༢༠༡༣ ཟླ་ ༤ ཚེས་ ༢༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༠ དང་ ༢༡ བཅས་ཉིན་གྲངས་གཉིས་རིང་སུད་སི་སྐུ་ཚབ་དོན་ཁང་གིས་གོ་སྒྲིག་ཐོག་སུད་སིའི་བྷོལ་ཌ་རན་ (Boldern) ཁུལ་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་ཡུ་རོབ་ཁུལ་གྱི་བོད་རིགས་ཚོགས་པ་ཁག་བཅུ་གཅིག་གི་སྐུ་ཚབ་སུམ་ཅུ་འདུ་འཛོམས་ཀྱིས་ཚོགས་འདུ་ཞིག་ཚོགས་འདུག
དེ་ཡང་ཕྱི་ཚེས་ ༢༠ ཉིན་ཐོག་མར་ཚོགས་བཅར་བ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་ཡོངས་ལ་གདུང་སེམས་མཉམ་སྐྱེ་དང་མྱ་ངན་གུས་འདུད་མཚོན་སླད་ངག་བཅད་སྐར་མ་གཅིག་གནང་ཡོད། སྐབས་དེར་སུད་སི་སྐུ་ཚབ་དོན་གཅོད་ཆོས་སྐྱབས་པ་ཚེ་བརྟན་བསམ་གྲུབ་ལགས་ཀྱིས་ཚོགས་འདུ་དབུ་འབྱེད་ཀྱི་གསུང་བཤད་གནང་གྲུབ་བསྟུན། སྲིད་སྐྱོང་མཆོག་གིས་གསུང་བཤད་གནང་དོན། ཡུ་རོབ་ཁུལ་དུ་གནས་སྡོད་བོད་རིགས་སྒེར་པ་སོ་སོ་དང་བོད་རིགས་ཚོགས་པའི་ངོས་ནས་ད་ལྟའི་བོད་ནང་གི་ཛ་དྲག་གནས་སྟངས་ཐོག་སོ་སོའི་ངོས་ནས་གང་བྱེད་ཐུབ་མིན་ཐོག་བསམ་བློ་གཏོང་དགོས། རྒྱ་ནག་གཞུང་ནས་བོད་མིར་ཆབ་སྲིད་དམ་བསྒྲགས་དང། དཔལ་འབྱོར་ཟུར་ཕུད། ཁོར་ཡུག་གཏོར་བཤིག བོད་མི་རིགས་དབྱེ་འབྱེད་སོགས་ཆེས༌གདུག་རྩུབ་ཅན་གྱི་སྲིད་བྱུས་ལག་བསྟར་བྱས་པར་བརྟེན།
ཕྱི་ལོ་ ༢༠༠༩ ལོ་ནས་བཟུང་ད་བར་བོད་མི་ ༡༡༥ ནས་རང་ལུས་མེར་སྲེག་བཏང་ཡོད་ཁོངས་ནས་བོད་མི་ ༩༦ འདས་གྲོངས་སུ་གྱུར་ཡོད། ཡུ་རོབ་ཏུ་གནས་སྡོད་བོད་རེིགས་རྣམས་ཀྱིས་བོད་ཀྱི་ཆོས་དང་རིག་གཞུང། སྐད་ཡིག་བཅས་བདག་གཅེས་དང་གོང་སྤེལ་གཏོང་རྒྱུར་འབད་བརྩོན་གང་ཞིག་གནང་ཡང་དེར་བོད་མིའི་སྒྲིག་འཛུགས་ཀྱིས་མཐུན་འགྱུར་རོགས་རམ་ཇི་འདྲ་ཞིག་ཞུ་དགོས་ཀྱང་གང་ཡོང་འབད་བརྩོན་ཞུ་རྒྱུ་ཡིན། ཞེས་གསུངས། དེ་བཞིན་སྲིད་སྐྱོང་མཆོག་གིས་ཕྱི་རྒྱལ་ཡུལ་གྲུ་ཁག་ཏུ་གནས་སྡོད་བོད་མི་རྣམས་ནས་སོ་སོ་གནས་སྡོད་བྱེད་སའི་གཞུང་དང། གྲོས་ཚོགས་འཐུས་མི། གསར་འགྱུར་བརྒྱུད་ལམ། མི་མང་དཀྱུས་མ་བཅས་ལ་༸གོང་ས་མཆོག་གིས་ཆབས་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་པའི་སྐོར་འགྲེལ་བརྗོད་གནང་རྒྱུ་ཧ་ཅང་གལ་ཆེན་པོ་ཡིན། བོད་རིགས་ཚོགས་པའི་སྐུ་ཚབ་རྣམ་པས་ས་གནས་སོ་སོའི་གཞུང་དང་གྲོས་ཚོགས་ལ་རྒྱ་གཞུང་ནས་བོད་ཀྱི་དཀའ་རྙོག་སེལ་རྒྱུར་རྒྱབ་སྐྱོར་ཡོང་སླད་ཞུ་གཏུག་གནང་དགོས། བོད་མིའི་སྒྲིག་འཛུགས་ནས་བོད་ཀྱི་བདེན་མཐའ་གསལ་ཆེད་གཉིས་སྨན་དབུ་མའི་ལམ་ལ་ཡིད་ཆེས་བརྟན་པོ་ཡོད། ཅེས་གསུངས་པ་དང་ལྷན་སྲིད་སྐྱོང་མཆོག་གིས་བཀའ་ཤག་སྐབས་བཅུ་བཞི་པའི་ལྟ་གྲུབ་གསུམ་ཏེ། གསར་གཏོད་དང། ཆིག་སྒྲིལ། རང་ཁ་རང་གསོ་བཅས་ཀྱི་སྐོར་གསུང་བཤད་གནང་ཡོད།
