༢༠༠༩ ཕྱི་ཟླ་ ༥ ཚེས་ ༢༠ རེས་གཟའ་ལྷག་པ།
༄༅། །ཀ་སྦུག་ས་གནས་གཞིས་ལས་ཁང་ནས་གོ་སྒྲིག་ཞུས་ཏེ་ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༣༡ སྔ་དྲོ་ཆུ་ཚོད་ ༡༠།༠༠ ཐོག་ཀ་སྦུག་ས་གནས་མ་ཎི་ལྷ་ཁང་དུ་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་མགྲོན་ལྷན་འཛོམས་གནང་བའི་ཐོག་ཀ་སྦུག་བོད་གཞུང་གཏན་སློབ་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བཏང་གྲུབ་མཚམས་སྐུ་མགྲོན་རྣམ་པས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་དཔར་མཐོང་གྲོལ་རིན་པོ་ཆེར་མཇལ་དར་རྐྱང་འབུལ་གནང་། དེ་རྗེས་བོད་གཞུང་མང་བཙན་བྱོལ་དུ་འབྱོར་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་སྲུང་བརྩིའི་སྐབས་ཀ་སྦུག་གྲོང་ཁྱེར་གྱི་སྲང་ལམ་གཡས་གཡོན་གང་སར་རྒྱ་གར་གཞུང་མང་ཡོངས་ལ་ཐུགས་རྗེ་ཆེ་ཞེས་པ་ཡི་གེར་བྲིས་པའི་ཕྲེད་དར་དཔྱངས་པ་ཙམ་དུ་མ་ཟད། བརྩིགས་ལྡེབ་དང་། ཚོང་ཁང་། ཟ་ཁང་བཅས་སུ་སྦྱར་ཡིག་མཐོང་རྒྱུ་ཡོད་པ་བཟོས་ཡོད། གལ་འགངས་ཆེ་བའི་དུས་དྲན་འདིར་ས་གནས་ཀྱི་གནད་ཡོད་མི་སྣ་དང་སྐུ་མགྲོན་སོགས་ལ་ས་གནས་འགོ་འཛིན་ལས་ཁུངས་ནས་ཉིན་གུང་གི་གསོལ་སྟོན་ཟབ་རྒྱས་བཤམས། རྒྱ་གར་གཞུང་མང་ཡོངས་ལ་ཐུགས་རྗེ་ཆེ་ཞུའི་མཛད་སྒོ་དེ་བཞིན་ཉིན་གྲངས་གསུམ་བསྟུད་མར་ས་གནས་ཀྱི་བརྙན་འཕྲིན་བརྒྱུད་ལམ་ཐོག་བསྟན་པ་སོགས་དགེ་མཚན་ཆེན་པོ་བྱུང་བའི་གནས་ཚུལ་དུ།།
