གི་ཡེ་ཤུའི་མཆོད་ཁང་དུ་གནས་མཇལ་ཡོང་སྟེ་ཁོང་གི་སྤུར་སྒམ་ཐོག་མཇལ་དར་འབུལ་རྒྱུ་བྱུང། ཁོང་གིས་ཡེ་ཤུའི་དགོན་སྡེ་ཁག་གི་ཆོས་ཉམས་ལེན་གནང་ཕྱོགས་དང་ནང་པའི་དགོན་སྡེ་ཁག་གི་ནང་ནང་ཆོས་ཉམས་ལན་ཇི་ལྟར་བྱེད་མིན་ཐད་ཕན་ཚུན་གོ་རྡ་སྤྲད་དེ། ཆོས་ལུགས་གཉིས་ཀྱི་རྗེས་འབྲང་པ་ཕན་ཚུན་གཅིག་གིས་གཅིག་ལ་དང་བ་འབྲེན་པའི་ཐོག་ནས་མཐུན་སྒྲིལ་གོང་མཐོར་གཏོང་རྒྱུར་རླབས་ཆེན་གྱི་བྱས་རྗེས་བཞག་གནང་ཡོད། ད་ལྟ་ཁོང་རང་འདིར་དངོས་སུ་སྐུ་འཚོ་བཞུགས་མེད་ཀྱང་ཁོང་གི་སྙིང་སྟོབས་དང་ལྷག་བསམ། རེ་བ། ཆོད་སེམས་དེ་དག་མུ་མཐུད་གནས་ཡོད། ཅེས་སོགས་ཀྱི་བཀའ་སློབ་སྩལ།
ཕྱོགས་མཚུངས་ཀེན་ཊ་ཀིའི་མངའ་སྡེའི་གྲོང་ཁྱེར་ལུ་ཝི་སི་ཝེལ་ལིའི་གྲོང་ཁྱེར་ལས་ཁུངས་ནས་བྱམས་བརྩེའི་བཅའ་ཁྲིམས། ཞེས་པ་ཞིག་གཏན་འབེབས་ཐོག་བྱམས་བརྩེ་དངོས་སུ་སྤྱི་ཚོགས་ཁྲོད་ལག་བསྟར་བྱ་རྒྱུའི་ལས་གཞི་ཞིག་བང་སྒྲིག་པ་དེར་༸གོང་ས་མཆོག་གིས་བསྔགས་བརྗོད་མཛད་པ་དང་སྦྲགས། ལས་གཞི་དེ་རིགས་རིམ་བཞིན་རྒྱ་སྐྱེད་དེ་གོ་ལ་སྤྱི་ཡོངས་ལ་ཁྱབ་ཐབས་བྱ་རྒྱུ་ཧ་ཅང་གལ་ཆེ་ཡིན་སྐོར་བཀའ་སློབ་སྩལ་རྗེས། མང་ཚོགས་ཀྱི་དྲི་བ་ཁག་གཅིག་ལ་བཀའ་ལན་སྩལ།
