༢༠༡༣ ཟླ་ ༥ ཚེས་ ༩ རེས་གཟའ་ཕུར་བུ།

༄༅། །ཕྱི་ལོ་ ༢༠༡༣ ཟླ་ ༥ ཚེས་ ༨ རེས་གཟའ་ལྷག་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཨོར་གན་ (Oregon) མངའ་སྡེའི་གྲོང་ཁྱེར་པོར་ཊི་ལན་ཌེར་ (Portland) ཆིབས་སྒྱུར་བསྐྱངས་ཏེ། བོད་རིགས་སློབ་ཕྲུག་ཁག་གཅིག་ལ་མཇལ་ཁ་དང་བཀའ་སློབ་སྩལ་དོན། སྐུ་མདུན་སྐུ་གོང་མས་བོད་ནང་དེང་དུས་ཀྱི་ཤེས་ཡོན་སྤྲོད་རྒྱུའི་དགོངས་བཞེས་ཀྱིས་ཐུགས་བརྩོན་མཛད་ཡོད། དེ་རྗེས་ང་ཚོ་རྒྱ་གར་ནང་བཙན་བྱོལ་དུ་འབྱོར་མཚམས་ང་ཚོས་ཐོག་མར་སློབ་གྲྭ་ཁག་གསར་འཛུགས་ཀྱིས་བོད་ཕྲུག་ཚོར་དེང་དུས་ཀྱི་ཤེས་ཡོན་སློབ་སྦྱོང་སྤྲོད་རྒྱུ་གལ་ཆེ་ཤོས་སུ་བརྩིས་ཡོད་པ་ལྟར། ད་བར་ལམ་ལྷོང་ཡང་གང་ཙམ་བྱུང་ཡོད། དེར་བརྟེན་ད་ཆ་ང་ཚོས་རིགས་གཅིག་རྐང་འཛིན་དང་ཁྱད་ལས་པའི་སློབ་སྦྱོང་ཐོག་ཤུགས་རྒྱག་རྒྱུའི་དུས་ལ་བབ་ཡོད། ངོས་ཀྱིས་ཁྱེད་ཚོར་དྲན་སྐུལ་གཏོང་དགོས་པ་ཞིག་ལ། ང་ཚོ་བོད་པ་རང་ཉིད་ལ་སྐད་དང་ཡི་གེ་ཡོད།

