༢༠༡༠ ཕྱི་ཟླ་ ༡ ཚེས་ ༡༦ རེས་གཟའ་སྤེན་པ།
༸གོང་ས་མཆོག་ཨོ་རི་ས་གཞི་ཆགས་སུ་མཆོད་རྟེན་ཞིག་རབ་གནས་དབུ་འབྱེད་མཛད་སྐབས།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༡༣ ཉིན་ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་རི་དགོན་ཐུབ་བསྟན་སྨིན་གྲོལ་གླིང་དགོན་པ་ནས་༸གོང་ས་མཆོག་ལ་ཇི་ལྟར་གསོལ་འདེབས་ཞུས་པ་བཞིན་བླ་མ་གསང་འདུས་ཐོ་རེངས་དུམ་བུ་བཞི་དབང་གི་བཀའ་དབང་སྩལ་གྲུབ་མཚམས་ཆོས་དྲན་དགོས་པའི་ལམ་སྟོན་བཀའ་སློབ་ཕེབས་དོན། དེང་དུས་ཀྱི་སྐྱེ་བོ་ཚང་མས་ཉམས་བཞེས་ཡག་པོ་གནང་དགོས། དེ་བཞིན་མཁན་པོས་གཙོ་བོ་དབུ་ཁྲིད་པའི་ཁྱེད་རང་ཚོ་རབ་བྱུང་གི་སྡེ་ཞིག་ཡོད། ད་ལྟ་གཞི་གསུམ་ཡོད་དམ་མེད། གསོ་སྦྱོང་དང་དབྱར་གནས་ཡོད་དམ། ཡོད་ན་ཡག་པོ་ཞེ་དྲག་བྱུང་འདུག གཞི་གསུམ་གྱི་ཆོ་ག་དེ་གལ་ཆེན་པོ་རེད། དགོན་པ་འདི་འདྲ་ཞིག་ཡོད་པའི་རྗེས་ལ་གཞི་གསུམ་གྱི་ཆོ་ག་ཡིན་གཅིག་མིན་གཅིག་ཡོད་དགོས་པ་རེད། སྨིན་གྲོལ་གླིང་གི་ཕྱག་བཞེས་གཙང་མ་ཡག་པོ་ཞེ་དྲག་འདུག གཞི་གསུམ་ཆོ་ག་སྤས་དག་པོ་ཞིག བཅོམ་ལྡན་འདས་རང་ཉིད་ཀྱིས་གང་ལ་གཞི་གསུམ་གྱི་ཆོ་ག་ཡོད་ས་དེར་བཅོམ་ལྡན་འདས་རང་ཉིད་ཐུགས་ལས་ཆུང་ངུར་ཞུགས་བཞིན་ཡོད་གསུངས་ཡོད། སངས་རྒྱས་བསྟན་པའི་ཞབས་འཛིན་མཁན་དེ་འདུལ་བའི་བསྟན་པ་རེད། དེ་ཧ་ཅང་གལ་ཆེན་པོ་རེད། འདུལ་བསྟན་ཡོད་པའི་ཐོག་སྔགས་ཁ་སྣོན་བརྒྱབ་ན་ཡག་པོ་ཞེ་དྲག་རེད། འདུལ་བསྟན་མཛུབ་མོ་བཙུགས་ས་མེད་པར་སྔགས་གཅིག་པུ་ཡིན་ལབ་ནའང་ཁག་པོ་རེད། དེར་བརྟེན་བཅོམ་ལྡན་འདས་རང་གིས་ཆོས་འཁོར་རིམ་པ་གསུམ་སྐོར་རྒྱུའི་གོ་རིམ་ལ་གཟིགས་ན་མཁྱེན་གྱི་རེད། ཐོག་མར་བདེན་བཞིའི་ཆོས་འཁོར་གསུངས་པ་དང་། བར་དུ་མཚན་ཉིད་མེད་པའི་ཆོས་འཁོར་གསུངས་པ་རེད། དེ་ནས་གཉུག་མ་ལྷན་ཅིག་སྐྱེས་པའི་འོད་ཟེར་ལས་བརྩམས་པའི་དེ་བཞིན་གཤེགས་པ་སྙིང་པོའི་མདོ་ལྟ་བུ་གསུངས་པ་རེད། དེ་ནས་བྱས་ཏེ་སྔགས་ཁ་སྣོན་རྒྱག་རྒྱུ་རེད། སྔོན་འགྲོ་དེ་དག་བཅོམ་ལྡན་འདས་ཀྱི་དེ་ལྟར་གསུངས་པ་རེད་འོན་ཀྱང་དགོས་པ་གང་ཡང་ཡོད་པ་མ་རེད། དེ་གདུལ་བྱ་དབང་པོ་རྟུལ་པོའི་དོན་དག་རེད་ང་ཚོ་དང་པོ་ནས་སྔགས་ལམ་ལ་འཇུག་རྒྱུ་ཡིན་ལབ་ན་ཡག་པོ་རང་ཡོད་པ་མ་རེད། གོ་རིམ་མ་འཆོལ་བར་འགྲོ་རྒྱུ་དེ་དཔེ་གལ་ཆེན་པོ་རེད། དེ་ཁྱེད་རང་ཚོས་མཁྱེན་གསལ་ཡིན་ཡང་དྲན་སྐུལ་གསལ་འདེབས་ཞུས་པ་ཙམ་ཡིན། ཉིན་གཉིས་ཀྱི་ཆོས་འབྲེལ་ལེགས་པར་གྲུབ་སོང་། ཁ་སང་འགོ་འབྱེད་དང་ལས་བསྡོམས་ཚོགས་རྒྱུ། དེ་བཞིན་མི་མང་ལ་ཆོས་འབྲེལ་སོགས་དང་། ད་ལྟ་འདིར་གུ་རུ་རིན་པོ་ཆེའི་ཐུགས་སྒྲུབ་ཀྱི་བྱིན་རླབས་ཞུ་རྒྱུ་བཅས་ཡག་པོ་ཞེ་དྲག་བྱུང་སོང་ཐུགས་རྗེ་ཆེ་ཞུ་རྒྱུ་ཡིན། ཡང་ང་ཚོ་རྗེས་སུ་མཇལ་ཡོང་བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་སློབ་སྩལ་ཡོད།
