༢༠༠༩ ཕྱི་ཟླ་ ༦ ཚེས་ ༥ རེས་གཟའ་པ་སངས།
དགའ་གདོང་གསལ་བྱེད་གླིང་གྲྭ་ཚང་དུ་དགའ་གདོང་སྤྲུལ་པའི་ཆོས་སྐྱོང་ཆེན་པོ་སྤྱན་འདྲེན་ཞུ་བཞིན་པ།
༄༅། །དཔལ་ལྡན་བཀའ་ཤག་ནས་ཇི་ལྟར་གསོལ་འདེབས་ཞུས་པ་བཞིན། བོད་རྒྱལ་ལོ་ ༢༡༣༦ རབ་བྱུང་ ༡༧ ས་གླང་ལོའི་ས་ཟླའི་ཚེས་ ༡༢ དང་། ༢༠༠༩ ཕྱི་ཟླ་ ༦ ཚེས་ ༤ སྔ་དྲོའི་ཆུ་ཚོད་ ༧།༠༠ ཐོག་རང་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་སྲི་ཞུ་བའི་ལས་བྱེད་ཆེ་འབྲིང་ཆུང་གསུམ་གདན་འཛོམས་གནང་རྗེས་དགའ་གདོང་གསལ་བྱེད་གླིང་གྲྭ་ཚང་དུ་མཉམ་ཉིད་ཡེ་ཤེས་ཀྱི་ངོ་བོ་སྤྲུལ་པའི་ཆོས་སྐྱོང་གནོད་སྦྱིན་ཤིང་བྱ་ཅན་མཐུ་རྩལ་ཆེན་པོའི་འཕྲིན་ལས་ནམ་ཡང་དབྱེར་མེད་ཐོག་གངས་ཅན་པ་ཡོངས་ཀྱི་མགོན་སྐྱབས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུའི་གསང་བ་གསུམ་ལ་བགེགས་རིགས་ཀྱི་མཚན་མ་ཕྲ་མོས་ཀྱང་མ་རེག་པར་བསྟན་པ་དང་འགྲོ་བ་སྤྱིའི་དོན་དུ་མཛད་འཕྲིན་གོ་ལའི་ཁྱོན་དུ་ཁྱབ་པ་དང་། ཡང་སྒོས་བོད་ཁ་བའི་ལྗོངས་སུ་བདེ་སྐྱིད་ཀྱི་ཉི་མ་མྱུར་དུ་འཆར་བ་སོགས་བསྟན་སྲུང་ཆོས་སྐྱོང་གནོད་སྦྱིན་ཤིང་བྱ་ཅན་ཆེན་པོའི་གདོང་འགྲོགས་ཟབ་མོའི་སྔར་བཅོས་ལེགས་པའི་གཏང་རག་དང་། སླད་བསྟན་སྲུང་ཆེན་པོ་གང་ཉིད་ནས་གྲུབ་པའི་དབང་ཕྱུག་མཚོ་སྐྱེས་རྡོ་རྗེ་དང་། ཕྱག་ན་པལྨོ་སྐུ་ཕྲེང་རིམ་འབྱོན་གྱིས་བྱེད་པོར་ཇི་ལྟར་ཉེར་དུ་གཏད་དེ་དམ་བཅས་པ་སོགས་ལས་བཞིའི་འཕྲིན་ལས་ཐོགས་མེད་དུ་བསྒྲུབ་པའི་ཐུགས་རྗེ་བསྐུལ་ཕྱིར་ཡེ་ཤེས་སེམས་དཔའི་རྟེན་གཙོར་གཞུང་འབྲེལ་དབྱར་གསོལ་སྤྱན་འདྲེན་ཞུས་པ་བཞིན་བཙན་བྱོལ་བོད་གཞུང་གི་བཀའ་བློན་ཁྲི་པས་དབུས་གཞུང་འཛིན་གྱི་མཛད་གཙོ་རྣམ་པ་བཅས་ནས་མཇལ་ཕྱག་ཞུས་རྗེས་རིམ་པས་སྲི་ཞུ་བའི་ལས་བྱེད་དང་སེར་སྐྱ་མི་མང་བཅས་ལ་མཇལ་ཕྱག་གནང་ཡོད་པ་རེད། འདི་ལོའི་གཞུང་འབྲེལ་དབྱར་གསོལ་ཐོག་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན། སྤྱི་འཐུས་རྒྱུན་ལས། ལྷན་ཁང་སོ་སོའི་དྲུང་ཆེ་ཆུང་གཙོས་སྲི་ཞུའི་ལས་བྱེད་རྣམ་པ་དང་། མང་ཚོགས་བཅས་ནས་སྔར་སྲོལ་བཞིན་བོད་ལུགས་ཀྱི་གཟབ་མཆོར་བཞེས་ཏེ་བཅར་ཡོད་པ་བཅས་ཀྱི་གནས་བསྡུས་སུ།།
