༢༠༡༣ ཟླ་ ༥ ཚེས་ ༩ རེས་གཟའ་ཕུར་བུ།

སྲིད་སྐྱོང་མཆོག་གྲོས་ཚོགས་འཐུས་མི་རྣམས་ལ་གསུང་བཤད་ གནང་བཞིན་པ།

༄༅། །སྲིད་སྐྱོང་བློ་བཟང་སེང་གེ་མཆོག་གིས་ཕྱི་ལོ་ ༢༠༡༣ ཟླ་ ༥ ཚེས་ ༦ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་བྱུང་རྗེས་ཕྱི་ཚེས་ ༨ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པི་ལོ་སི་ (Nancy Pelosi) མཆོག་དང་ལྕམ་སྐུ་ཕ་ཡིན་སི་ཊེན་ (Feinstein) མཆོག སྐུ་ཞབས་ལི་ཧེ་ (Leahy) མཆོག་སོགས་ཀྱིས་གཙོས་གྲོས་ཚོགས་འཐུས་མི་ ༣༥ དང་ལྷན་མཇལ་འཕྲད་ཀྱིས་གསོལ་ཚིགས་ལྷན་བཞེས་གནང། སྐབས་དེར་སྲིད་སྐྱོང་མཆོག་གིས་བོད་དོན་ལ་རྒྱབ་སྐྱོར་གནང་རྒྱུ་གལ་ཆེ་ཡིན་སྐོར་སོགས་ཀྱི་གསུང་བཤད་གནང་བ་མ་ཟད། གྲོས་ཚོགས་འཐུས་མི་རྣམས་ཀྱི་དྲི་བར་ལན་འདེབས་དང་གསལ་བཤད་གནང་བ་དང་སྦྲགས། བོད་མིའི་བདེན་པའི་འཐབ་རྩོད་ལ་རྒྱལ་ཁ་ཐོབ་ཆེད་ཨ་རིའི་གྲོས་ཚོགས་ཀྱི་རྒྱབ་སྐྱོར་དེ་ཧ་ཅང་གལ་ཆེན་པོ་ཆགས་ཡོད་སྐོར་གསུངས་ཡོད།
གཞན་ཡང་སྲིད་སྐྱོང་མཆོག་གིས་ཕྱི་ཚེས་ ༦ ཉིན་ཝ་ཤིང་ཊོན་གསར་ཤོག་སྙན་གྲགས་ཅན་དཱ་ཧིལ་ (The Hill) http://thehill.com/blogs/global-affairs/guest-commentary/297903-tibetan-leader-lobsang-sangay-congress-needs-to-hold-china-to-account-on-tibetཞེས་པའི་རྩོམ་སྒྲིག་པའི་གླེང་སྟེགས་ནང་ཆེད་རྩོམ་ཞིག་སྤེལ་ཏེ།

ཨ་རིའི་ གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནེན་སི་པེ་ལོ་སི་མཆོག་དང་ལྷན།

ད་བར་བོད་མི་ ༡༡༧ རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་བོད་མིའི་ཐོག་འཛིན་བཞིན་པའི་མི་རིགས་དབྱེ་འབྱེད་དང་རིག་གཞུང་དང་ཁོར་ཡུག་རྩ་གཏོར། དཔལ་འབྱོར་ཟུར་ཕུད། དེ་བཞིན་བོད་མི་འབྲོག་པ་རྣམས་བཙན་ཐབས་ཀྱིས་འབྲོག་ས་ནས་ཕྱིར་འབུད་བཏང་སྟེ། ས་གནས་གཅིག་ཏུ་གཞིས་ཆགས་བཅུག་སྟེ་འབྲོག་པ་རྣམས་ཕྱིར་ཕུད་རྗེས་འདོད་རྔམ་ད

ང་ཧམ་སེམས་ཁོ་ནའི་འོག་གཏེར་ཁ་སྔོག་འདོན་གྱི་ལས་གཞི་འདྲ་མིན་སྣ་ཚོགས་སྤེལ་དང་སྤེལ་མུས་ཡིན་པ་མ་ཟད། རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་མིང་འདོགས་སྣ་ཚོགས་འོག་

བོད་ཀྱི་དགོན་པ་གྲྭ་ཚང་སོགས་ཀྱི་ནང་དགེ་བཙུན་རྣམས་ལ་༸གོང་ས་མཆོག་གི་སྐུ་པར་སྒྲིག་གཤོམ་མི་ཆོག་པ་མ་ཟད། ༸གོང་ས་མཆོག་ལ་མཚན་སྨད་ཞུ་དགོས་པའི་བཙན་བཀའ་བཏང་བ་སོགས།

མདོར་ན་ཆོས་བྱེད་དགེ་བཙུན་རྣམས་ཀྱི་འགྲོ་སྡུག་སྤྱོད་གསུམ་ལ་ཉིན་མཚན་ཁོར་མོ་ཡུག་ཏུ་སོ་ལྟ་དང་དམ་བསྒྲགས་ཧ་ཅང་ཆེན་པོ་བྱས་དང་བྱེད་མུས་བཅས་ལ་བརྟེན་བོད་མི་ཚོས་ཞི་རྒོལ་བྱས་ཡོད་སྐོར་སོགས་ཞིབ་ཕྲ་འཁོད་ཡོད།
ཕྱོགས་མཚུངས་ཕྱི་ཚེས་ ༦ ཉིན་ཨ་རིའི་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཕྱི་འབྲེལ་སྲིད་བྱུས་གཏན་འབེབས་ཚོགས་ཆུང། (The Foreign Policy Initiative) གིས་སྲིད་སྐྱོང་བློ་བཟང་སེང་གེ་མཆོག་ལ་དགོང་ཚིགས་ཤིག་ཀྱང་ཕུལ་ཡོད། །