ཉིན་གཉིས་རིང་གི་ཚོགས་འདུའི་ཐོག་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་དང། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས། སྤྱི་འཐུས་ཆུང་བདག་ཀོ་རིན་ལགས་བཅས་ཀྱིས་གསུང་བཤད་གནང་ཡོད་པ་མ་ཟད། ཡུ་རོབ་དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག་གིས་བོད་མི་རྣམས་ནས་བོད་དོན་རྒྱབ་སྐྱོར་ཚོགས་པ་དང་གྲོས་ཚོགས་འཐུས་མི་རྣམས་དང་ལྷན་བོད་དོན་ལས་འགུལ་ཤུགས་ཆེ་རུ་གཏོང་རྒྱུ་གལ་ཆེན་པོ་ཡིན་སྐོར་ནན་གསུངས་གནང་ཡོད།
གོང་ཚེས་ཉིན་གྱི་ཕྱེད་ཡོལ་སྲིད་སྐྱོང་མཆོག་གིས་བྷོལ་ཌ་རན་དུ་ཡུ་རོབ་བོད་དགེ་ཚོགས་འདུ་ཐེངས་དང་པོར་གསུང་བཤད་གནང་ཡོད། སུད་སི་སྐུ་ཚབ་དོན་ཁང་གིས་གོ་སྒྲིག་གནང་བའི་ཚོགས་འདུ་དེའི་ཐོག་སུད་སི་དང། དབྱིན་ཡུལ། ཕ་རན་སི། བྷེལ་ཇམ། ཨོ་སི་ཊེ་རི་ཡ་བཅས་ཀྱི་བོད་དགེ་རྣམ་པས་གཙོས་ཁྱོན་མི་གྲངས་ ༥༠ བརྒལ་བས་ཚོགས་འདུར་མཉམ་ཞུགས་གནང་ཡོད། སྐབས་དེར་སྲི༝ད་སྐྱོང་མཆོག་གིས་སློབ་གྲྭའི་ལྟ་རྟོག་པ་དང་བོད་དགེ་རྣམས་ལ་བོད་ཀྱི་སྐད་ཡིག་བདག་གཅེས་དང་གོང་འཕེལ་གཏོང་ཆེད་དང་བླངས་སྲི་ཞུ་གྲུབ་པར་ཡི་རང་བསྔགས་བརྗོད་གནང་བ་དང་ཆབས་ཅིག བོད་པའི་སྤྱི་ཚོགས་དང་བོད་ཕྲུག་རྣམས་ཀྱི་ཆེད་མུ་མཐུད་ཞབས་འདེགས་སྒྲུབ་རོགས་ཞེས་འབོད་སྐུལ་ཡང་ཞུས་ཡོད་པ་མ་ཟད། བོད་ནང་རྒྱ་ནག་གཞུང་ནས་བོད་ཀྱི་སྐད་ཡིག་རྩ་མེད་གཏོང་རྒྱུའི་སྲིད་བྱུས་སྣ་མང་སྤེལ་བཞིན་ཡོད་ཀྱང་བོད་མི་རྣམས་ཀྱིས་སོ་སོའི་རིག་གཞུང་བདག་གཅེས་བྱེད་བཞིན་ཡོད་སྐོར་གསུངས་པ་དང་སྦྲགས་བོད་དགེ་རྣམས་ལ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་སུ་འབྲེལ་གཏུག་ཐོག་ས་གནས་ཀྱི་གནས་བབ་དང་དགོས་མཁོ་ལ་དཔག་པའི་ཀློག་དེབ་བཟོ་བཀོད་བྱེད་དགོས་པའི་ལམ་སྟོན་ཡང་གནང་ཡོད།
སྤྱིར་བཏང་སུད་སི་ནང་བོད་ཀྱི་སྐད་ཡིག་སློབ་གྲྭ་དེ་བཞིན་ཕྱི་ལོ་ ༡༩༧༤ ལོར་དབུ་འཛུགས་གནང་སྐབས་སློབ་གྲྭ་ལྔ་དྲུག་ལས་མེད། ད་ཆ་སུད་སི་ཁུལ་དུ་བོད་ཀྱི་སྐད་ཡིག་སློབ་གྲྭ་ཁག་བཅོ་ལྔའི་ནང་སློབ་ཕྲུག་ ༡༨༥ ཙམ་ཡོད། འདས་པའི་ལོ་ངོ་ ༣༠ ལྷག་ནས་ད་ཡོད་དགེ་རྒན་ལྔས་དང་བླངས་ཐོག་བོད་དགེ་གནང་བཞིན་ཡོད། འདས་པའི་ལོ་ཤས་གོང་ཡུ་རོབ་ཁུལ་དུ་བོད་མི་གནས་སྡོད་བྱེད་མཁན་ཇེ་མང་དུ་འགྲོ་བཞིན་ཡོད། ཕྱི་ལོ་ ༢༠༠༨ ལོར་ཡུ་རོབ་ཁུལ་དུ་བོད་མི་ཁྱོན་མི་གྲངས་ ༧༠༠༠ ཙམ་ཡོད་པ་དང་། ད་ལྟ་བོད་མི་ ༡༡༠༠༠ ཙམ་ཡོད་པའི་ཚོད་དཔག་བྱེད་བཞིན་ཡོད་པ་བཅས།།
