༢༠༡༣ ཟླ་ ༥ ཚེས་ ༡༧ རེས་གཟའ་པ་སངས།
༄༅། །རྒྱ་ནག་གཞུང་གིས་འཛུགས་སྐྲུན་ཡར་རྒྱས་ཀྱི་ལས་གཞིར་ཁ་གཡར་ནས་ལྷ་སའི་ཇོ་ཁང་གི་བར་སྐོར་གཡས་གཡོན་དུ། ལོ་ངོ་སྟོང་ཕྲག་རིང་ནས་བོད་མིའི་ཐུན་མིན་རིག་གནས་སྤྱི་དང་། ལྷག་པར་ཆོས་དད་ཀྱི་རྣམ་པ་དང་འབྲེལ་བ་ཤུགས་ཆེ་ཡོད་པའི་ལོ་རྒྱུས་རང་བཞིན་ལྡན་པའི་སྡོད་ཁང་རྣམས་ཤུལ་མེད་གཏོང་རྒྱུའི་ཉེན་ཁར་བོད་མིའི་སྒྲིག་འཛུགས་ཀྱིས་སེམས་ཚབ་ཧ་ཅང་ཆེན་པོ་ཡོད་པའི་གསར་འགོད་གསལ་བསྒྲགས་སྤེལ་བའི་ནང་འཁོད་དོན།
དེང་སྐབས་བོད་ཀྱི་རྒྱལ་ས་ལྷ་སའི་ཇོ་ཁང་གི་བར་སྐོར་ཁུལ་དུ་ཡར་རྒྱས་འཛུགས་སྐྲུན་ལ་ཁ་གཡར་ཏེ་ཨར་རྒྱག་ལས་གཞི་འགྲོ་བཞིན་པ་དེར་ང་ཚོར་སེམས་ཚབས་ཧ་ཅང་ཆེན་པོ་ཡོད། འཛུགས་བསྐྲུན་གྱི་ལས་གཞི་དེར་རྒྱ་ནག་གཞུང་གིས་ཨ་སྒོར་ས་ཡ་ ༡༩༦ བཏང་སྟེ་ཡར་རྒྱས་གཏོང་རྒྱུ་ཡིན་ཚུལ་བརྗོད་ཀྱང། ཉེ་ལམ་གནས་ཚུལ་ཐོན་གསལ་ལྟར་ན། ལོ་ངོ་སྟོང་ཕྲག་རིང་ནས་བོད་མི་ཚོའི་ཆོས་དང་རིག་གཞུང་གི་འབྲེལ་བ་ཡོད་པ་ལོ་རྒྱུས་རང་བཞིན་ལྡན་པའི་གནའ་བོའི་རིག་གནས་ཀྱི་ཤུལ་བཞག་ལྷ་སའི་ཇོ་ཁང་གི་གཡས་གཡོན་དང་ཉེ་འཁོར་བར་སྐོར་སོགས་བོད་མིའི་སྡོད་ཁང་དང་སྐོར་ལམ་ཁག་གི་རྣམ་པ་ཤུལ་མེད་བཟོས་ཏེ། ཡུལ་སྐོར་སྤྲོ་འཆམ་བྱེད་སའི་ངོ་བོ་ཙམ་དུ་གྱུར་རྒྱུ་ཡིན་འདུག རྒྱ་ནག་དམར་པོའི་དབང་སྒྱུར་འོག་ཉེན་ཁ་འདི་འདྲ་ཞིག་འཕྲད་རྒྱུའི་སྔོན་དཔག་ཐོག་དེ་སྔ་བོད་མིའི་སྒྲིག་འཛུགས་ཀྱིས་འཛམ་གླིང་མཉམ་སྦྲེལ་རྒྱལ་ཚོགས་ UNESCO ཀྱིས་གཙོས་འབྲེལ་ཡོད་ཚོགས་པ་ཁག་ལ་བོད་ཀྱི་རྒྱལ་ས་ལྷ་སའི་ཇོ་ཁང་དང་བར་སྐོར་ཁུལ་རྣམས་འཛམ་གླིང་གནའ་བོའི་རིག་གནས་ཀྱི་ས་ཁུལ་དུ་ངོས་འཛིན་ཡོང་བའི་འབོད་སྐུལ་རབ་དང་རིམ་པ་བྱས་ཡོད། དེར་བརྟེན་བོད་མིའི་ཆོས་དང་རིག་གཞུང་། སྤྱི་ཚོགས་ཀྱི་རྣམ་པ་ལྡན་པའི་ལོ་རྒྱུས་རང་བཞིན་གྱི་ཁང་ཁྱིམ་གཏོར་བཅོམ་བྱས་པ་བརྒྱུད་ཆོས་དད་ཀྱི་ཁོར་ཡུག་ཉམས་ཆགས་གཏོང་རྒྱུའི་ལས་གཞི་འདི་འཕྲལ་མར་མཚམས་འཇོགས་ཡོང་ཆེད་རྒྱ་ནག་གི་འགོ་ཁྲིད་ཚོར་ཛ་དྲག་ཐོག་ནས་འབོད་སྐུལ་ཞུ་རྒྱུ་ཡིན། ཞེས་འཁོད་ཡོད།