དེང་སྐབས་ནང་ཆོས་འགྲེལ་བཤད་ཡང་དག་པ་ཞིག་རྒྱག་དགོས་ན་བོད་སྐད་དེ་རན་ཤོས་ཤིག་ཆགས་ཡོད། རྒྱ་གར་དཔལ་ན་ལེནྡྲའི་བཞེད་སྲོལ་དྲི་མ་མེད་པའི་ལྟ་གྲུབ་ལ་ཆེད་གཉེར་བྱེད་དགོས་ན་བོད་སྐད་རྐྱང་པའི་ཐོག་ནས་བྱེད་ཐུབ། ཕྱོགས་གཅིག་ནས་ང་ཚོར་དེང་དུས་ཤེས་ཡོན་གྱིས་ཕོངས་ནས་བོད་ནང་གནས་ཚུལ་ཐབས་སྡུག་འདི་འདྲ་ཞིག་བྱུང་ཡོད། འོན་ཀྱང་ནང་ཆོས་ཀྱི་ཚན་རིག་དང་ནང་པའི་ལྟ་གྲུབ། དེ་བཞིན་ཚན་ཉིད་རིག་པའི་གཞུང་ལུགས་ཀྱི་རྣམ་གཞག་ལ་མཚོན་ན། དེང་སྐབས་ཆ་ཚང་བ་ཞིག་བོད་སྐད་ནང་མ་གཏོགས་ཐོབ་རྒྱུ་ཧ་ལམ་ཁག་པོ་ཆགས་ཡོད། དེར་བརྟེན་ང་ཚོས་འཛམ་གླིང་གི་གཅེས་ནོར་དེར་བདག་པོ་བརྒྱབ་ཡོད་པ་བརྗོད་ཆོག་གི་རེད། ནང་ཆོས་ནས་བསམ་པ་བཟང་པོ་བྱེད་དགོས་པའི་བསླབ་བྱ་དེ་ང་ཚོས་བྱ་བ་གང་འདྲ་ཞིག་ལ་འཇུག་ཀྱང་སེམས་ནང་དྲན་གསོ་བྱེད་དགོས། ཞེས་བཀའ་སློབ་སྩལ། དེ་རྗེས་དྲི་བ་དྲིས་ལན་སྐབས་བོད་ནང་གི་བོད་རིགས་སློབ་ཕྲུག་ཚོར་ལམ་སྟོན་བཀའ་སློབ་ཇི་འདྲ་ཞིག་སྩལ་གནང་མཛད་རྒྱུ་ཡིན་སྐོར་གྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། བོད་ནང་དུ་ཆ་མཚོན་ན་དེང་སྐབས་ཨ་མདོ་ཁུལ་གྱི་རྩོམ་པ་པོ་དང་མཁས་པ་མང་དག་ཅིག་གིས་བོད་ཀྱི་སྐད་ཡིག་མི་ཉམས་རྒྱུན་འཛིན་དང་ཉམས་པ་སླར་གསོ་ཡོང་ཆེད་འབད་བརྩོན་ལྷོད་མེད་གནང་བར་ངོས་ཀྱིས་ཡི་རང་བསྔགས་བརྗོད་ཞུ་རྒྱུ་ཡིན། ཁ་སྐད་ས་གནས་སོ་སོའི་ནང་མི་འདྲ་བ་ཡོང་ཆོག་ཀྱང་ཡིག་སྐད་ལ་ཆ་མཚོན་ན་བོད་ས་ཡོངས་རྫོགས་ལ་གཅིག་གྱུར་ཆགས་ཡོད། དུས་རབས་བདུན་པ་བརྒྱད་པའི་སྐབས་བོད་དེ་བཞིན་སྟོབས་ཆེན་རྒྱལ་ཁབ་ཅིག་ཆགས་ཡོད། དེ་ནས་རིམ་བཞིན་བོད་སིལ་བུར་ཐོར་རྗེས་བོད་རིགས་ཡོངས་རྫོགས་གཅིག་གྱུར་གྱི་འདུ་ཤེས་མ་ཉམས་པར་གནས་ཐུབ་པ་དེ་གཙོ་བོ་བོད་ས་ཡོངས་ལ་བོད་ཡིག་གཅིག་གྱུར་དང་ཐུན་མིན་རིག་གཞུང་ཞིག་ཡོད་པ་ལས་བྱུང་ཡོད།

དེར་བརྟེན་དེང་སྐབས་དེང་དུས་ཤེས་ཡོན་སྦྱང་པ་དང་ལྷན་བོད་པའི་ཐུན་མིན་སྐད་ཡིག་དང་ནང་ཆོས་སློབ་སྦྱོང་བྱས་ཏེ་ནང་ཆོས་ལ་གཞི་བཅོལ་བའི་ཐུན་མིན་སྲོལ་རྒྱུན་གྱི་རིག་གཞུང་ཞིག་ཡོད་པ་དེ་དག་བདག་གཅེས་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་བཀའ་ལན་སྩལ། ཕྱི་ཚེས་ ༩ ཉིན་༸གོང་ས་མཆོག་གིས་ཁུལ་དེར་ཆོས་ལུགས་མཐུན་སྒྲིལ་གྱི་ལྷན་ཚོགས་ཤིག་ཏུ་ཆིབས་སྒྱུར་བཀའ་དྲིན་བསྐྱང་སྟེ་ཆོས་ལུགས་དང་ཁོར་ཡུག་སྐོར་བཀའ་སློབ་སྩལ་རྒྱུ་མ་ཟད། ཀུན་ཁྱབ་འགན་ཁུར་དང་ནང་གི་ཁོར་ཡུག སེམས་ཀྱི་རང་བཞིན་ཞེས་པའི་བརྗོད་གཞིའི་ཐོག་བཀའ་སློབ་ཀྱང་སྩལ་རྒྱུ་ཡིན་འདུག་པ་བཅས། །