༢༠༡༣ ཟླ་ ༤ ཚེས་ ༩ རེས་གཟའ་མིག་དམར།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༤ ཚེས་ ༨ ཉིན་བོད་ནང་གི་ཆུ་ཚོད་ ༣།༣༠ ཙམ་ལ་དཀར་མཛེས་བོད་རིགས་རང་སྐྱོང་ཁུལ་སེར་ཤུལ་རྫོང་ཐོག་ཏུ། ཕ་མི་འགྱུར་དང་མ་ཡིད་དགའ་གཉིས་ཀྱི་བུ་རང་ལོ་ ༢༠ ལ་སོན་པའི་མང་དགེ་དགོན་པའི་གྲྭ་ཐུབ་དགེ་ལགས་ཀྱིས་༼༸རྒྱལ་བ་རིན་པོ་ཆེ་བོད་དུ་ཕེབས་འཇུག་དགོས།༽ ཞེས་སྐད་འབོད་བྱས་ཡོད་འདུག འོན་ཀྱང་དུས་ཡུན་རིང་པོ་མ་འགོར་བར་ས་གནས་ཉེན་རྟོག་པས་ཁོང་འཛིན་བཟུང་བྱས་ཏེ། ད་ལྟའི་ཆར་ཁོང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་རྟོགས་མེད་པའི་གནས་སུ་གྱུར་འདུག
ཁོང་ཆུང་དུས་ནས་མང་དགེ་དགོན་པའི་ཆོས་སྒོར་ཞུགས་ཏེ། དགོན་པའི་མཚན་ཉིད་སློབ་གྲྭའི་ནང་སློབ་གཉེར་གནང་བཞིན་ཡོད་འདུག་ལ། ནམ་རྒྱུན་རྩོམ་རིག་ལ་དགའ་མོས་དང་བོད་དོན་ལ་དོ་སྣང་ཆེན་པོ་ཡོད་མཁན་ཞིག་ཡིན་འདུག
སྤྱིར་བཏང་རྒྱ་ནག་གཞུང་གིས་དེ་སྔོན་ནས་སེར་ཤུལ་རྫོང་དུ་དམག་མི་འགྲེམས་འཇོག་གིས་དམ་བསྒྲགས་བྱེད་ཀྱི་ཡོད་པ་དང་། འདི་ལོའི་གསུམ་བཅུའི་དུས་དྲན་ཉིན་མང་དགེ་དགོན་པའི་དགེ་འདུན་པ་གཉིས་ཀྱིས་རྫོང་ཐོག་ཏུ་ངོ་རྒོལ་སྐད་འབོད་བྱས་རྗེས། དམག་མི་དང་ཉེན་རྟོག་པ་ཇེ་མང་དུ་བཏང་སྟེ་དགོན་གྲོང་གཉིས་ལ་སྔར་ལས་ལྷག་པའི་དམ་བསྒྲགས་དང་ལྟ་རྟོག་བྱེད་ཀྱི་ཡོད་འདུག་པ་བཅས། །
