༢༠༡༣ ཟླ་ ༤ ཚེས་ ༢ རེས་གཟའ་མིག་དམར།
༄༅། །འདི་གར་ཕྱི་ལོ་ ༢༠༡༣ ཟླ་ ༤ ཚེས་ ༢ ཉིན་ཁུངས་ལྡན་གནས་ཚུལ་འབྱོར་དོན་ལྟར་ན། བླ་བྲང་བསང་ཆུ་རྫོང་རྒན་རྒྱ་སྡེ་བ་ནས་ཡིན་པའི་ཆབ་སྲིད་བཙོན་པ་འཇིགས་མེད་རྒྱ་མཚོ་འམ་༼ཡི་དམ་ཚེ་རིང་༽ལགས་དུས་བཀག་བཙོན་འཇུག་ལོ་ ༡༧ གྱི་ཁྲིམས་ཆད་འཁུར་མུས་ནས་ཕྱི་ལོ་ ༢༠༡༣ ཟླ་ ༣ ཚེས་ ༣༠ ཉིན་ད་ལྟའི་བོད་རང་སྐྱོང་ལྗོངས་ཟེར་བའི་ཁོངས་གཏོགས་ལྷ་སའི་ཆུ་ཤུལ་བཙོན་ཁང་ཞེས་པ་ནས་གློད་བཀྲོལ་བཏང་སྟེ་ལྷ་སར་སྡོད་མ་བཅུག་པར་ཐད་ཀར་ཁོང་གི་འཁྲུངས་ཡུལ་བླ་བྲང་རྒན་རྒྱ་སྡེ་བར་རྩིས་སྤྲོད་བྱས་ཡོད་འདུག
འཇིགས་མེད་རྒྱ་མཚོའམ་ཡི་དམ་ཚེ་རིང་ལགས་ནི་ཕ་ནོར་བུ་དང་མ་༼ཚེ་འདས་༽མཁའ་འགྲོ་ཚེ་རིང་གཉིས་ཀྱི་རིགས་མྱུག་ཏུ་ཕྱི་ལོ་ ༡༩༦༡ ལོར་ཨ་མདོ་བླ་བྲང་རྒན་རྒྱ་སྡེ་བ་མཐའ་གྲོང་དུ་འཁྲུངས་ཡོད། ཁོང་རང་དེ་སྔ་བོད་ཀྱི་དགའ་ལྡན་དགོན་པའི་དགེ་འདུན་པ་ཡིན་ཞིང༌། ཕྱི་ལོ་ ༡༩༩༦ ཟླ་ ༣ ཚེས་ ༣༠ ཉིན་ལྷ་ས་གྲོང་ཁྱེར་སྤྱི་བདེ་ཅུས་ཁྲེང་ཀོན་ཆུས་སྤྱི་བདེ་ཡན་ལག་ཅུས་ཟེར་བས་ཁོང་དང་མལ་དྲོ་གུང་དཀར་རྫོང་ཁོངས་ནས་ཡིན་པ་དར་རྒྱས་ཟླ་བ་ལགས། ཚེ་བརྟན་ལགས་༼ཆོས་མིང་བསྟན་འཛིན་འཕྲིན་ལས་༽ བློ་བཟང་འོད་ཟེར་ལགས། ཟླ་བ་ཚེ་རིང༌ལགས། ཚེ་རིང་ཕུན་ཚོགས་ལགས། བསོད་ནམས་བག་གྲོ་ལགས། ལུང་རྟོགས་ལགས། གཞིས་རྩེ་ས་ཁུལ་ས་སྐྱ་རྫོང་ནས་ཡིན་པ་ཡེ་ཤེས་འཇམ་དབྱངས་ལགས་སོགས་གློ་བུར་འཛིན་བཟུང་བྱས་ཡོད། ཁོང་རྣམ་པས་ཕྱི་ལོ་ ༡༩༩༢ ལོར་དགའ་ལྡན་དགོན་པར་བོད་རང་བཙན་བདེན་དོན་རྩོད་ལེན་ཚོགས་ཆུང་ཟེར་བའི་ཚོགས་པ་བཙུགས་ཏེ་བོད་ཀྱི་རྒྱལ་དར་མདུན་དུ་མནའ་སྐྱེལ་དམ་བཅའ་ཕུལ་བ་དང༌། གོང་གསལ་ཁོངས་ནས་ཁྲོམ་སྐོར་ནང་ཞུགས་རྒྱུའི་བོད་མི་དྲུག་ལ་ཁ་བཏགས་བཏང་བ། ཁྲོམ་སྐོར་རྗེས་བཙོན་འཇུག་ཕོག་པའི་མི་སྣ་དྲུག་པོར་སླར་ཡང་བཙོན་དུ་འཚམས་འདྲིར་མངགས་པ།
ཕྱི་ལོ་ ༡༩༩༣ ལོར་དགའ་ལྡན་དུ་བོད་ཀྱི་རྒྱལ་དར་སྦྱར་འགྲེམས་བྱས་པ་སོགས་ཀྱི་གནས་ཚུལ་དང་གཙོ་བོའི་འབྲེལ་བ་ཡོད་པའི་ཉེས་འཛུགས་བྱས་ཡོད་པ་མ་ཟད། ཁྲིམས་འགལ་གྱིས་གསར་བརྗེར་ངོ་ལོག་ཚོགས་པ་རྩ་འཛུགས་དང་སྣེ་ཁྲིད་བྱས་པའི་ཉེས་འཛུགས་འོག་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བ་ནས་ཕྱི་ལོ་ ༡༩༩༦ ཟླ་ ༡༡ ཚེས་ ༢༣ ཉིན་འཇིགས་མེད་རྒྱ་མཚོ་ལགས་སུ་དུས་བཀག་བཙོན་འཇུག་ལོ་ ༡༥ དང་ཆབ་སྲིད་ཁེ་དབང་ལོ་ ༥ འཕྲོག་རྒྱུའི་གཏན་འབེབས་བྱས་པ་མ་ཟད། ཁོང་དང་འབྲེལ་བ་ཡོད་པའི་མི་སྣ་རྣམས་ལོ་ལྔ་རེའི་དུས་བཀག་བཙོན་འཇུག་ཁྲིམས་ཆད་བཏང་སྟེ་གྲྭ་བཞི་བཙོན་ཁང་དུ་བཙོན་འཇུག་བྱས་ཡོད།
