༢༠༡༣ ཟླ་ ༥ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༥ ནས་ ༡༧ བར་ (SOIR-IM) ཞེས་པའི་རོགས་ཚོགས་ཀྱིས་མགྲོན་འབོད་ལྟར་སྲིད་སྐྱོང་བློ་བཟང་སེང་གེ་མཆོག་སུ་ཝེ་ཌེན་ (Sweden) ཁུལ་དུ་ཕེབས་ཡོད། དེ་ཡང་སྲིད་སྐྱོང་མཆོག་ཁུལ་དེའི་རྒྱལ་ས་སི་ཊོཀ་ཧོམ་ (Stockholm) གྱི་ཨར་ལན་ཌ་གནམ་ཐང་དུ་ཕེབས་འབྱོར་སྐབས་གོང་ཞུས་རོགས་ཚོགས་ཀྱི་འགན་འཛིན་ལྷན་ཚོགས་ཀྱི་དྲུང་ཆེ་སྐུ་ཞབས་བྷོ་པོལ་སོན་ Mr. Bo Paulsson ལགས་དང་། ལྷོ་ཨེ་ཤི་ཡ་ཚན་པའི་འགན་འཛིན་ལྕམ་སྐུ་སོ་ཕི་ཡོ་ཨོ་ལོ་སོན་ (Ms Sofio Olsson) ལགས། དེ་བཞིན་སུ་ཝེ་ཌེན་ཁུལ་གནས་སྡོད་བོད་རིགས་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད།
ཕྱི་ཚེས་ ༡༥ ཉིན་གྱི་ཕྱི་དྲོ་སྲིད་སྐྱོང་མཆོག་ལ་སུ་ཝེ་ཌེན་བོད་རིགས་ཚོགས་པ་དང་སུ་ཝེ་ཌེན་བོད་དོན་རྒྱབ་སྐྱོར་ཚོགས་པས་ཕེབས་བསུའི་སྣེ་ལེན་ཞུས་པ་དང་ལྷན་གསོལ་ཚིགས་གོ་སྒྲིག་གི་འདུ་འཛོམས་ཐོག་སྲིད་སྐྱོང་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་དང། ད་ལྟའི་བོད་ནང་གི་ཛ་དྲག་གནས་སྟངས་སྐོར་གསུང་བཤད་གནང་བ་མ་ཟད། དེར་འདུས་མང་ཚོགས་ཀྱི་དྲི་བར་ལན་འདེབས་ཀྱང་གནང་ཡོད། དེ་བཞིན་ཕྱི་ཚེས་ ༡༦ ཉིན་སུ་ཝེ་ཌེན་ཕྱི་སྲིད་ལས་དོན་ལྷན་ཁང་གི་ཨེ་ཤི་ཡའི་ལས་དོན་ཚན་པའི་མཐོ་རིམ་དཔོན་རིགས་ཁག་གཅིག་དང་ལྷན་ཞོགས་ཟས་ཀྱིས་ཚོགས་འདུའི་ཐོག་སྲིད་སྐྱོང་མཆོག་གིས་བོད་ནང་གི་ཛ་དྲག་གི་གནས་སྟངས་ངོ་སྤྲོད་གནང་བ་དང་འབྲེལ། བོད་ཀྱི་གནད་དོན་དེ་བཞིན་འཚེ་མེད་ཞི་བར་གཞི་བཅོལ་བའི་གྲོས་མོལ་གྱི་ལམ་ནས་སེལ་རྒྱུ་གལ་ཆེན་པོ་ཡིན་སྐོར་འགྲེལ་བརྗོད་གནང་ཡོད།
