༢༠༠༩ ཕྱི་ཟླ་ ༥ ཚེས་ ༦ རེས་གཟའ་ལྷག་པ།
༄༅། །ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༩ ཟླ་ ༥ ཚེས་ ༣ ཉིན་ཨ་རིའི་གྲོང་ཁྱེར་ནིའུ་ཡོཀ་དང་ནིའུ་ཇར་སིའི་མངའ་ཁུལ་དུ་གནས་པའི་བོད་རིགས་དང་ཧི་མ་ལ་ཡའི་རི་རྒྱུད་ནས་ཡིན་པའི་མི་མང་བཅས་པར་བླང་དོར་གྱི་བཀའ་སློབ་ཟབ་རྒྱས་སྩལ་ཡོད། དེ་ཡང་ཉིན་དེའི་ཕྱེད་ཡོལ་ཆུ་ཚོད་ ༢ ཐོག་ཨ་རིའི་བོད་གཞུང་སྐུ་ཚབ་དོན་གཅོད་དང་འབྲེལ་ཡོད་ཚོགས་སྡེ་ཁག་གི་འགན་འཛིན་རྣམས་ནས་ཕེབས་བསུས་དང་སྦྲགས་གྲོང་ཁྱེར་ནིའུ་ཡོཀ་གི་མེ་ཌི་སིན་སེ་ཁེ་བའི་གྷར་ཌན་(Madison Square Garden) ཞེས་པའི་ཚོགས་ཁང་ཆེན་མོར་གདན་ཞུས་ཀྱིས་༸ཞབས་སོར་འཁོད་སྐབས་མི་མང་ ༥༠༠༠ བརྒལ་བ་བཅར་ཡོད་པ་ཡོངས་ནས་དད་སེམས་ཆེན་པོས་ཕེབས་བསུ་མཚོན་སླད་ཐལ་མོ་ཡུན་རིང་བརྡབས་པའི་སྒྲས་ཚོགས་ཁང་ཡོངས་ཁེངས་པར་གྱུར། ༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཆོས་དབུ་འཛུགས་ཀྱིས། ནང་པའི་ལྟ་བ་རྟེན་བྱུང་དང་སྤྱོད་པ་འཚེ་བ་མེད་པ། རྒྱུ་འབྲས། བདག་གི་ཐོག་མ་དང་མཐའ་མ་བཅས་དོན་གྱི་སྙིང་པོ་སྡུག་བསྔལ་སེལ་བའི་སྐོར་སོགས་ཀྱི་བཀའ་འཁྲིད་རྒྱས་པར་མཛད་ཡོད། ང་ཚོས་བསམ་པ་རྣམ་དག་ཐོག་སེམས་ཤུགས་མ་ཆགས་པར་ཚང་མས་ཧུར་སྐྱེད་བྱེད་རྒྱུ་དེ་གནད་འགག་ཆེན་པོ་ཡིན། ཁྱེད་རང་ཚོ་ཚང་མ་བློ་བདེ་པོ་བྱས་ཏེ་སྡོད་རོགས། བཀྲ་ཤིས་བདེ་ལེགས། ཞེས་བཀའ་སློབ་ཟབ་ཅིང་རྒྱས་པ་སྩལ་ཡོད་པ་བཅས།།
༸གོང་ས་མཆོག་ནས་ཨ་རིའི་གྲོང་ཁྱེར་ནིའུ་ཡོཀ་གི་མེ་ཌི་སིན་སེ་ཁེ་བའི་གྷར་ཌན་ཚོགས་ཁང་ཆེན་མོར་བཀའ་སློབ་སྩོལ་བཞིན་པ།
ཐེངས་དེའི་གསུང་ཆོས་ཞུ་མཁན་མང་ཆེ་བ་བོད་མི་ཡིན་པར་སོང་ཁུལ་དེར་གནས་སྡོད་བོད་མི་ཚོར་ད་ལྟའི་བོད་ནང་གི་གནས་སྟངས་དང་གཞིས་ལུས་མི་མང་གི་སེམས་ཤུགས་འཁྱེར་ཕྱོགས་བཅས་བོད་ཀྱི་རྩ་དོན་དང་འབྲེལ་བའི་བཀའ་སློབ་ཕེབས་དོན། ད་རེས་བོད་མི་རྣམས་ཡང་བསྐྱར་གཅིག་འདུ་འཛོམས་བྱུང་བར་དགའ་པོ་ཞེ་དྲག་བྱུང་། ངོས་རང་ཨ་རིར་འབྱོར་ཏེ་བདུན་ཕྲག་གཉིས་ཙམ་འགྲོ་གི་ཡོད། གྲ་སྒྲིག་པོ་ཡག་པོ་ཞེ་དྲག་བྱུང་ལ་ད་རེས་འདིར་ཁྱེད་རང་ཚོ་བོད་པ་དང་ཧི་མ་ལ་ཡའི་རི་རྒྱུད་ཀྱི་མི་ཚོགས་ཆེ་ཤོས་རེད་འདུག