༢༠༡༣ ཟླ་ ༤ ཚེས་ ༦ རེས་གཟའ་སྤེན་པ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱ་ནག་གཞུང་གིས་ནག་ཆུའི་ཆབ་སྲིད་བཙོན་པ་ཟླ་བ་རྒྱལ་མཚན་ལགས་ལོ་བཅོ་བརྒྱད་ཀྱི་ཁྲིམས་ཐག་བཅད་དེ་ད་བར་ལོ་ངོ་བཅུ་དྲུག་རིང་བཙོན་འཇུག་བྱས་ནས་ཉེ་ལམ་གློ་བུར་གློད་བཀྲོལ་བཏང་ཡོད་འདུག
དེ་ཡང་བོད་རང་སྐྱོང་ལྗོངས་ཟེར་བའི་ཁོངས་ཀྱི་ནག་ཆུ་ཁུལ་ཤན་ཚ་རྫོང་ནས་ཡིན་པའི་རང་ལོ་ ༤༧ ལ་སོན་པའི་ས་གནས་དེའི་དངུལ་ཁང་གི་རྩིས་པ་ཟླ་བ་རྒྱལ་མཚན་ལགས་དང་། ཁོང་དང་ཕ་གཅིག་མ་གཅིག་སྤུན་མཆེད་ནག་ཆུ་ཞབས་བརྟན་དགོན་པའི་དགེ་འདུན་པ་ཉི་དོན་གྲུབ་ལགས། དེ་བཞིན་དགོན་དེའི་དགེ་འདུན་པ་མ་མཛོ་ལགས་དང་ཨ་རྒྱ་ལགས་སོགས་ནས་ཕྱི་ལོ་ ༡༩༩༦ ལོར་ཆབ་སྲིད་ཀྱི་ཡིག་ཆ་དྲིལ་བསྒྲགས་བྱས་པའི་རྐྱེན་གྱིས་ལོ་དེའི་ནང་ལྷ་ས་ནས་ཉེན་རྟོག་པས་འཛིན་བཟུང་གིས་གསར་བརྗེར་ངོ་རྒོལ་དྲིལ་བསྒྲགས་ངན་བསྐུལ་ཟེར་བའི་ཉེས་མིང་འོག་ཟླ་བ་རྒྱལ་མཚན་ངན་བསྐུལ་བྱེད་གཏེར་བརྩིས་ཏེ་མི་ལོ་ ༡༨ རིང་དུས་བཀག་བཙོན་འཇུག་གི་ཁྲིམས་ཆད་བཏང་བ་མ་ཟད། ཁོང་གི་སྤུན་མཆེད་ལ་དུས་བཀག་བཙོན་འཇུག་ལོ་བཅོ་ལྔའི་ཁྲིམས་ཐག་བཅད་འདུག དེ་བཞིན་དགེ་འདུན་པ་གཉིས་ལ་ལོ་བརྒྱད་རེ་ཁྲིམས་ཐག་བཅད་ཡོད་འདུག
ཟླ་བ་རྒྱལ་མཚན་ལགས་ཁྲིམས་ཐག་བཅད་རྗེས་གྲྭ་བཞི་བཙོན་ཁང་དུ་བཙོན་འཇུག་བྱས་ཡོད་ཀྱང་ཕྱིས་སུ་ཆུ་ཤུལ་བཙོན་ཁང་གསར་རྒྱག་བྱས་རྗེས་དེར་སྤོ་སྐྱེལ་བྱས་འདུག བཙོན་ཁང་ནང་གི་བཙོན་སྲུང་བ་སོགས་ཀྱིས་ཁོང་ལ་དམིགས་བསལ་དམ་བསྒྲགས་བྱས་ཡོད་པ་མ་ཟད། ཕྱི་ལོ་ ༢༠༠༨ ལོར་བོད་ནང་གི་ཞི་རྒོལ་ཆེན་མོའི་སྐབས་ཟླ་བ་རྒྱལ་མཚན་ལགས་དང་སྒྲོལ་མ་སྐྱབས་ལགས། ཚེ་རིང་དབང་ཕྱུག་ལགས་སོགས་ཆབ་བཙོན་ཁག་གཅིག་བཙོན་ཁང་ནང་གི་དམ་བསྒྲགས་ཁང་དུ་ཟླ་བ་དྲུག་ལྷག་ཙམ་བཅུག་ཡོད་འདུག ཟླ་བ་རྒྱལ་མཚན་ལགས་ཀྱིས་མི་ལོ་ ༡༦ རིང་བཙོན་འཇུག་གིས་མནར་གཅོད་ཚད་མེད་མྱངས་ཏེ། ཟླ་བ་སྔོན་མའི་ནང་རྒྱ་གཞུང་གིས་དུས་བཀག་བཙོན་འཇུག་གི་དུས་ཡུན་ལོ་ ༢ ལས་ལྷག་མེད་པའི་སྐབས་སུ་གློ་བུར་གློད་བཀྲོལ་བཏང་ཡོད་འདུག
ཉེ་སྔོན་ཟླ་བ་རྒྱལ་མཚན་ལགས་བཙོན་ཁང་དུ་སྡོད་རིང་སྤྱོད་པ་ཡག་པོ་ཡོད་པའི་དབང་གིས་དུས་བཀག་བཙོན་འཇུག་གི་དུས་ཡུན་མ་ཚང་སྔོན་དུ་གློད་བཀྲོལ་བཏང་ཡོད་སྐོར་ཙམ་ལས་ཞིབ་ཕྲའི་གནས་ཚུལ་བརྗོད་མེད་ཀྱང་། ས་གནས་བོད་མི་ཚོས་རྒྱ་གཞུང་གིས་ཁོང་བཙོན་ཁང་དུ་སྡོད་རིང་གཅར་རྡུང་མནར་གཅོད་ཚད་མེད་བཏང་སྟེ་རྐང་པ་ཡ་གཅིག་ནད་གཅོང་དུ་གྱུར་ཏེ། ཉེ་ལམ་བར་བདག་པོ་མ་བརྒྱབ་པར་བརྟེན་ན་ཚ་ཇེ་སྡུག་ཏུ་ཕྱིན་པའི་དབང་གིས་གློད་བཀྲོལ་བཏང་ཡོད་པར་ངོས་འཛིན་བྱེད་ཀྱི་ཡོད་པའི་གནས་ཚུལ་ཐོན་འདུག་པ་བཅས། །
