༢༠༠༩ ཕྱི་ཟླ་ ༥ ཚེས་ ༨ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༩ ཟླ་ ༥ ཚེས་ ༥ ཉིན་ཨ་རི་བོད་གཞུང་སྐུ་ཚབ་དོན་ཁང་ནས་གོ་སྒྲིག་འོག་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་གོ་སྒྲིག་ཞུས་ཡོད་པར་ཆིབས་སྒྱུར་བསྐྱངས་ཏེ་བཀའ་སློབ་བཀའ་དྲིན་ཆེ་བ་ཕེབས་ཡོད་པ་རེད།
མཛད་སྒོ་དེར་ཨ་རིའི་ནིའུ་ཡོཀ་དང་ནིའུ་ཇར་སིའི་ཁུལ་དུ་བཞུགས་པའི་རྒྱ་གར་མི་མང་གི་འཐུས་མི་སྐུ་ཚབ་བརྒྱ་ལྷག་ཙམ་གདན་ཞུས་ཀྱིས་འདུ་ཚོགས་ལ་ཐོག་མར་སྐུ་ཚབ་དོན་གཅོད་ནས་རྒྱ་གར་གཞུང་མང་གཉིས་ཀྱིས་བཙན་བྱོལ་བོད་མི་རྣམས་ལ་འདས་པའི་ལོ་ངོ་ལྔ་བཅུའི་རིང་གང་ཅིའི་རོགས་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབས་ཕེབས་དོན། རྒྱ་གར་དང་བོད་མིའི་འབྲེལ་བ་དེ་ནི་ལོ་ངོ་ལྔ་བཅུའི་ནང་གི་འབྲེལ་བ་ཞིག་མིན་པར་འདས་པའི་ལོ་ངོ་སྟོང་ཕྲག་མང་པོ་ནས་ཡོད་པའི་འབྲེལ་བ་ཞིག་ཡིན་སྐོར་དང་། དེ་མིན་༸གོང་ས་མཆོག་ནས་དེ་སྔོན་རྒྱ་གར་གྱི་སྲིད་བློན་དམ་པ་མོ་ར་ཇི་ཌེ་སའི་མཆོག་གིས་རྒྱ་གར་དང་བོད་གཉིས་ནི་བྱང་ཆུབ་ལྗོན་ཤིང་གཅིག་གི་ཡན་ལག་གཉིས་པོ་དེ་ཡིན་པ་གསུངས་མྱོང་ཡོད་པ་ངོ་སྤྲོད་མཛད་ཡོད་ཅིང་མགོན་པོ་གང་ཉིད་ནས་ཀྱང་ད་ལྟ་རྒྱལ་སྤྱིའི་ནང་རྒྱ་གར་གྱི་གཞི་རིམ་འཚེ་བ་མེད་པའི་ལྟ་གྲུབ་ཁྱབ་སྤེལ་བྱེད་མཁན་གྱི་བང་ཆེན་ཡིན་པ་ངོས་འཛིན་མཛད་ཀྱི་ཡོད་ཅེས་དང་མགོན་པོ་གང་ཉིད་ཀྱི་རྒྱ་གར་ལ་ངའི་སྦྱིན་བདག་ཅེས་ད་ཆ་ངའི་སྦྱིན་བདག་གི་ངོས་ནས་རྒྱལ་སྤྱིའི་ནང་འཚེ་བ་མེད་པའི་ཞི་བདེའི་ལྟ་གྲུབ་སྤེལ་ཐབས་ལ་འགན་ཁུར་ཆེ་ཙམ་བཞེས་དགོས་ཀྱི་ཡོད་པ་གཟིགས་ཀྱི་ཡོད། ཅེས་སོགས་ཀྱི་བཀའ་སློབ་ཕེབས་ཡོད།
སྐབས་དེར་རྒྱ་གར་གྱི་སྐུ་ཚབ་ངོས་ནས་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གཤིས་སྤྱོད་བཟང་པོ་རྣམས་འཛམ་གླིང་སྤྱི་ལ་ངོ་སྤྲོད་ཆེད་སྐུ་ཚབ་ལྟ་བུ་གནང་བཞིན་པར་བཀའ་དྲིན་རྗེས་དྲན་ཞུས་ཡོད་པ་རེད། ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནང་ཆིབས་སྒྱུར་བསྐྱངས་ཏེ་ཨ་རིར་གནས་སྡོད་རྒྱ་གར་མང་ཚོགས་ལྷན་དུ་མཇལ་འཕྲད་མཛད་ཡོད་པར་རྒྱ་གར་མི་མང་ཁོང་རྣམས་ཧ་ཅང་དགའ་ཚོར་ཆེན་པོ་གནང་བཞིན་ཡོད་པ་དང་བསྟུན་བོད་གཞུང་སྐུ་ཚབ་དོན་གཅོད་ནས་ཁོང་རྣམས་དང་མུ་མཐུད་འབྲེལ་ལམ་ཞུ་རྒྱུའི་གོ་སྐབས་ཐོབ་བྱུང་ཞེས་སོགས་ཀྱི་མཛད་འཆར་ཁག་ཧ་ཅང་གྲ་རྒྱས་ཕུན་ཚོགས་ངང་གྲུབ་ཡོད་པ་རེད།།
