༢༠༠༩ ཕྱི་ཟླ་ ༥ ཚེས་ ༡༢ རེས་གཟའ་མིག་དམར།
༢༠༠༩ ཕྱི་ཟླ་ ༥ ཚེས་ ༦ ཉིན་བོད་མིའི་ཆོས་སྲིད་གཉིས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ ནིའུ་ཡོཀ་མངའ་སྡེའི་རྒྱལ་ས་ཨལ་བྷ་ནི་(Albany)གྲོས་ཚོགས་གོང་མར་གདན་ཞུས་ལྟར་མར་ཆིབས་སྒྱུར་དང་སྦྲགས་གྲོས་ཚོགས་ཀྱི་འཐུས་མི་རྣམས་དང་མཇལ་འཕྲད་ཀྱིས་ཨ་རིའི་མང་གཙོའི་ལམ་ལུགས་ལ་བསྔགས་བརྗོད་དང་ཆབ་སྲིད་པ་ཡག་པོ་ཞིག་གནང་ཕྱོགས་བཅས་ཀྱི་ཐོག་ལ་ལམ་སྟོན་བཀའ་སློབ་སྩལ་ཡོད།
༸གོང་ས་མཆོག་ནས་ནིའུ་ཡོཀ་ཨལ་བྷ་ནི་གྲོས་ཚོགས་གོང་མའི་ནང་བཀའ་སློབ་སྩོལ་བཞིན་པ།
དེ་ཡང་ཐེངས་འདིའི་ཆིབས་སྒྱུར་ཐོག་གཞུང་འཛིན་ཚོགས་པའི་ཚོགས་གཙོ་སྐུ་ཞབས་མལ་ཁོ་ལོམ་ཨེ་སེ་མི་ཐ་(Malcolm A. Smith)མཆོག་གིས་གྲོས་ཚོགས་ཚོགས་ཁང་གི་ཕྱིར་ཕེབས་བསུར་བཅར་བ་ཡོད་པ་མ་ཟད་གྲོས་ཚོགས་ཀྱི་ཕྱོགས་འགལ་ཚོགས་པའི་དབུ་ཁྲིད་སྐུ་ཞབས་ཌིན་ཀི་ལོ་སེ་(Dean Skelos)མཆོག་ནས་ཀྱང་ལྷན་དུ་ཕེབས་བསུ་ཞུས་ཏེ་གྲོས་ཚོགས་ཁང་དུ་གདན་འདྲེན་ཞུས་ཡོད།
ཕྱོགས་གཡས་སུ་ཡོད་པའི་གཞུང་འཛིན་ཚོགས་པའི་ཚོགས་གཙོ་སྐུ་ཞབས་མལ་ཁོ་ལོམ་ཨེ་སེ་མི་ཐ་ནས་༸གོང་ས་མཆོག་གྲོས་ཚོགས་སུ་གདན་འདྲེན་ཞུ་བཞིན་པ།
མངའ་སྡེའི་གྲོས་ཚོགས་ཀྱི་འཐུས་མི་ ༦༢ ལས་གྲུབ་པའི་ལྷན་ཚོགས་དེའི་ཐོག་༸གོང་ས་མཆོག་ནས་ཨ་རིའི་མང་གཙོའི་ལམ་ལུགས་དང་། འགྲོ་བ་མིའི་ཐོབ་ཐང་། དྲང་བདེན། རང་དབང་སོགས་ལ་ཡི་རང་བསྔགས་བརྗོད་གནང་བ་དང་འབྲེལ་གཉན་འཕྲང་ཅན་གྱི་དུས་ཚོད་སོགས་ཡོང་སྐབས་ཆབ་སྲིད་པ་ཚོས་དྲང་པོ་དྲང་བཞག་དང་ཕྱི་གསལ་ནང་གསལ་དགོས་རྒྱུ་གལ་ཆེ་ཡིན་ཁར་བྱམས་བརྩེ་ལྡན་པ་ཞིག་བྱུང་ན་དཀའ་ངལ་གང་འདྲ་ཞིག་ཡིན་རུང་སེལ་རྒྱུར་ཕན་ཐོགས་ཆེ་བ་ཡོད་སྐོར་དང་། ལྷག་པར་དུ་༸གོང་ས་མཆོག་ནས། ཆོས་ཕྱོགས་ཀྱི་གསུང་ཆོས་གནང་རྒྱུ་དང་ཆབ་སྲིད་ཀྱི་མཚོན་འགྲོ་བ་མིའི་བྱ་གཞག་གང་འདྲ་ཞིག་ཡིན་རུང་སྒེར་གྱི་ཀུན་སློང་ལ་ཧ་ཅང་རག་ལུས་ཡོད། སྤྱིར་ལམ་ལུགས་ཡག་པོ་ཞིག་ཡོད་རུང་མི་སྒེར་གྱི་ཀུན་སློང་ཡག་པོ་མེད་ཚེ་དེས་གྲུབ་འབྲས་ལྡན་པ་ཡོང་རྒྱུ་ཁག་པོ་ཡིན་སྐོར་སོགས་ཀྱི་ཐོག་ལ་ལམ་སྟོན་བཀའ་སློབ་ཀྱང་ཕེབས་ཡོད།
