༢༠༡༣ ཟླ་ ༣ ཚེས་ ༡༨ རེས་གཟའ་ཟླ་བ།
༄༅། །ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ལ་དྭགས་བསོད་ནམས་གླིང་གཞིས་ཆགས་ཀྱི་བྱང་ཐང་ས་ཁུལ་ཁག་ཏུ་ཐེངས་དང་པོའི་གཞུང་འབྲེལ་འཚམས་གཟིགས་ལེགས་གྲུབ་བྱུང་ཡོད།
དེ་ཡང་བཀའ་བློན་མཆོག་གིས་བྱང་ཐང་ས་ཁུལ་ཁག་བདུན་དུ་བསྐོར་བསྐྱོད་གནང་སྟེ། གངས་སྐྱོན་འོག་དཀའ་སྡུག་ཧ་ཅང་ཆེན་པོ་འཕྲད་པའི་བོད་མི་མང་ཚོགས་རྣམས་ལ་སེམས་གསོ་གནང་བ་མ་ཟད། ནང་སྲིད་ལས་ཁུངས་ཀྱིས་ངལ་སེལ་རོགས་སྐྱོབ་ཆེད་ཐབས་ཤེས་ཡོད་རྒུ་རྩལ་སྤྲུག་གནང་རྒྱུའི་ཁས་ལེན་ཡང་གནང་ཡོད། བཀའ་བློན་མཆོག་ས་ཁུལ་དེ་དག་ལ་འཚམས་གཟིགས་སྐབས་ས་གནས་རྒྱ་གར་གཞུང་འབྲེལ་མི་སྣ་ཁག་གཅིག་གིས་ཕེབས་བསུ་གཟབ་རྒྱས་ཞུས་ཡོད། སྐབས་དེར་བཀའ་བློན་མཆོག་གིས་གོ་སྐབས་དེ་དང་བསྟུན། རྒྱ་གར་དབུས་དང་མངའ་གཞུང་། དེ་བཞིན་རྫོང་ལས་ཁུངས་བཅས་ཀྱིས་བྱང་ཐང་གནས་སྡོད་བོད་མི་རྣམས་ལ་ཛ་དྲག་གི་ངལ་སེལ་ཆེད། ཟ་བཅའ་སོགས་ཀྱི་མཐུན་འགྱུར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད། སྐབས་དེར་འབྲེལ་ཡོད་རྒྱ་གར་གཞུང་འབྲེལ་མི་སྣ་ཚོས་ཀྱང་འབྱུང་འགྱུར་བོད་མི་ཚོར་རོགས་རམ་ཇི་དགོས་རྒྱབ་སྐྱོར་མུ་མཐུད་ཞུ་རྒྱུའི་ཁས་ལེན་ཡང་གནང་ཡོད།
སྤྱིར་བཀའ་བློན་མཆོག་གིས་འཚམས་གཟིགས་སྐབས་ཁ་བ་ཧ་ཅང་བབས་ཤིང་གྲང་ངར་ཤིན་དུ་ཆེ་བ་མ་ཟད། ལམ་ཁའིི་གནས་སྟངས་ཧ་ཅང་ཞན་པ་སོགས་ངལ་བ་དུ་མར་མ་འཛེམས་པར་གཞུང་དོན་ཕྱོགས་ཕེབས་གནང་ཡོད། ལ་དྭགས་བྱང་ཐང་ཁུལ་གྱི་འཚམས་གཟིགས་ལེགས་གྲུབ་རྗེས་ལ་དྭགས་ལྕོག་ལམ་གསར་ས་གནས་བོད་མི་རྣམས་དང་ཐུག་འཕྲད་ཀྱིས་ཁོང་ཚོའི་དཀའ་ངལ་རྣམས་ལ་ཉན་ཞིབ་གནང་སྟེ། ཕྱི་ཚེས་ ༡༤ ཉིན་ལྡི་ལི་བརྒྱུད་རྡ་སར་ཕེབས་ཐོན་གནང་ཡོད་པ་བཅས།།