ད་རེས་ང་ཚོ་བོད་མི་རྣམས་ནིའུ་ཡོཀ་ཏུ་ཐུག་སྐབས་ཚང་མ་དགའ་དགའ་སྤྲོ་སྤྲོ་བྱས་ཏེ་སྡོད་རྒྱུ་ཡོད་པ་རེད། ཡིན་ནའང་ང་ཚོའི་གནས་སྟངས་དེ་བཙན་བྱོལ་བ་ཆགས་ཡོད་པ་རེད། བཙན་བྱོལ་བ་ཆགས་པ་ཙམ་དུ་མ་ཟད་སོ་སོའི་ལུང་པའི་ནང་དེ་རིང་ཁ་སང་གི་དུས་འདིར་རྒྱ་ནག་གུང་ཁྲན་གཞུང་གིས་ཧ་ལས་པའི་གདུག་རྩབ་ཆེན་པོས་སྲིད་བྱུས་བཟུང་བཞིན་ཡོད། བྱས་ཙང་བར་སྐབས་ནས་ངོས་ཀྱི་འདི་ལྟར་བརྗོད་ཀྱི་ཡོད། བོད་མི་གནའ་རབས་ཀྱི་རིག་གཞུང་ལྡན་པའི་མི་རིགས་འདི་ད་ཆ་ཧ་ལམ་སྲོག་ཆད་ཕོག་པ་ལྟ་བུར་བསྡད་ཡོད། ཅེས་བརྗོད་ཀྱི་ཡོད། འདི་ནི་གུང་ཁྲན་གུ་དོག་པོ་དེ་དག་གི་བསམ་བློའི་ནང་ཇི་ཙམ་གྱི་བོད་ཀྱི་ཆོས་དང་རིག་གཞུང་། བོད་མིའི་རྣམ་པ་ག་ཚད་ཡོད་པ་དེའི་ཚོད་ཀྱི་ཁ་བྲལ་འགྲོ་རྒྱུའི་ཉེན་ཁར་བརྩིས་ཏེ་དེ་དག་མེད་པ་བཟོ་བཞིན་འདུག བོད་མི་རྒྱ་མི་ཞིག་ལ་བསྒྱུར་ཐུབ་ན་དེ་རྒྱལ་ཁབ་ཁ་བྲལ་མི་ཡོང་རྒྱུ་དང་། བོད་པ་བོད་པའི་རྣམ་པར་བསྡད་པ་ཡིན་ན་རྒྱལ་ཁབ་ཁ་བྲལ་འགྲོ་རྒྱུའི་ཉེན་ཁ་འདུག་ཅེས། བསམ་བློ་གུ་དོག་པོ་དང་མིག་རྒྱང་ཐུང་ཐུང་དེ་འདྲ་ཞིག་གི་ཐོག་ནས་སྲིད་བྱུས་བཟུང་གི་ཡོད། དེར་བརྟེན་ང་ཚོ་དངོས་གནས་དཀའ་ངལ་ཆེ་ཤོས་ཀྱི་དུས་ལ་སླེབས་ཡོད། ཡིན་ནའང་བོད་ཆོལ་ཁ་གསུམ་གྱི་ས་ཁུལ་ཡོངས་སུ་རྫོགས་པ་ནས་ལྷག་བསམ་དང་སྙིང་སྟོབས་ག་འདྲ་ཞིག་སྟོན་གྱི་འདུག་གམ། དེ་ང་ཚོ་ཚང་མས་མཐོང་བཞིན་ཡོད། ཧ་ལས་དགོས་པ་རེད། ཉེ་བའི་ཆར་ངོས་ལ་བོད་ནས་ཡོང་བའི་མི་ཞིག་ཐུག་བྱུང་། མི་དེས་ང་ཚོ་གཞིས་ལུས་རྒྱ་ཆེའི་མི་མང་ལ་རྒྱ་དམར་གྱིས་གདུག་རྩབ་ཇི་ཙམ་ཆེ་བ་བྱས་པ་དེ་ཙམ་གྱི་ང་ཚོའི་སྙིང་སྟོབས་ཆེ་རུ་འགྲོ་གི་ཡོད་མ་གཏོགས། ང་ཚོ་སྙིང་སྟོབས་ཞུམ་གྱི་མེད། ཅེས་དང་ངོས་ལ། ༸རྒྱལ་བ་རིན་པོ་ཆེ་ཐུགས་ལྷོད་ལྷོད་བྱས་བཞུགས་རོགས་གནང་། སྐུ་གཟུགས་ལ་ཐུགས་ཅག་གནང་རོགས་གནང་། ཞེས་བརྗོད་ཀྱི་འདུག