གཞན་ཡང་སྲིད་སྐྱོང་མཆོག་གིས་སུ་ཝེ་ཌེ་གྱི་བརྙན་འཕྲིན་དང། རླུང་འཕྲིན། ཚགས་ཤོག་ལས་ཁང་མང་དག་གཅིག་གི་བཅའ་འདྲིར་དང་ལེན་གནང་བ་མ་ཟད། འདི་ལོའི་ཕྱི་ཟླ་ ༨ པའི་ནང་ཨ་ཡེ་ཨེམ་ IM རོགས་ཚོགས་ཀྱི་ལྷོ་ཨེ་ཤི་ཡ་ཚན་པའི་སྤྱི་ཁྱབ་དྲུང་ཆེ་གསར་པའི་ཐུགས་འགན་བཞེས་མཁན་ལྕམ་ ཨན་སི་ཝེན་སན་ Ann Svensen ལགས་སུ་སྲིད་སྐྱོང་མཆོག་གིས་འཚམས་འདྲི་ཞུས་པ་དང་ཆབས་ཅིག འབྱུང་འགྱུར་ལས་དོན་གང་སྤྱིའི་ཐད་མཐུན་འགྱུར་དང་ཕྱ་གྲུ་མཉམ་འདེགས་གནང་རྒྱུའི་ཁས་ལེན་ཡང་ཞུས་ཡོད།
དེ་བཞིན་སྲིད་སྐྱོང་མཆོག་གིས་སུ་ཝེ་ཌེན་གྲོས་ཚོགས་ཀྱི་ཆབ་སྲིད་ཚོགས་པ་ཁག་ལྔའི་འཐུས་མི་རྣམས་དང་ལྷན་མཇལ་འཕྲད་གནང་བ་མ་ཟད། བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་བ་དང་འབྲེལ། དེ་གའི་གྲོས་ཚོགས་ཐོག་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་ཡོང་བའི་འབོད་སྐུལ་ཡང་ཞུས་ཡོད། ཡང་སྲིད་སྐྱོང་མཆོག་གིས་ཁོང་རྣམས་ལ་ལོ་ལྟར་ཕྱི་ཟླ་ ༥ ཚེས་ ༡༧ ཉིན་རྒྱལ་སྤྱིའི་བོད་དོན་གདུང་སེམས་མཉམ་སྐྱེའི་ཉིན་མོ་སྲུང་བརྩི་ཞུས་པར་ཐུགས་རྗེ་ཆེ་ཞུས་པ་དང་ལྷན་བོད་དོན་ཐོག་མུ་མཐུད་རྒྱབ་སྐྱོར་ཡོང་བའི་འབོད་སྐུལ་ཡང་ཞུས་ཡོད། དེ་ཉིན་ཕྱི་དྲོར་སྲིད་སྐྱོང་མཆོག་གིས་སུ་ཝེ་ཌེན་ཨབ་ས་ལཱ་གཙུག་ལག་སློབ་གྲྭའི་ Uppsala University ནང་བཙན་བྱོལ་ནང་གི་མང་གཙོ། ཞེས་པའི་བརྗོད་གཞིའི་ཐོག་གསུང་བཤད་གནང་བ་མ་ཟད། སློབ་གཉེར་ཁང་དེའི་དགེ་ལས་སློབ་ཕྲུག་རྣམས་ཀྱི་དྲི་བར་ལན་འདེབས་ཀྱང་གནང་ཡོད།
ཕྱི་ཚེས་ ༡༧ ཉིན་སྲིད་སྐྱོང་མཆོག་ལ་སུ་ཝེ་ཌེན་གྱི་ལྷོ་ཕྱོགས་སུ་ཡོད་པའི་ཨ་ཡི་ཨེམ་ SOIR-IM རོགས་ཚོགས་ཀྱི་ལས་ཁུངས་ཨ་མར་གདན་ཞུས་ལྟར་ཆེད་ཕེབས་ཀྱིས་ཚོགས་པ་དེས་ད་བར་བོད་པའི་སྤྱི་ཚོགས་ལ་དཔལ་འབྱོར་གྱི་རོགས་སྐྱོར་དང། བོད་དོན་འཐབ་རྩོད་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། འབྱུང་འགྱུར་ལས་དོན་བྱེད་ཕྱོགས་ཐོག་བགྲོ་གླེང་ལྷུག་པོ་བྱུང་ཡོད། གཞན་ཡང་དེ་ཉིན་ཕྱེད་ཡོལ་ཚོགས་པ་དེའི་ཚོགས་མི་ ༨༠ ཙམ་ལ་བཙན་བྱོལ་ནང་གི་མང་གཙོ་དང་ད་ལྟའི་བོད་ནང་གི་གནས་སྟངས་སྐོར་གསུང་བཤད་དང་དྲི་བ་དྲིས་ལན་ཡང་གནང་ཡོད།།
