༢༠༡༣ ཟླ་ ༣ ཚེས་ ༡༥ རེས་གཟའ་པ་སངས།
༄༅། །འདི་གར་ཏི་ཛུ་དར་རྒྱས་གླིང་ས་གནས་འགོ་འཛིན་ལས་ཁང་ནས་ཕྱི་ལོ་ ༢༠༡༣ ཟླ་ ༣ ཚེས་ ༡༤ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༣ ཚེས་ ༡༠ ཉིན་ཏི་ཛུ་དར་
རྒྱས་གླིང་གཞིས་ཆགས་ཀྱི་༸རྒྱལ་བའི་ཕོ་བྲང་མདུན་དུ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༤ སྲུང་བརྩི་གཟབ་རྒྱས་ཞུས་ཡོད།
དེ་ཡང་སྔ་དྲོ་ཆུ་ཚོད་ ༧ པའི་ཐོག་གཞིས་སྒར་སོ་སོའི་སྤྱི་མི་བརྒྱ་དཔོན་ནས་འགོ་ཁྲིད་ཀྱི་གཞིས་སྒར་སོ་སོའི་མི་མང་རྣམས་མཉམ་འཛོམས་ཀྱིས་རྟེན་མཁར་མདུན་དུ་ལྷན་འཛོམས་ཐོག་དཀར་ཕྱོགས་སྐྱོང་བའི་ལྷ་སྲུང་རྣམས་ལ་བསང་གསོལ་གཟབ་རྒྱས་ཞུས་གྲུབ་མཚམས་མཛད་སྒོ་དངོས་གཞི་སྔ་དྲོ་ཆུ་ཚོད་ ༨ པའི་ཐོག་ས་གནས་འཐུས་ཚོགས་ཀྱི་ཚོགས་གཙོས་དབུས་ས་གནས་འགོ་འཛིན་དང་ལས་བྱེད་རྣམ་པ། རང་བདེན་ཚོགས་ཆུང་དང་གཞིས་དགོན་གྱི་གསུམ་དབུ་འཛིན་རྣམ་པ། སློབ་ཕྲུག་སེར་སྐྱ་མི་གྲངས་ ༣༥༠ བརྒལ་བ་ལྷན་འཛོམས་ཐོག་ལས་དྲུང་བསྟན་འཛིན་རྣམ་རྒྱལ་ལགས་ཀྱིས་མཛད་སྒོའི་ལས་རིམ་ངོ་སྤྲོད་དང་འབྲེལ་ས་གནས་ཉིན་སློབ་ཀྱི་སློབ་ཕྲུག་རྣམ་པ་དང་མི་མང་ཚང་མ་སྐུ་བཞེངས་ཀྱིས་འཕགས་བོད་གཉིས་ཀྱི་རྒྱལ་གླུ་ཕུལ་རྗེས་བོད་བསྟན་སྲིད་མི་རིགས་ཆེད་ལུས་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ཀྱི་ཆེད་མྱ་ངན་གུས་འདུད་དང་ངག་བཅད་སྐར་
མ་གཅིག་གནང་ཡོད།
དེ་ནས་སློབ་ཕྲུག་རྣམས་ཀྱིས་བདེན་ཚིགས་སྨོན་ལམ་སོགས་གསུང་འདོན་གནང་། དེ་རྗེས་ས་གནས་འགོ་འཛིན་ཐུབ་བསྟན་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་གསུམ་བཅུའི་དུས་དྲན་གྱི་གསུང་བཤད་བོད་དབྱིན་གཉིས་ཐོག་སྒྲོགས་སྦྱང་དང་གསུང་བཤད་ཀྱང་གནང་ཡོད། དེ་ནས་ས་གནས་འཐུས་ཚོགས་ཀྱི་ཚོགས་གཙོས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་དང་འབྲེལ་གཏམ་བཤད་ཀྱང་གནང་གྲུབ་མཚམས་སློབ་ཕྲུག་གིས་གསུམ་བཅུའི་དྲན་གླུ་དང་སྤུན་ཟླ་ཆིག་སྒྲིལ་བཏང་སྟེ་ལས་དྲུང་ནས་ཐུགས་རྗེ་ཆེ་ཞུས་ནས་མཛད་སྒོ་གྲོལ།
དེ་བཞིན་ཆུ་ཚོད་ ༡༠ ནས་ ༡༢ བར་གཞིས་དགོན་གསུམ་གྱི་བླ་སྤྲུལ་དགེ་འདུན་རྣམ་པས་གཙོས་གནད་ཡོད་མི་སྣ་ཁག་དང་སློབ་ཕྲུག་རྣམས་༸རྒྱལ་བའི་ཕོ་བྲང་ནང་ལྷན་འཛོམས་ཐོག་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་འདས་གསོན་རྣམས་ཀྱི་སླད་མཆོད་འབུལ་སྨོན་ལམ་དང་མ་ཎི་གསོག་སྒྲུབ་ཞུས་ཡོད་པ་མ་ཟད། དགོང་དྲོ་མར་མེའི་ཁྲོམ་སྐོར་ཞིག་ཀྱང་གནང་འདུག་པ་བཅས། །
