༢༠༡༣ ཟླ་ ༣ ཚེས་ ༡༤ རེས་གཟའ་ཕུར་བུ།
༄༅། །ཡི་ཤུའི་བླ་ཆེན་པོབ་གསར་པ་སྐུ་ཞབས་ཕ་རན་སི་སི་མཆོག་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕྱི་ལོ་ ༢༠༡༣ ཟླ་ ༣ ཚེས་ ༡༤ ཉིན་དགའ་བསུའི་འཚམས་འདྲི་གནང་བའི་ནང་འཁོད་དོན། འཛམ་གླིང་ས་གནས་གང་སར་གནས་པའི་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་མཆོག་ལ་ཡི་ཤུའི་བླ་ཆེན་པོབ་ཏུ་འོས་འདེམས་བྱུང་བར་ང་ཚོས་སྙིང་ཐག་པ་ནས་དགའ་བསུ་ཞུ་རྒྱུ་ཡིན། ཐེངས་འདིར་ལེ་ཊིན་ཨ་མི་རི་ཁ་ནས་བླ་ཆེན་པོབ་ཀྱི་མཚན་གནས་བཞེས་མཁན་སྐུ་ཉིད་མཆོག་ཐོག་མ་ཡིན་པར་བརྟེན། འདི་ནི་ལོ་རྒྱུས་རང་བཞིན་ལྡན་པ་ཞིག་ཆགས་ཡོད།
འོས་འདེམས་གྲུབ་མཚམས་སྐུ་ཉིད་མཆོག་གིས་མང་ཚོགས་ལ་མཇལ་ཁ་སྩོལ་སྐབས། ཐེངས་འདིར་ཡི་ཤུའི་བླ་ཆེན་རྣམ་པས་བླ་ཆེན་པོབ་འོས་འདེམས་ཆེད་འཛམ་གླིང་གི་མཐའ་བར་འཚོལ་བར་ཕྱིན་ཡོད་བཅས་གསུངས་བ་ལྟར། ཐེངས་དང་པོར་ཡུ་རོབ་ཀྱི་མི་སེར་མིན་པའི་བླ་ཆེན་པོབ་ཉམ་ཆུང་དང་དབུལ་ཕོངས་ལ་ཧ་ཅང་བརྩེ་བ་ཞིག་འོས་འདེམས་བྱུང་ཡོད། སྐུ་ཉིད་མཆོག་ནི་ད་ཆ་འཛམ་གླིང་ཁྱོན་ཡོངས་ཀྱི་ཡི་ཤུའི་རྣམ་དག་གི་ཆོས་ལུགས་རྗེས་འབྲང་པ་མི་འབོར་ཐེར་འབུམ་ ༡།༢ དབུ་ཁྲིད་ཆགས་ཡོད། གལ་ཆེའི་དུས་སྐབས་འདིར་སྐུ་འཁོར་འདུས་དམངས་རྣམས་ལ་སྐུ་ཉིད་མཆོག་གིས་བྱིན་རླབས་འཐོབ་རྒྱུ་ཡིན་པར་གདོན་མི་ཟ།
བོད་དུ་དུས་རབས་མང་པོའི་རིང་ཡི་ཤུའི་རྗེས་འབྲང་པ་དང་བོད་མི་ནང་པ་རྣམས་ཕན་ཚུན་འཆམ་མཐུན་ངང་གནས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཡི་ཤུའི་བླ་ཆེན་པོབ་ཇོན་པོལ་མཆོག་གིས་གཙོས། འཛམ་གླིང་ནང་ཡི་ཤུའི་ཆོས་ལུགས་ཀྱི་དབུ་ཁྲིད་འདྲ་མིན་དང་ལྷན་ཉམས་མྱོང་བརྗེ་ལེན་གྱི་བག་ཆགས་གཏིང་ཟབ་འཇོག་གནང་མཛད་པ་མ་ཟད། ཇེ་རུ་ས་ལིམ་དང་ཨ་སི་སི། ལོར་ཌེ། ཕ་ཏི་མ་སོགས་ཡི་ཤུའི་གནས་ཁྱད་པར་ཅན་མང་དག་ཅིག་ཏུ་གནས་གཟིགས་ཀྱང་མཛད་ཡོད། ཆོས་ལུགས་མཐུན་སྒྲིལ་གོང་མཐོར་གཏོང་གནང་མཛད་རྒྱུ་ནི་༸གོང་ས་ཏཱ་ལའི་བླ་མ་མཆོག་གི་སྐུ་ཚེའི་མཛད་འགན་གཙོ་བོ་ཞིག་ལ་ངོས་འཛིན་མཛད་བཞིན་ཡོད། ཅེས་སོགས་འཁོད་ཡོད།
འཚམས་འཕྲིན་ངོ་མ་དབྱིན་ཡིག་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་དབྱིན་ཡིག་ལ་རྩ་འཛིན་ཡོང་བ་ཞུ།
