༢༠༡༣ ཟླ་ ༥ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༦ རེས་གཟའ་ཟླ་བའི་ཉིན་གྱི་ཕྱེད་ཡོལ་ཆུ་ཚོད་ ༡།༣༠ ༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མངའ་སྡེ་མར་རི་ལན་ཌེར་ (Maryland) ནང་རྟེན་གཞི་བྱས་པའི་གཙུག་ལག་སློབ་གཉེར་ཁང་གི་སྐྱེད་མོས་ཚལ་ (College Park) ཞེས་པའི་ས་གནས་སུ་༸ཞབས་སོར་བདེ་བར་འཁོད་སྐབས། ས་གནས་བོད་མི་གཉིས་ཀྱིས་གྲོ་སོ་ཕྱེ་མར་འདེགས་འབུལ་དང་འབྲེལ་བོད་མི་མང་དག་ཅིག་གིས་ལག་ཏུ་དཀར་གཙང་མཇལ་དར་དང་མཆོད་རྫས་སྣ་ཚོགས་ཐོགས་ཏེ་ཕེབས་བསུ་ཞུས་ཡོད་པ་མ་ཟད། དེ་བཞིན་བོད་མི་ཁག་གཅིག་གིས་བཀྲ་ཤིས་ཞོལ་པ་འཁྲབ་སྟོན་ལམ་ནས་ཕེབས་བསུ་གཟབ་རྒྱས་དང་སྦྲགས་བཞུགས་གནས་མགྲོན་ཁང་དུ་གདན་འདྲེན་ཞུས་ཡོད། མགོན་པོ་གང་ཉིད་མཆོག་གིས་ཕྱི་ཚེས་ ༧ ཉིན་ནས་མཛད་འཕྲིན་ཁག་དབུ་འཛུགས་མཛད་རྒྱུ་ཡིན་འདུག་པ་བཅས། །
