༢༠༡༠ ཕྱི་ཟླ་ ༡ ཚེས་ ༡༦ རེས་གཟའ་སྤེན་པ།

༄༅། །ཕྱི་ལོ་ ༢༠༡༠ ཟླ་ ༡ ཚེས་ ༡༦ ཉིན་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དང་། ཨོ་རི་ས། གུ་ཇུ་རཊ་བཅས་ས་ཁུལ་སོ་སོའི་ནང་གི་མཛད་འཕྲིན་ཁག་ལེགས་པར་གྲུབ་སྟེ་ཕྱི་ཚེས་ ༡༦ ཉིན་རྒྱབ་མཁའ་ལམ་བརྒྱུད་གྷ་གལ་གནམ་ཐང་དུ་༸ཞབས་སོར་འཁོད་སྐབས་བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དེ་བཞིན་གནད་ཡོད་མི་སྣ་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཕེབས་འགྲོའི་ཐོག་ཆུ་ཚོད་ ༢ དང་སྐར་མ་ ༢༠ ཙམ་ལ་༸གོང་ས་མཆོག་སྟོན་འཁོར་དང་བཅས་བཞུགས་སྒར་དུ་༸ཞབས་སོར་འཁོད་སྐབས་ལམ་ཟུར་གཡས་གཡོན་དུ་དད་ལྡན་སེར་སྐྱ་མི་མང་རྣམས་ཀྱིས་ལག་ཏུ་སྤོས་སྣེ་དང་དཀར་གཙང་གི་མཇལ་དར་ཐོགས་སྟེ་མགོན་པོ་གང་ཉིད་མཆོག་ལ་དགའ་དད་སྤྲོ་གསུམ་གྱིས་ཕེབས་བསུ་གཟབ་རྒྱས་ཞུས་ཡོད་པ་རེད།།