༢༠༡༣ ཟླ་ ༤ ཚེས་ ༡༩ རེས་གཟའ་པ་སངས།
༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལས་ཁུངས་ཀྱི་འགན་འཛིན་ལྕམ་སྐུ་ནེ་ཝི་པེ་ལ་མཆོག་གིས་ལྷོ་ཨ་ཕི་རི་ཀའི་གྲོང་ཁྱེར་ནང་རྟེན་གཞི་བྱས་པའི་ཝེ་སིཀ་གཙུག་ལག་སློབ་གཉེར་ཁང་དུ་ཕྱི་ལོ་ ༢༠༡༣ ཟླ་ ༤ ཚེས་ ༡༧ ཉིན་གཙུག་ལག་སློབ་གཉེར་ཁང་དེའི་དགེ་ལས་སློབ་ཕྲུག་རྣམས་ལ་འགྲོ་བ་མིའི་ཐོབ་ཐང་སྐོར་ལ་གསུང་བཤད་གནང་གྲུབ་མཚམས་དྲི་བ་དྲིས་ལན་གྱི་ལས་རིམ་ཞིག་ཚོགས་འདུག
སྐབས་དེར་ལྷོ་ཨ་ཕི་རི་ཀའི་སྐུ་ཚབ་དོན་གཅོད་མི་འགྱུར་རྡོ་རྗེ་ལགས་ཀྱིས་ལྕམ་སྐུ་མཆོག་ལ་ད་ལྟའི་བོད་ནང་གི་ཛ་དྲག་ཆེ་བའི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་ཡང་སྒོས་ཕྱི་ལོ་ ༢༠༠༩ ནས་བཟུང་གཞིས་བཞུགས་བོད་མི་ ༡༡༥ ནས་རྒྱ་གཞུང་ལ་ཞི་རྒོལ་ཆེད་རང་ལུས་མེར་སྲེག་བཏང་བའི་གནད་དོན་རྣམས་ཞུ་སྐབས། ལྕམ་སྐུ་མཆོག་གིས་བོད་ནང་གི་ཛ་དྲག་གནས་སྟངས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལས་ཁང་ནས་ཤེས་ཀྱི་ཡོད་པ་མ་ཟད།
དེའི་ཐོག་ང་ཚོར་ཧ་ཅང་སེམས་འཚབ་ཆེན་པོ་འདུག དེར་བརྟེན་དུས་ཚོད་གཏན་འཁེལ་བྱུང་མ་སོང་མ་གཏོགས་རྒྱ་ནག་ཙམ་མ་ཟད། བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་ཐོག་ལྟ་སྐོར་ལ་བསྐྱོད་རྒྱུར་ང་ཚོས་འབད་བརྩོན་བྱེད་བཞིན་ཡོད་སྐོར་གསུངས་འདུག་པ་བཅས། །
