༢༠༠༩ ཕྱི་ཟླ་ ༦ ཚེས་ ༥ རེས་གཟའ་པ་སངས།
༄༅། །༢༠༠༩ ཕྱི་ཟླ་ ༦ ཚེས་ ༥ རེས་གཟའ་པ་སངས་ཉིན་ནི་དྷར་ལན་ཌེ་སིའི་སྐྱེ་བོ་དམ་པ་ཧཱ་གིའུ་ཇེམ་སེ་ལྷ་ཁང་དུ་ (Hague’s St James Church) བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ནི་དྷར་ལན་ཌེ་སིའི་ཕྱི་སྲིད་བློན་ཆེན་སྐུ་ཞབས་མ་སི་མི་ཝར་ཧཱ་གྷན་ (Maxime Verhagen) མཆོག དེ་བཞིན་ནི་དྷར་ལན་ཌེ་སིའི་ཆོས་ལུགས་ཁག་གི་དབུ་ཁྲིད་རྣམས་དང་མཇལ་འཕྲད་གནང་སྟེ། ཁོང་རྣམ་པས་འཛམ་གླིང་ཞི་བདེ་དང་། ཆོས་ལུགས་མཐུན་སྒྲིལ། འགྲོ་བ་མིའི་ཐོབ་ཐང་། ད་ལྟ་འཛམ་གླིང་གི་མི་འབོར་འཕེལ་རྒྱས་འགྲོ་བཞིན་ཡོད་པར་ཇི་ལྟར་ཚོད་འཛིན་བྱེད་དགོས་མིན་སོགས་ཀྱི་ཐོག་མཇལ་མོལ་ལྷུག་པོ་གནང་ཡོད།
![pic27](https://154.35.136.131/wp-content/uploads/2010/08/pic274-291x300.jpg)
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ནི་དྷར་ལན་ཌེ་སིའི་ཕྱི་སྲིད་བློན་ཆེན་རྣམ་གཉིས་མཇལ་འཕྲད་གནང་བཞིན་པ།
རྒྱ་ནག་གཞུང་ཕྱོགས་ནས་ནི་དྷར་ལན་ཌེ་སིའི་གཞུང་འབྲེལ་མི་སྣ་ཚོས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་བར་སྐྱོན་བརྗོད་དྲག་པོ་བྱས་ཡོད་པ་རེད། འོན་ཀྱང་ནི་དྷར་ལན་ཌེ་སིའི་ཕྱི་སྲིད་བློན་ཆེན་མཆོག་ནས་གསར་འགོད་པ་ཚོར་འགྲེལ་བརྗོད་གནང་བར་གཞིགས་ན། ང་ཚོ་མི་སུ་ཞིག་དང་ཐུག་འཕྲད་བྱེད་དགོས་མིན་ནི་དྷར་ལན་ཌེ་སིའི་གཞུང་གིས་ཐག་གཅོད་གནང་རྒྱུ་དང་། ང་ཚོའི་ནི་དྷར་ལན་ཌེ་སིའི་རྒྱལ་ཁབ་འདི་ནི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། འགྲོ་བ་མིའི་གཏམ་བརྗོད་རང་དབང་སོགས་ལ་བརྩི་འཇོག་དང་རྒྱབ་སྐྱོར་བྱེད་མཁན་གྱི་རྒྱལ་ཁབ་གཅིག་ཡིན་པར་བརྟེན་ང་ཚོས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུར་ཐག་གཅོད་བྱས་པ་ཡིན། ང་ཚོས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་འཛམ་གླིང་འདིའི་ཐོག་གི་རླབས་ཆེན་གྱི་ཆོས་ལུགས་དབུ་ཁྲིད་གཅིག་གི་གནས་བབ་ཐོག་ནས་མཇལ་འཕྲད་ཞུས་ཡོད་པ་དང་། ཏཱ་ལའི་བླ་མ་མཆོག་བོད་རང་བཙན་གྱི་དབུ་ཁྲིད་གཅིག་ལ་ངོས་འཛིན་གྱིས་མཇལ་འཕྲད་བྱས་པ་ཞིག་མིན། ཞེས་རྒྱ་ནག་གི་སྐྱོན་བརྗོད་ལ་ལན་འདེབས་གནང་ཡོད་པ་རེད།
![pic28](https://154.35.136.131/wp-content/uploads/2010/08/pic281-300x267.jpg)
༸གོང་ས་༸སྐྱབས་མགོན་ཆེན་པོ་མཆོག་དང་ཕྱི་སྲིད་བློན་ཆེན་རྣམ་གཉིས་མཇལ་འཕྲད་གནང་སྐབས་དེ་གར་བཅར་བའི་མི་མང་རྣམས་ལ་འཚམས་འདྲི་གནང་བཞིན་པ།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་ངོས་ཀྱི་ཕྱི་སྲིད་བློན་ཆེན་དང་ལྷན་དུ་ཆབ་སྲིད་དང་འབྲེལ་བའི་གནད་དོན་གང་ཡང་གླེང་སློང་བྱས་མེད། རྩ་བའི་གནས་མཆོག་དེ་འདྲ་ཞིག་ལ་ང་ཚོས་སྲིད་དོན་སྐོར་ལ་སྐད་ཆ་ཤོད་རྒྱུ་འོས་འཚམ་ཞིག་མིན། ཞེས་དང་། ཡང་མགོན་པོ་གང་ཉིད་ནི་དྷར་ལན་ཌེ་སིའི་ཁུལ་དུ་ཉིན་གསུམ་ཆིབས་སྒྱུར་བསྐྱངས་དོན་གཙོ་བོ་ནི། འཛམ་གླིང་གི་ཆོས་ལུགས་ཕན་ཚུན་མཐུན་སྒྲིལ་ཡར་རྒྱས་གོང་འཕེལ་གཏོང་རྒྱུའི་ཆེད་དུ་ཡིན་སྐོར་དང་། ངོས་ཚོའི་གྲོས་གཞི་ཡང་ཆོས་ལུགས་མཐུན་སྒྲིལ་དང་དུས་རབས་ཉེར་གཅིག་པའི་སྤྱི་ཚོགས་དེར་ཆོས་ལུགས་པ་ཚོས་ལེགས་སྐྱེས་ཇི་ལྟར་འབུལ་དགོས་ཐོག་ལ་ཡིན། ཞེས་བཀའ་ཕེབས་ཡོད་པའི་གནས་ཚུལ་དུ།།