༸གོང་ས་མཆོག་ནས་ཨལ་བྷ་ནིར་ཡོད་པའི་པ་ལ་སེ་ཚོགས་ཁང་དུ་མི་མང་ལ་བཀའ་སློབ་བཀའ་དྲིན་སྩོལ་བཞིན་པ།
ཐེངས་འདིའི་གྲོས་ཚོགས་ཀྱི་དབུ་འབྱེད་དུ་༸གོང་ས་མཆོག་ཆིབས་སྒྱུར་བསྐྱངས་པ་དང་བསྟུན་ཁུལ་དེའི་གྲོས་ཚོགས་ཀྱི་འཐུས་མི་རྣམ་པས། མགོན་པོ་གང་ཉིད་ཀྱི་སྐུ་ཚེ་ཧྲིལ་པོ་གོ་ལའི་སྤྱི་ཚོགས་ཁྲོད་ཞི་བདེ་དང་འཚེ་བ་མེད་པའི་ལྟ་གྲུབ་གོང་འཕེལ་སླད་སྐུ་ངལ་འཛེམ་མེད་བསྐྱོན་པར་ཆེ་བསྟོད་ཞུ་སླད་གྲོས་ཆོད་ཅིག་ཀྱང་གཏན་འབེབས་གནང་འདུག ་ལྷན་ཚོགས་དེར་ཨལ་བྷ་ནི་གྲོས་ཚོགས་ཀྱི་འཐུས་མི་གྲངས་ ༦༢ དང་དེ་མིན་ལས་མི་གྲངས་ ༡༠༠ ཙམ་དེ་བཞིན་དོ་སྣང་ཅན་མང་དག་གཅིག་ཀྱང་ཕེབས་ཡོད་པ་རེད། ལྷན་ཚོགས་དེ་གྲུབ་མཚམས་༸གོང་ས་མཆོག་ནས་གསར་འགོད་ལྷན་ཚོགས་ཤིག་བསྐྱངས་གནང་ཡོད་པ་དང་དེ་རྗེས་༸གོང་ས་མཆོག་ནས་ (World Ethical Foundation Consortiu)ཞེས་པའི་ཚོགས་པའི་དབུ་ཁྲིད་དང་ལས་བྱེད་རྣམས་ལ་མཇལ་འཕྲད་དང་བཀའ་སློབ་སྩལ་ཡོད།
དེ་ཉིན་ཕྱེད་ཡོལ་༸གོང་ས་མཆོག་ནས་པ་ལ་སེ་ཚོགས་ཁང་དུ་ (Palace Theatre) ཆིབས་སྒྱུར་བསྐྱངས་ཡོད་དང་སྐབས་དེར་ཨལ་བྷ་ནི་གྲོང་ཁྱེར་སྤྱི་ཁྱབ་སྐུ་ཞབས་ཇེ་རི་ཇེན་ནིང་སེ་(Jerry Jennings)ནས་ངོ་སྤྲོད་གཏམ་བཤད་གནང་རྗེས་༸གོང་ས་མཆོག་ནས་མང་ཚོགས་ ༢༨༠༠ ཙམ་ལ་གཉན་འཕྲང་ཅན་གྱི་དུས་སྐབས་སུ་བྱམས་བརྩེའི་ལྟ་གྲུབ་ཅེས་པའི་བརྗོད་གཞིའི་ཐོག་བཀའ་སློབ་སྩལ་ཡོད། དེ་ཡང་ཕྱི་དངོས་པོ་ལས་ནང་སེམས་ཀྱི་བདེ་སྐྱིད་གལ་ཆེ་ཡིན་སྐོར་དང་། དཔལ་འབྱོར་ཉམས་རྒུད་ཀྱི་དུས་འདིར་དེས་ཚང་མས་བློ་སྒྲིམ་ནས་བསམ་བློ་གཏོང་རྒྱུའི་གོ་སྐབས་ཤིག་ཀྱང་སྐྲུན་ཡོད། ཅེས་སོགས་ཀྱི་བཀའ་སློབ་ཟབ་ཅིང་རྒྱས་པ་སྩལ་ཡོད།
༢༠༠༩ ཕྱི་ཟླ་ ༥ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནང་གི་མཛད་འཆར་ཁག་ལེགས་གྲུབ་ནས་རྒྱ་གར་དུ་ཆིབས་ཞལ་བསྒྱུར་ཡོད་པ་དང་། ཕྱི་ཚེས་ ༩ རེས་གཟའ་སྤེན་པའི་ཉིན་རྡ་ས་བཞུགས་སྒར་དུ་༸ཞབས་སོར་བདེ་བར་འཁོད་ཡོད་པའི་གནས་ཚུལ་དུ།།
