༢༠༡༣ ཟླ་ ༥ ཚེས་ ༢ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕྱི་ལོ་ ༢༠༡༣ ཟླ་ ༥ ཚེས་ ༢ ཉིན་གྱི་ཕྱི་དྲོ་ནས་ཚེས་ ༢༠ བར་བྱང་ཨ་རིར་ཆེས་མཐོའི་མི་སྣ་ཁག་མཇལ་འཕྲད་དང་སྐུ་ཚབ་དོན་ཁང་ཝ་ཤིང་ཊོན་དུ་སྤོ་ཞུགས་བྱ་རྒྱུའི་ལས་རིམ་འགྲོ་བཞིན་པར་གཟིགས་ཞིབ། ཡུ་རོབ་ཁུལ་ཇར་མན་དུ་བགྲོ་གླེང་ཚོགས་འདུ་ཞིག་ལ་མཉམ་ཞུགས། ནོར་ཝེའི་རྒྱལ་ས་(Oslo Freedom Forum )ཡི་ལོ་འཁོར་ཚོགས་འདུ་ཐེངས་ལྔ་པར་གསུང་བཤད། སུ་ཝི་ཌེན་དུ་གྲོས་ཚོགས་འཐུས་མི་ཁག་གཅིག་དང་མཇལ་མོལ། དེ་བཞིན་གཙུག་ལག་སློབ་གྲྭ་ཆེན་མོ་ཞིག་ནང་གསུང་བཤད་གནང་རྒྱུ་སོགས་ཀྱི་གཞུང་འབྲེལ་ཕྱོགས་ཕེབས་གནང་གཏན་འཁེལ་འདུག
དེ་ཡང་སྲིད་སྐྱོང་མཆོག་གོང་ཚེས་ཉིན་གྱི་དགོང་དྲོ་རྡ་ས་ནས་པ་ཀོར་བརྒྱུད་ཕེབས་ཐོན་གྱིས་ཕྱི་ཚེས་ ༣ ཉིན་ལྡི་ལིར་ཕེབས་འབྱོར་རྗེས་གསར་འགོད་པ་དང་མི་སྣ་ཁག་གཅིག་མཇལ་འཕྲད་གནང་རྒྱུ་དང་། ཕྱི་ཚེས་ ༤ ཉིན་ལྡི་ལི་ནས་མུ་ནིཀ་དང་དེ་ནས་བྷོ་སི་ཊོན་བརྒྱུད་ཝ་ཤིང་ཊོན་དུ་ཕེབས་འབྱོར་གྱིས་ཕྱི་ཚེས་ ༥ ནས་ ༩ བར་ས་གནས་སུ་ལས་དོན་ཡོད་འདུག དེ་ནས་ཨོ་སི་ལོར་ཕེབས་འབྱོར་གྱིས་ཕྱི་ཚེས་ ༡༣ ནས་ ༡༤ བར་ས་གནས་སུ་ལས་དོན་ཡོད་འདུག ཕྱི་ཚེས་ ༡༥ ཉིན་ཨོ་སི་ལོ་ནས་སོ་ཀྲོག་ཧོམ་ལ་ཕེབས་འབྱོར་གནང་རྒྱུ་དང་། ཕྱི་ཚེས་ ༡༦ དང་ ༡༧ ཉིན་ས་གནས་སུ་ལས་དོན་ཡོད་འདུག ཕྱི་ཚེས་ ༡༨ ཉིན་སོ་ཀྲོག་ཧོམ་ནས་ཕེརངྐ་ཕ་ཊ་བརྒྱུད་ཕྱི་ཚེས་ ༡༩ ཉིན་ལྡི་ལིར་ཕེབས་འབྱོར་གྱིས་མི་སྣ་ཁག་མཇལ་འཕྲད་གནང་རྒྱུ་དང། ཕྱི་ཚེས་ ༢༠ ཉིན་ལྡི་ལི་ནས་འཇམ་མུའི་མཁའ་ལམ་བརྒྱུད་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།