ཁོང་བཙོན་འཇུག་བྱེད་མུས་སྐབས་ཕྱི་ལོ་ ༡༩༩༧ ལོར་ཀན་སུའུ་ཞིང་ཆེན་བདེ་འཇགས་ཐིང་གི་མི་སྣ་ལྷ་སར་ཡོང་སྟེ་ཁོང་གྲྭ་བཞི་བཙོན་ཁང་དུ་བཙོན་འཇུག་བྱེད་མུས་ནས་ལྷ་སའི་བདེ་འཇགས་ཐིང་དུ་ཉིན་མཚན་དགུའི་འདྲི་གཅོད་བྱ་རྒྱུར་ཆེད་སྐོང་གིས་ཉེས་བརྡུང་ཚད་མེད་བཏང་རྗེས་དུས་དེ་ནས་ཁོང་གི་རྐང་པ་གཡས་པ་སྐྱོན་ཅན་དུ་གྱུར་འདུག ཕྱི་ལོ་ ༡༩༩༨ ཟླ་ ༥ ཚེས་ ༡ དང་ ༤ སོ་སོར་གྲྭ་བཞི་བཙོན་ཁང་ནང་ངོ་རྒོལ་བྱུང་སྟེ་ཆབ་སྲིད་བཙོན་པ་ཉེས་རྡུང་འོག་འདས་གྲོངས་གྱུར་བ་དང་མནར་གཅོད་ཚད་མེད་ཕོག་པའི་སྐབས་སུ་ཁོང་ལའང་ཉེས་རྡུང་ཕོག་ཡོད།
ཕྱི་ལོ་ ༢༠༠༤ ཟླ་ ༣ པའི་ནང་གྲྭ་བཞི་བཙོན་དུ་སྡོད་མུས་སྐབས་༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག་ཅེས་སྐད་འབོད་བྱས་པ་སོགས་ལས་དུས་བཀག་བཙོན་འཇུག་ལོ་ ༢ འཕར་མ་བཏང་སྟེ་མཐར་དུས་བཀག་བཙོན་འཇུག་ལོ་ ༡༧ མྱངས་དགོས་བྱུང་ཡོད། གྲྭ་བཞི་བཙོན་ཁང་ནང་ཡོད་པའི་ཆབ་སྲིད་བཙོན་པ་རྣམས་ལྷ་སའི་ཆུ་ཤུལ་བཙོན་ཁང་དུ་སྤོས་སྐྱེལ་རྗེས་ཁོང་ཡང་ཕྱི་ལོ་ ༢༠༠༥ ལོ་ཙམ་དུ་ལྷ་སའི་ཆུ་ཤུལ་བཙོན་ཁང་དུ་སྤོ་སྐྱེལ་བྱས་འདུག བཙོན་ཁང་ནང་བཞུགས་རིང་ཐོག་མའི་ལངས་ཕྱོགས་བརྟན་པོར་བཟུང་སྟེ་དཀའ་སྡུག་བཟོད་བསྲན་གྱིས་རང་ཉིད་ཀྱི་དགོས་འདུན་ཁག་འབྲེལ་ཡོད་ལ་ཐད་ཀར་བརྗོད་པ་སོགས་ལས་དམིགས་བསལ་ཉེས་རྡུང་དང་ཟུར་བཀག་བྱས་པ་མ་ཟད། ཐུག་འཕྲད་བཀག་པ་སོགས་སྡུག་སྦྱོང་ཚད་མེད་མྱངས་ཏེ་བཙོན་དུ་སྡོད་རིང་སྤྱི་བདེའི་སྨན་ཁང་དུའང་ཐེངས་འགའ་ཤས་བསྐྱལ་དགོས་བྱུང་འདུག ལྷག་པར་ཕྱི་ལོ་ ༢༠༡༠ ཟླ་ ༡༡ ཙམ་ནས་བཙོན་པ་སྤྱི་ཡོངས་དང་མཉམ་དུ་མ་བཞག་པར་ཟུར་བཀག་བྱས་པ་སོགས་ཚད་ལས་འདས་པའི་མནར་གཅོད་མྱངས་དགོས་བྱུང་ཡོད།
ད་ལྟའི་ཆར་ཁོང་གློད་བཀྲོལ་བཏང་ཡོད་ཀྱང་ཁྱིམ་དུ་ཕ་མ་གཉིས་ཀ་དེ་སྔ་ནས་འདས་གྲོངས་སུ་གྱུར་བ་དང་། ལུས་པོའི་སྤྱི་ཡོངས་གནས་སྟངས་ཞན་པོ་ཡོད་ཁར། རྐང་པ་སྐྱོན་ཅན་དུ་གྱུར་ཟིན་པ་མ་ཟད། མིག་ཀྱང་དེ་ཙམ་ཡག་པོ་མེད་པའི་གནས་སྟངས་ཧ་ཅང་ཞན་པོ་ཡོད་པའི་གནས་ཚུལ་ཐོན་འདུག་པ་བཅས། །
