༢༠༡༣ ཟླ་ ༤ ཚེས་ ༡༢ རེས་གཟའ་ཕུར་བུ།
༄༅། །བརྒྱུད་ལམ་ཁག་ནས་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༤ ཚེས་ ༡༠ ཉིན་རྨ་ཆུ་རྫོང་ཐོག་གི་ས་གནས་ཁག་ཏུ་སྦྱར་ཡིག་བཀྲམ་སྟེ། ས་གནས་བོད་རིགས་སློབ་ཐོན་པ་རྣམས་ལ་ལས་ཀ་རག་གི་མེད་པའི་དཀའ་ངལ་ཞིག་བཀོད་ཡོད་འདུག ཕྱི་ཚེས་ ༡༡ ཉིན་གྱི་སྔ་དྲོ་རྨ་ཆུ་རྫོང་དམངས་དོན་ལས་ཁུངས་ཀྱི་སྒོ་ཁར། ལས་མེད་སློབ་ཐོན་པ་མང་པོ་འདུ་འཛོམས་ཐོག ༼ཕྱི་ཡོང་སློབ་མ་སྔོན་འགོག ས་གནས་སློབ་མར་ལས་བགོ་༽ ཞེས་པ་བོད་ཡིག་དང་རྒྱ་ཡིག་གཉིས་ཀར་འཁོད་པའི་སྦྱར་བྱང་ཆེན་པོ་བཟུང་སྟེ་དངོས་སུ་ཞུ་འབོད་གནང་ཡོད་འདུག
སྦྱར་ཡིག་གི་ནང་དོན་གཤམ་གསལ།
གུས་པར་འོས་པའི་རྒྱ་ཆེའི་མང་ཚོགས་རྣམ་པ།
ང་ཚོ་ནི་རྨ་ཆུ་རྫོང་གི་སློབ་ཆེན་དང་འབྲིང་རིམ་སློབ་མ་ཤ་སྟག་ཡིན་ལ། སློབ་མཐར་ཕྱིན་ནས་མི་ལོ་ཁ་ཤས་འགོར་ཡོད་ནའང་གཏན་འཇགས་ཀྱི་ལས་གནས་ཞིག་བཀོད་སྒྲིག་མ་བྱས་པས། ང་ཚོས་ཡང་དང་བསྐྱར་དུ་གོང་རིམ་ལ་རེ་ཞུ་ཕུལ་ནའང་དེ་ལ་དེ་འཚམ་གྱི་ཐག་གཅོད་མ་གནང་བས་རྒྱ་ཆེའི་མང་ཚོགས་རྣམས་ལ་རྒྱུ་རྐྱེན་འགའ་བརྗོད་རྒྱུ།
ས་གནས་སློབ་མར་གཏན་འཇགས་ཀྱི་ལས་གནས་ཞིག་མ་རག་པའི་རྒྱུ་རྐྱེན་གཙོ་བོ།
༡༽ ངེད་ཅག་ལས་གནས་མེད་པའི་སློབ་བུ་དག་ལ་རང་ཉིད་ཀྱི་ཆེད་ལས་དང་འཚམ་པའི་ལས་བྱེད་དག་མའི་ལས་གནས་རེ་བཀོད་སྒྲིག་མི་བྱེད་པ་དང་། ས་གནས་སློབ་མའི་བསྡུ་ཚད་ཇེ་མང་དུ་མི་གཏོང་བ།
༢༽ གོང་དཔོན་པོས་རྒྱབ་རྩ་བྱས་ཤིང་ཐོབ་ཐང་སྒེར་གཅོད་བྱས་ཏེ་གཞན་ཡུལ་གྱི་སློབ་མ་དག་གི་ཁྱིམ་ཐོ་རང་རྫོང་དུ་སྤར་ནས་ངེད་སློབ་བུ་མང་པོ་ཞིག་གི་ལས་གནས་ལ་བར་ཆད་བཟོས་འདུག
༣༽ བྱ་བའི་ལས་ཞུགས་རྒྱུགས་གཞིའི་སྟེང་བོད་རིགས་རང་སྐྱོང་ཁུལ་གྱི་སློབ་བུ་དག་ལ་དམིགས་པའི་བོད་ཡིག་རྐྱང་རྐྱང་གི་རྒྱུགས་གཞི་ཞིག་མེད་པ། རྒྱ་ཆེ་བའི་ས་གནས་མང་ཚོགས་ཀྱིས་ང་ཚོའི་དོན་དངོས་འདི་ལ་བསམ་གཞིགས་གནང་སྟེ་ཕྱོགས་ཡོངས་ནས་ཐུགས་ཁུར་དང་རྒྱབ་སྐྱོར་གནང་རྒྱུ་མཁྱེན།
གསལ་བཤད་བྱ་རྒྱུར། རྒྱལ་ཁབ་ཀྱི་སློབ་གསོ་ཁོ་ན་ལས་ཆབ་སྲིད་དང་གཞན་གང་ལའང་འབྲེལ་བ་མེད།
ལས་གནས་མེད་པའི་མཐར་ཕྱིན་སློབ་མ་ཡོངས་ཀྱིས་གུས་འདུད་དང་བཅས།
༢༠༡༣ ལོའི་ཟླ་ ༤ ཚེས་ ༡༠ ཉིན།
