༢༠༡༣ ཟླ་ ༣ ཚེས་ ༡༨ རེས་གཟའ་ཟླ་བ།
༄༅། །དབྱིན་ཡུལ་དུ་རྟེན་གཞིན་བྱས་པའི་བོད་དོན་རྒྱབ་སྐྱོར་བ་བོད་ཀྱི་ཚོགས་པ་དང། བོད་རང་བཙན་ཚོགས་པ། བོད་རང་བཙན་སློབ་ཕྲུག་ཚོགས་པ། དབྱིན་ཡུལ་དུ་གནས་སྡོད་བོད་རིགས་ཚོགས་པ། དེ་བཞིན་དབྱིན་ཡུལ་ས་གནས་བོད་ཀྱི་གཞོན་ནུ་ལྷན་ཚོགས་བཅས་ཐུན་མོང་ནས་གོ་སྒྲིག་འོག་དབྱིན་ཡུལ་དུ་གནས་སྡོད་བྱེད་མཁན་བོད་མི་དང་བོད་དོན་རྒྱབ་སྐྱོར་བ་ཚོས་ཕྱི་ཚེས་ ༡༣ ཉིན་བོད་དོན་རྒྱབ་སྐྱོར་བ་ ༣༠༠ ཙམ་གྱིས་དབྱིན་ཡུལ་གྲོས་ཚོགས་འཐུས་མི་ ༡༥༠ དང་ས་གནས་འོས་བསྡུའི་ས་ཁོངས་ (local constituencies) བཅས་སུ་ངོ་བཅར་གྱིས་ཡིག་ངག་གཉིས་ནས་བོད་དོན་རྒྱབ་སྐྱོར་ཡོང་བའི་འབོད་སྐུལ་ཞུས་འདུག
ཐེངས་འདིར་བོད་དོན་རྒྱབ་སྐྱོར་བ་ཚོས་དབྱིན་ཇིའི་གྲོ༞ས་ཚོགས་འཐུས་མི་སོགས་བརྒྱུད་སྲིད་བློན་ཌེ་ཝི་ཌི་ཀེམ་རོན་ (David Cameron) མཆོག་གིས་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེའི་བསྒྲགས་གཏམ་ཞིག་སྤེལ་རྒྱུའི་རེ་འདུན་བཏོན་པ་མ་ཟད། དབྱིན་གཞུང་ནས་ཀྱང་རྒྱལ་ཁབ་གཞན་གྱི་སྲིད་གཞུང་དང་རྡོག་སྒྲིལ་ནས་བོད་ནང་གི་ཛ་དྲག་གནས་སྟངས་སེལ་ཐབས་གནང་རྒྱུ་སོགས་ཡིན་འདུག
གཞན་ཡང་བོད་དོན་ཞུ་གཏུག་པ་རྣམས་ཀྱིས་དབྱིན་ཡུལ་གྱི་གྲོང་ཁྱེར་ཝེ་སི་མིན་སི་ཊར་ (Westminster) རུ་གྲོས་ཚོགས་འཐུས་མི་རྣམས་དང་དངོས་སུ་མཇལ་འཕྲད་ཀྱིས་བོད་དོན་ཐོག་བློ་འཚབ་ཤུགས་ཆེ་དང་བཅས་གྲོས་ཚོགས་འཐུས་མི་རྣམས་ལ་འབོད་སྐུལ་ཞུ་སྐབས། གྲོས་ཚོགས་འཐུས་མི་རྣམས་ནས་ཀྱང་གྲོས་ཚོགས་འོག་མར་བོད་དོན་ཐོག་སླར་ཡང་བགྲོ་གླེང་གནང་རྒྱུའི་ཞལ་བཞེས་གནང་ཡོད། དེ་སྔའི་བོད་དོན་བགྲོ་གླེང་དེ་བཞིན་ཕྱི་ལོ་ ༢༠༡༡ ལོར་གནང་ཡོད།
དམིགས་བསལ་ཚོགས་འདུ་ཞིག་སྐབས་བོད་དོན་ཞུ་གཏུག་པ་རྣམས་ཀྱིས་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ཡིན་པ་ངལ་རྩོལ་ཚོགས་པའི་ (Labour Party) སྐུ་ཞབས་ཕ་བྷི་ཡན་ཧེ་མིལ་ཊོན་ (Fabian Hamilton) ལགས་དང། ལྕམ་སྐུ་ཀེ་ཐི་ཇེ་མ་ཡེ་སོན་ལགས། (Cathy Jamieson) སྐུ་ཞབས་ནིཀ་ཌེ་ཀིན་ Nic Dakin ལགས་བཅས་དང་ལྷན་མཇལ་འཕྲད་གནས་སྟེ་བོད་དོན་ཐོག་གླེང་སློང་གནང་ཡོད།
སྐབས་དེར་ལྕམ་སྐུ་ཀེ་ཐི་ཇེ་མ་ཡེ་སོན་ (Cathy Jamieson) ལགས་ཀྱིས་གསུང་དོན། འདི་ལྟ་བུ་ཕན་ཚུན་ཐུག་སྟེ་ཚོགས་འདུ་འཚོགས་རྒྱུ་དེ་ཧ་ཅང་གལ་ཆེན་པོ་མཐོང་གི་འདུག་གང་ལ་ཞེ་ན། མི་སྒེར་སོ་སོས་འབྲེལ་ཡོད་གནད་དོན་ཐོག་ངོ་སྤྲོད་གནང་རྒྱུ་ཙམ་མ་ཟད། སོ་སོའི་སེམས་ཚོར་ཤུགས་ཆེ་འདོན་རྒྱུའི་གོ་སྐབས་ཀྱང་ཡོང་བཞིན་འདུག ཅེས་གསུངས་ཡོད། དེ་བཞིན་གོ་སྒྲིག་ཚོགས་ཆུང་ངོས་ནས་འགྲེལ་བརྗོད་གནང་དོན་ལྟར་ན། གྲོས་ཚོགས་འཐུས་མི་རྣམས་ཀྱིས་བོད་མིའི་རེ་འདུན་རྣམས་ལག་ལེན་དོན་འཁྱོལ་གནང་རྒྱུའི་ཞལ་བཞེས་གནང་འདུག་པ་བཅས།།
