༢༠༡༣ ཟླ་ ༥ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༡༨ ཉིན་ཨ་རིའི་ལོ་སི་ཨ་ན་མངའ་སྡེའི་གྲོང་ཁྱེར་ནིའུ་ཨོར་ལི་ཡན་སི་ (New Orleans) ནང་གི་ཊུ་ལེན་ (Tulane) གཙུག་ལག་སློབ་གྲྭ་ཆེན་མོའི་བསླབ་པ་ཐར་སོན་པའི་སློབ་ཕྲུག་རྣམས་ལ་མི་ཚེ་དོན་དང་ལྡན་པ་ཞིག་དགོས་པའི་སྐོར་བཀའ་སློབ་སྩལ་ཡོད།
དེ་ཡང་ཐོག་མར་ཊུ་ལེན་གཙུག་ལག་སློབ་གྲྭ་ཆེན་མོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་ཕྱག་འཁྱེར་འབུལ་ལམ་ཞུས་རྗེས། བསླབ་པ་མཐར་སོན་གྱི་མཛད་སྒོར་༸གོང་ས་མཆོག་གིས་བཀའ་སློབ་སྩལ་དོན། མི་ཚང་མས་མི་ཚེ་སྐྱིད་པོ་ཞིག་ཡོང་བ་དང། ནང་མི་དང་སྤྱི་ཚོགས་སྐྱིད་པོ་འདོད་མཁན་ཡིན་རུང། དོན་དམ་པའི་དགའ་པོ་དང་སྐྱིད་པོ་དེ་ང་ཚོའི་སེམས་འཚོར་ལ་བརྟེན་ནས་ཡོང་གི་ཡོད་པ་ལས་དངུལ་ཡོད་མེད་ལ་རག་ལུས་མེད། དེར་བརྟེན་ཁྱེད་རང་ཚོ་གཞོན་སྐྱེས་རྣམས་ནས་ནང་སེམས་དང་བཟང་སྤྱོད་སོགས་ལ་དོ་སྣང་མང་ཙམ་བྱེད་དགོས་པ་དང། གལ་ཏེ་དེ་ལྟར་བྱས་ཚེ་རང་གི་སྦྱོང་བརྡར་བྱས་པའི་ཤེས་ཡོན་རྣམས་དོན་ཕན་ལྡན་པ་ཞིག་ཡོང་གི་རེད། ཅེས་བཀའ་སློབ་སྩལ་བ་དང་འབྲེལ།
༸གོང་ས་མཆོག་གིས་བསླབ་པ་མཐར་སོན་པའི་སློབ་ཕྲུག་ཚོ་རང་གི་མི་ཚེ་དངོས་གཞི་དེ་འགོ་འཛུགས་བྱེད་ཀྱི་ཡོད་པས། མི་ཚེ་འདིར་གཅིག་བྱས་ན་རྙོག་གྲ་ཚ་པོ་དང་དཀའ་ངལ་ཡང་མང་བ་ཡོང་སྲིད་པར་བརྟེན། དཀའ་ངལ་འཕྲད་སྐབས་སེམས་ཤུགས་མ་ཆག་པར་རང་གིས་རང་ལ་ཡིད་ཆེས་བྱེད་དགོས་པ་དང། ཕུག་རྒྱང་རིང་པོར་རེ་བ་བཟང་པོ་ཡོད་པ་དེ་ངེས་པར་དུ་བདག་སྲུང་དགོས་སྐོར་བཀའ་སློབ་སྩལ་ཡོད་པ་མ་ཟད། མགོན་པོ་གང་ཉིད་མཆོག་གིས་སློབ་ཕྲུག་རྣམས་ནས་རང་དོན་ཁོ་ནར་མ་བསམ་པར་གནམ་གཤིས་འགྱུར་ལྡོག་དང། མཁའ་རླུང་སྦག་རྩོག་སོགས་རྒྱལ་སྤྱིའི་དཀའ་རྙོག་སོགས་སེལ་ཐབས་བྱེད་དགོས་པ་དང། ང་ཚོས་རེ་བ་ཆེན་པོ་བྱེད་ས་དེ་ཁྱེད་རང་ཚོ་ཡིན་སྟབས། ཁྱེད་རྣམས་ཀྱི་དུས་རབས་ ༢༡ པ་དེ་ཞི་བདེའི་དུས་རབས་དང་དགའ་ཞིང་སྐྱིད་པའི་དུས་རབས་ཇི་ལྟར་བཟོ་དགོས་མིན་བསམ་བློ་ནན་པོ་གཏོང་དགོས་པའི་བཀའ་སློབ་ཀྱང་ཕེབས་ཡོད།
མགོན་པོ་གང་ཉིད་མཆོག་ཕྱི་ཚེས་ ༡༩ ཉིན་ཨ་རིའི་མངའ་སྡེ་ཀན་ཊ་ཀི་Kentucky ཡི་ལུ་ཝི་ལི་གྲོང་ཁྱེར་ནང་གི་ཡམ་ (Yum Center) ཞེས་པའི་ཚོགས་ཁང་ཆེན་མོའི་ནང་མང་ཚོགས་ལ་ཆོས་ལུགས་འདྲ་མིན་ཕན་ཚུན་གོ་རྟོགས་སྤེལ་རེ་གནང་སྟེ་ཕན་ཚུལ་གུས་བརྩི་གནང་རྒྱུ་ཧ་ཅང་གལ་ཆེན་པོ་ཡིན་སྐོར་བཀའ་སློབ་སྩལ་ཡོད། དེ་བཞིན་ཕྱི་ཚེས་ ༢༠ ཉིན་གོང་ཞུས་ཚོགས་ཁང་དེའི་ནང་དད་ལྡན་ཆོས་ཞུ་
བ་རྣམས་ལ་བྱང་ཆུབ་ལམ་སྒྲོན་གྱི་བཀའ་ཆོས་དང་། ཕྱི་ཚེས་ ༢༡ ཉིན་(Kentucky Center for the Arts) ཞེས་པའི་ཚོགས་ཁང་ཆེན་མོའི་ནང་སློབ་ཕྲུག་རྣམས་ལ་བཀའ་སློབ་སྩལ་རྒྱུ་ཡིན་འདུག་པ་བཅས།།
