༢༠༡༣ ཟླ་ ༤ ཚེས་ ༡༢ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་ཕྱི་སྲིད་དྲུང་ཆེ་སྐུ་ཞབས་ཇོན་ཀེ་རི་མཆོག་རིང་མིན་རྒྱ་ནག་ཏུ་རྒྱལ་དོན་འཚམས་གཟིགས་ཐེངས་དང་པོ་ཕེབས་རྒྱུའི་གོ་སྐབས་དང་བསྟུན་བོད་ཀྱི་གནད་དོན་སྤྱི་དང་། ལྷག་པར་དེང་སྐབས་བོད་ནང་གི་ཧ་ཅང་ཛ་དྲག་གི་གནས་ཚུལ་སྐོར་གླེང་དགོས་པའི་འབོད་སྐུལ་གྱི་ཞུ་ཡིག་གཅིག་ཕྱི་ལོ་ ༢༠༡༣ ཟླ་ ༤ ཚེས་ ༤ ཉིན་ཕུལ་བའི་ནང་འཁོད་དོན། འགྲོ་བ་མིའི་ཐོབ་ཐང་སྲུང་སྐྱོབ་དང་བོད་དོན་སྐོར་གླེང་རྒྱུ་ནི། བཟང་སྤྱོད་ཐོག་ནས་སྒྲིག་པ་ཞིག་ཡིན། རྒྱ་ནག་ནང་གུ་ཡངས་དང་ཕྱི་གསལ་ནང་གསལ་ཐོག་ནས་འགྲོ་བ་མིའི་ཐོབ་ཐང་ལ་གུས་བརྩི་བྱ་རྒྱུ་ཞིག་བྱུང་ན། རྒྱལ་སྤྱིའི་ཁོར་ཡུག་གི་བདེ་འཇགས་ལ་ཉེན་ཁ་ཆུང་དུ་འགྲོ་རྒྱུ་མ་ཟད། ཞི་བདེ་བརྟན་ལྷིང་ཡོང་རྒྱུར་ཕན་ཐོགས་ཡོད། རྒྱ་ནག་གཞུང་གིས་བོད་ཀྱི་གནད་དོན་སེལ་ཆེད་རྩ་ཁྲིམས་ནང་འཁོད་པའི་ཆ་རྐྱེན་ལ་བདག་སྤྲོད་མ་བྱས་པའི་ཁར། བོད་ཀྱི་དཀའ་ངལ་དེ་ཞི་བའི་ཐབས་ལམ་ཐོག་ནས་སེལ་རྒྱུར་ཆབ་སྲིད་ཀྱི་ཆོད་སེམས་ཡོད་པའི་རྣམ་འགྱུར་གང་ཡང་བསྟན་མེད། ཕྱི་ལོ་ ༢༠༡༠ ཕྱི་ཟླ་ ༡ ནས་ད་བར་བོད་རྒྱ་གྲོས་མོལ་མ་བྱུང་བར་ལུས་པ་དེ་བསྐྱར་མཐུད་བྱུང་བ་ཡིན་ན། བོད་མི་ཚོར་རེ་བ་གསར་པ་ཞིག་སྦྱིན་རྒྱུ་དང། བོད་རྒྱ་གཉིས་སྨན་གྱི་ཐབས་ལམ་འཚོལ་ཐུབ་རྒྱུར་ཕན་ཐོགས་ཡོད། ང་ཚོའི་ཕྱོགས་ནས་རྒྱ་ནག་གཞུང་དང་ལྷན་གནས་དུས་ནམ་ཡིན་ལ་གྲོས་མོལ་བྱ་རྒྱུར་གྲ་སྒྲིག་ཡོད། དེར་བརྟེན་སྐུ་ཉིད་མཆོག་གིས་རྒྱ་ནག་གཞུང་ལ་རེ་འདུན་བཏོན་པའི་ཐོག་ནས་བོད་མིའི་དབུ་ཁྲིད་དང་ལྷན། གྲོས་མོལ་བསྐྱར་མཐུད་དགོས་པའི་རེ་འདུན་འདོན་རོགས་གནང་། ཞེས་ངས་འབོད་སྐུལ་ཤུགས་ཆེ་ཞུ་རྒྱུ་དང། ཨ་རིའི་བོད་དོན་དམིགས་བསལ་འབྲེལ་མཐུད་པ་ཞིག་གང་མགྱོགས་བསྐོ་གཞག་གནང་རྒྱུའི་ཐད་འབད་བརྩོན་ཡང་གནང་རོགས་ཞུ་རྒྱུ་ཡིན། ཞེས་འཁོད་འདུག་པ་བཅས། །
