༢༠༠༩ ཕྱི་ཟླ་ ༦ ཚེས་ ༤ རེས་གཟའ་ལྷག་པ།
ཚེ་བཙོན་གྱི་ཁྲིམས་ཆད་ཕོག་པའི་རྒྱལ་གཅེས་པ་ཚུལ་ཁྲིམས་རྒྱ་མཚོ་ལགས།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱི་ཟླ་ ༥ ཚེས་ ༢༡ ཉིན་ཀན་སུའུ་ཞིང་ཆེན་ཟེར་བའི་ཁོངས་ཀན་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ནས་སྔ་ལོ་ཟླ་ ༣ ཚེས་ ༡༥ ཉིན་ཞི་བའི་ངོ་རྒོལ་ནང་ཞུགས་མཁན་བླ་བྲང་དགོན་པའི་དགེ་འདུན་པ་རང་ལོ་ ༣༧ སོན་པ་ཚུལ་ཁྲིམས་རྒྱ་མཚོར་ཚེ་བཙོན་གྱི་ཁྲིམས་ཐག་བཅད་པ་དང་། རང་ལོ་ ༣༤ སོན་པ་གྲྭ་ཐབས་མཁས་རྒྱ་མཚོར་དུས་བཀག་བཙོན་འཇུག་ལོ་ ༡༥ ཁྲིམས་ཐག་བཅད་ཡོད་པ་རེད། གོང་གསལ་དགེ་འདུན་པ་གཉིས་པོ་ནི་སྔ་ལོ་ཕྱི་ཟླ་ ༣ པའི་ཚེས་ ༡༥ ཉིན་སངས་ཆུ་རྫོང་ཁོངས་སུ་སེར་སྐྱ་མི་མང་ནས་ཞི་བའི་ངོ་རྒོལ་བྱེད་སྐབས་མཉམ་ཞུགས་བྱེད་མཁན་གྱི་གྲས་ཤིག་ཡིན་པ་དང་། ཁོང་གཉིས་ལ་ཁྲིམས་ཐག་བཅད་སྐབས་ནང་མིར་བརྡ་ལན་གང་བྱས་མེད་པའི་ཁར། གྲྭ་ཐབས་མཁས་རྒྱ་མཚོ་ནད་མནར་རྐྱེན་པས་སྨན་ཁང་དུ་ལུས་ཡོད་པའི་གནས་ཚུལ་ཐོན་འདུག
