༢༠༡༣ ཟླ་ ༤ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༣༠ ཉིན་ཕྱི་དྲིལ་དྲུང་ཆེ་བཀྲིས་ཕུན་ཚོགས་ལགས་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་ནས་གོ་སྒྲིག་འོག་རྒྱ་དམར་གྱི་མི་སྤྱོད་ལས་འདས་པའི་གདུག་རྩུབ་ཅན་གྱི་སྲིད་བྱུས་ལག་བསྟར་གྱིས་སྲེག་བཞིན་པའི་བོད་ནང་གི་ཛ་དྲག་གནས་སྟངས་སྐོར་བོད་མཁས་པའི་བགྲོ་གླེང་ཚོགས་འདུའི་མཇུག་སྡོམ་གྱི་གསུང་བཤད་གནང་ཡོད།
དེ་ཡང་ཉིན་དེའི་ཕྱི་དྲོ་ཆུ་ཚོད་ ༣ ཐོག་སྐུ་མགྲོན་དང་བགྲོ་གླེང་གཏམ་བཤད་གནང་མཁན་རྣམ་པ། བགྲོ་གླེང་དུ་མཉམ་ཞུགས་བ་རྣམས་ལྷན་འཛོམས་ཐོག་དྲུང་ཆེ་བཀྲིས་ཕུན་ཚོགས་ལགས་ཀྱིས་གསུང་བཤད་གནང་དོན། བོད་ཀྱི་མཁས་པའི་བགྲོ་གླེང་འདིའི་ཐོག་ནས་བོད་ཀྱི་ཛ་དྲག་གནས་ཚུལ་ལ་གཟིགས་ཕྱོགས། བསམ་ཚུལ། དགོངས་ཚུལ། སློབ་སྟོན། ལམ་སྟོན་གནད་འཁེལ་བ་ཞིག་གནང་ཐུབ་པ་ཡིན་ན། རང་བཞིན་བོད་ནང་གི་ཛ་དྲག་གནས་ཚུལ་སྐྱོབ་ཐབས་ཡིན་ནའང་རེད། མི་མང་དང་གཞུང་། གྲོས་ཚོགས་ཚང་མའི་ཐོག་ནས་ལས་འཆར་གསར་པ་སྤེལ་རྒྱུར་ཁྱད་པར་ཡོང་རྒྱུ་ཡིན། བརྗོད་གཞིའི་ཐོག་ཆ་བཞག་ནའང་གནས་ལ་འཇུག་པོ། ཚིག་ལ་ནན་པོ། དེ་བཞིན་གྱི་གནས་ཚུལ་མང་པོ་བསྡུས་པའི་བརྗོད་གཞི་ཞིག་གནང་ཡོད། དེར་བརྟེན་རྣམ་པ་ལྷན་རྒྱས་ཀྱིས་གྲོས་གཞི་ཚིག་རེ་རེའི་ཐོག་དགོངས་པ་བཞེས་ཏེ་དོན་ལ་མཁས་པའི་དགོངས་ཚུལ་གསུང་པར་ཡིད་ཆེས་ཡོད་ལ་རེ་འདུན་ཡང་ཞུ་རྒྱུ་ཡིན།
རྒྱ་ནག་གི་མི་སྤྱོད་ལས་འདས་པའི་བོད་ནང་གདུག་རྩུབ་སྲིད་བྱུས་དེར་སྲེག་བཞིན་པའི་བོད་ཅེས་པའི་ཐ་སྙད་ཅིག་ཐོག་ནས་བགྲོ་གླེང་ཕྱིན་པ་རེད། རྒྱ་ནག་གི་བོད་ནང་ལག་བསྟར་བྱེད་བཞིན་པའི་གདུག་རྩུབ་སྲིད་བྱུས་གཙོ་བོར་བཟུང་ནས་བགྲོ་གླེང་གནང་ཡོད། དེ་བཞིན་བོད་ནང་གནས་ཚུལ་ཛ་དྲག་ཆགས་རྒྱུ་དེ་རང་ལུས་མེར་སྲེག་གིས་རྐྱེན་པས་འབར་བཞིན་པའི་བོད། ཅེས་པའི་ཐ་སྙད་ཀྱང་ཡོད་སྟབས་ཐ་སྙད་མི་འདྲ་བ་དེར་སྐད་ཡིག་སོ་སོའི་ཐོག་གནད་ལ་འཁེལ་བ་ཞིག་གཏན་འབེབས་ཡོང་བའི་རེ་འདུན་ཞུ་བཞིན་ཡོད།
དཔེར་ན། ཉེ་ཆར་བརྙན་འཕྲིན་ཞིག་ནང་རྒྱ་ནག་གི་སྲིད་འཛིན་གསར་པ་ཕེབས་པའི་གཏམ་བཤད་དེ་དང་འབྲེལ་བའི་དཔྱད་གླེང་མང་པོ་ཞིག་ཡོང་བཞིན་པའི་ནང་ཚིག་རེར་ཉམས་ཞིབ་བྱས་པའི་ནང་ཚིག་གི་ཐ་སྙད་དེ་ཚོ་ཡིན་ཡང། གོ་བ་དང་འགྲེལ་བཤད་མ་ནོར་བ་མ་ཟད། ཚིག་སྒྱུར་ཡང་མ་ནོར་བ་དགོས་རྒྱུ་གལ་ཆེན་པོ་རེད་བསམ་གྱི་འདུག བརྙན་འཕྲིན་ཐོག་རྒྱའི་རྨི་ལམ་ཤོད་ཀྱི་འདུག དེའི་ཐོག་ང་ཚོ་དགོངས་པ་བཞེས་པ་ཡིན་ན། རྒྱའི་རྨི་ལམ་དེ་ང་ཚོ་དང་འབྲེལ་བ་ཆགས་ཀྱི་ཡོད་སྟབས་རྨི་ལམ་གང་འདྲ་ཞིག་རེད། གལ་སྲིད་རྨི་ལམ་ཡིན་པ་དང་དེ་མ་ཡིན་པར་ཕུགས་བསམ་གྱི་གོ་དོན་ཡོད་ན། ང་ཚོའི་ལྟ་ཕྱོགས་གང་འདྲ་ཞིག་རེད། ང་ཚོའི་ལངས་ཕྱོགས་ག་རེ་རེད། སྲིད་བྱུས་དེར་དཔག་པའི་དགོངས་པ་བཞེས་སྟངས་དགོས་སྐོར་སོགས་ཀྱི་གསུང་བཤད་གནང་བ་མ་ཟད། རང་རེའི་བོད་མི་སྤྱི་དང་དམིགས་བསལ་མཁས་དབང་དང་རྩོམ་པ་པོ་རྣམས་ཀྱིས་ནང་ཁུལ་གསར་འཕྲིན་བརྒྱུད་ལམ་དང་དྲ་རྒྱ་ཙམ་མིན་པར་རྒྱ་ཆེའི་རྒྱལ་སྤྱིའི་གསར་ལམ་ཐོག་བོད་ཀྱི་གནད་དོན་སྤེལ་རྒྱུ་གལ་ཆེ་ཡིན་པའི་འབོད་སྐུལ་ཞུས་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་འཕར་བློ་བཟང་ལགས་ཀྱིས་ཐུགས་རྗེ་ཆེ་ཞུས་ཏེ་ཉིན་གཉིས་རིང་ཚོགས་པའི་བགྲོ་གླེང་གྲོལ་བ་བཅས། །
