༢༠༡༣ ཟླ་ ༥ ཚེས་ ༨ རེས་གཟའ་ལྷག་པ།

༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༥ ཉིན་རྒྱ་གར་མདྱཱ་པར་དེ་ཤིའི་མངའ་སྡེའི་ནང་རྟེན་གཞི་བྱས་པའི་སཱན་ཅི་ནང་པ་དང་རྒྱ་གར་རིག་པའི་ཆེས་མཐོའི་གཙུག་ལག་སློབ་གཉེར་ཁང་ (Sanchi University of Buddhist-Indic Studies) གི་གསལ་བསྒྲགས་སྤེལ་བའི་ནང། རིན་པོ་ཆེ་མཆོག་ལ་སཱན་ཅི་ནང་པ་དང་རྒྱ་གར་རིག་པའི་ཆེས་མཐོའི་གཙུག་ལག་སློབ་གཉེར་ཁང་གི་རིགས་བདག་ཆེན་མོར་(Chancellor) བསྐོ་གཞག་བྱུང་ཡོད། དེར་བརྟེན་བཀའ་ཤག་གིས་རིན་པོ་ཆེ་མཆོག་ལ་དགའ་བསུའི་འཚམས་འདྲི་ཞུས་པའི་ནང་འཁོད་དོན། བོད་མིའི་སྒྲིག་འཛུགས་བཀའ་ཤག་གིས་སྐུ་ཉིད་མཆོག་ལ་དགའ་བསུའི་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང། གནས་ཚུལ་དེ་ནི་སྐུ་ཉིད་ལ་ཆེ་བཀུར་ཞུས་པ་ཙམ་མ་ཟད། བོད་ཀྱི་མཁས་པ་སྤྱི་དང་ཁྱད་པར་བོད་བརྒྱུད་ནང་བསྟན་གྱི་ཁྱད་ནོར་ལ་ཚད་མཐོའི་ངོས་འཛིན་ཐོབ་པའི་གནས་ཚུལ་ཞིག་ཀྱང་ཡིན་ན། གོང་གསལ་རིགས་བདག་ཆེན་མོའི་མཚན་གནས་རྗེས་འབྲེལ་གྱི་མཛད་དོན་མཐའ་དག་བགེགས་མེད་ལམ་ལྷོང་ཡོང་བའི་སྨོན་འདུན་ཡང་ཞུ་རྒྱུ་ཡིན། ཞེས་འཁོད་ཡོད་པ་བཅས།།