༢༠༡༠ ཟླ་ ༨ ཚེས་ ༡༡ རེས་གཟའ་ལྷག་པ།
༄༅། བལ་ཡུལ་རྣམ་རྒྱལ་སློབ་གྲྭའི་ངེས་སྟོན་པ་དབང་འདུས་ཕུན་ཚོགས་ལགས་ཀྱི་ལོ་རྒྱུས་སྙིང་བསྡུས།
དེ་ཡང་དམ་པ་ཁོང་ནི་བོད་སྟོད་ཤེལ་དཀར་དུ་ཕ་ངག་དབང་སྟོབས་རྒྱལ་ལགས་དང་། མ་དཔལ་ལྡན་ཚེ་རིང་གཉིས་སུ་ཕྱི་ལོ་ ༡༩༥༤ ལོར་སྐྱེས། བོད་ལ་རྒྱ་དམར་གྱིས་བཙན་འཛུལ་བྱས་རྗེས་རྒྱ་གར་ལ་སྐྱབས་བཅོལ་དུ་འབྱོར་ནས་(Sherwood College Nainital)ཤེར་ཝུ་ཌི་ནཱ་ནི་ཏཱལ་སློབ་གྲྭ་ནས་ཐོན་པ་དང་། དེ་ནས་ལྡི་ལིར་ཆབ་སྲིད་འཛིན་སྐྱོང་ལས་རིགས་སློབ་སྦྱོང་ཟླ་དྲུག་གནང་སྟེ་ཕྱི་ལོ་ ༡༩༧༤ ལོ་ནས་མ་སུ་རི་བོད་ཁྱིམ་དུ་དགེ་རྒན་དང་། (SOS)རོགས་སྐྱོར་སྡེ་ཚན་གྱི་དྲུང་ཡིག་དང་འགན་འཛིན་ཡང་གནང་ཡོད། ཕྱི་ལོ་ ༡༩༨༧ ནས་གཞུང་ཞབས་སུ་བཞུགས་ཏེ་ཤེས་རིག་ལས་ཁུངས་སུ་གཞོན་དྲུང་གནས་རིམ་དུ་ཕྱག་ལས་གནང་བ་དང་། ཕྱི་ལོ་ ༡༩༩༡ ནས་གནས་བརྒྱད་པར་གནས་སྤར་གྱིས་རྒན་དྲུང་དང་། ཕྱི་ལོ་ ༡༩༩༢ ནས་སྡེ་ཚན་འགན་འཛིན་དུ་བསྐོ་གཞག་གནང་། ཕྱི་ལོ་ ༡༩༩༣ ནས་ལོ་གཉིས་རིང་བལ་ཡུལ་རྣམ་རྒྱལ་མཐོ་སློབ་ཏུ་ངེས་སྟོན་པར་ཞབས་གཡར་ཞུས་པ་དང་། ཕྱི་ལོ་ ༡༩༩༤ ལོར་དྲུང་གཞོན་ལས་རོགས་སུ་གནས་སྤར་དང་། ཕྱི་ལོ་ ༡༩༩༥ ནས་རྣམ་རྒྱལ་མཐོ་སློབ་ཀྱི་ངེས་སྟོན་པར་མུ་མཐུད་ལོ་ ༢ ཞབས་གཡར་ཞུས། ཕྱི་ལོ་ ༡༩༩༧ ལོར་དྲུང་གཞོན་དུ་གནས་སྤར་གྱིས་སླར་ཡང་ལོ་ ༢ རིང་ཞབས་གཡར་ཞུས། ཕྱི་ལོ་ ༡༩༩༩ ནས་ལོ་ ༢ རིང་ཕོགས་མེད་གུང་སེང་དགོངས་ཞུ་དང་ཕྱི་ལོ་ ༢༠༠༡ ནས་གཞུང་ཞབས་ཁོངས་ནས་དངོས་སུ་རྩ་དགོངས་ཞུས་ཡོད་ནའང་རྣམ་རྒྱལ་མཐོ་སློབ་ཀྱི་ངེས་སྟོན་པ་གནང་མུས་ཐོག་རང་རིགས་མ་འོངས་བོད་ཀྱི་སོན་རྩར་གྱུར་བའི་སློབ་ཕྲུག་མང་དག་ཅིག་ལ་སློབ་གསོའི་བྱ་གཞག་ཐད་གཟེངས་སུ་ཐོན་པའི་ཞབས་ཞུ་གནང་ཡོད་པ་མ་ཟད། བལ་ཡུལ་ནང་ཧི་མ་ལ་ཡའི་བུ་ཕྲུག་དང་བཅས་པར་ད་ལྟའི་བར་མི་ལོ་ ༣༦ རིང་མི་རབས་རྗེས་མ་གསོ་སྐྱོང་གི་ཤེས་ཡོན་འཛིན་སྐྱོང་ཐད་ཕྱག་ལས་འབུར་དུ་ཐོན་པ་ལྷག་བསམ་རྣམ་དག་ཞུ་མཁན་ཞིག་ཡིན་འདུག