དེ་འདྲ་ཡིན་དུས་བོད་རྒྱ་ཆེའི་མི་མང་གི་ཧ་ལས་པའི་སྙིང་སྟོབས་དང་སེམས་ཤུགས་དེ་འདྲ་བསྡད་ཡོད། དེ་འདྲའི་རྐྱེན་པས་རྒྱ་མིའི་དམག་མི་ཕོན་ཆེན་པོ་དེ་འདྲ་ཞིག་བོད་ནང་དབོར་འདྲེན་བྱེད་དགོས་ཆགས་ཡོད། ས་གནས་གང་སར་དྲག་པོའི་དམ་བསྒྲགས་ཤུགས་ཆེ་པོ་ཞིག་བྱེད་འདོད་མེད་ཀྱང་མ་བྱེད་རང་བྱེད་ཆགས་ཡོད། དེ་འདྲ་ཡིན་དུས་ཕྱི་རྒྱལ་གྱི་མི་བོད་ནང་ལྟ་སྐོར་ལ་འགྲོ་མཁན་ཚོ་གཏོང་གི་ཡོད་པ་མ་རེད། རེ་ཟུང་བཏང་བ་དེ་དག་ལ་དམ་བསྒྲགས་ཞེ་དྲག་བྱེད་དགོས་ཆགས་ཡོད། དེ་བཞིན་ཚུར་ཕྱོགས་འདིར་གཞུང་འབྲེལ་གྱི་ཚགས་ཤོག་ཁག་གི་ནང་ག་ཚད་ཐུབ་ཐུབ་ཀྱིས་སྐྱོན་འཛུགས་བྱས་ཏེ་རང་སྐྱོན་འགེབས་ཐབས་བྱེད་ཀྱི་ཡོད་ཀྱང་ཉི་ཤར་སྦར་མོས་མི་ཁེབས་ཟེར་བ་ལྟ་བུ་རེད། རྩ་བ་ནས་ཡོང་རྒྱུ་མི་འདུག་ལ་བདེན་པ་ཞེས་པ་དེ་འགེབས་ཐུབ་རྒྱུ་ཁག་པོ་རེད། ཅེས་སོགས་ཀྱི་བཀའ་སློབ་ཟབ་ཅིང་རྒྱས་པ་ཕེབས་ཡོད།
ཡང་དེ་མིན་༸གོང་ས་མཆོག་ནས་བོད་མི་རྣམས་ཀྱིས་དེང་དུས་ཀྱི་ཤེས་ཡོན་ལ་སྦྱང་བརྩོན་དང་ལྷག་པར་དུ་རིགས་གཅིག་རྐང་འཛིན་དང་ཚན་རིག་བཅས་ལ་སློབ་སྦྱོང་བྱེད་རྒྱུའི་ཐོག་དམིགས་བསལ་བཀའ་སློབ་ལམ་སྟོན་ཕེབས་དོན། ཚང་མས་སྔར་བཞིན་སེམས་ཤུགས་སྐྱེས་ནས་ང་ཚོས་བདེན་པ་བདེན་ཐོག་དུ་འཁྱོལ་བའི་བྱེད་ཐབས་དེ་གང་རེད་དམ་ཞེ་ན། ང་ཚོས་འཚེ་བ་མེད་པའི་ལམ་ལ་བརྟེན་ནས་བདེན་པ་བདེན་ཐོག་ཏུ་འཁྱོལ་བ་བྱེད་རྒྱུ་དེ་ནི་ང་ཚོའི་སྟོབས་ཤུགས་ཡིན། བདེན་པ་མེད་ན་འཚེ་བ་མེད་པ་བྱེད་ཐུབ་རྒྱུ་ཡོད་པ་མ་རེད། གོ་མཚོན་ཐོགས་ཏེ་དྲག་གནོན་བྱེད་རྒྱུ་མ་གཏོགས་མེད་པ་རེད། ང་ཚོར་བདེན་པ་ཡོད་པ་ཡིན་དུས། རྒྱག་རེས་དང་འཁྲུག་རྩོད་རྒྱག་དགོས་མ་རེད། བདེན་དོན་རྒྱུ་མཚན་དྲངས་ནས་བཤད་རྒྱུ་ཡོད་པ་ཞིག་རེད། དེ་འདྲ་ཡིན་དུས་བདེན་པ་ང་ཚོར་ཡོད་པ་ཡིན་ཙང་བདེན་པའི་སྟོབས་ཤུགས་བེད་སྤྱོད་བྱས་ནས་འཚེ་བ་མེད་པའི་ལམ་དུ་འགྲོ་རྒྱུ་དེ་ཧ་ཅང་གི་གལ་ཆེན་པོ་ཡིན། རྒྱ་ཆེའི་མི་མང་དང་མདོར་ན་གཞོན་ནུའི་སྒྲིག་འཛུགས་དང་བཅས་པས་འཚེ་བ་མེད་པའི་ལྟ་སྤྱོད་ཐོག་ལ་ཚང་མས་བསྐྱོད་དེ་མདོ་དོན་སྙིང་པོ་ང་ཚོ་ཚང་མ་འཚེ་བ་མེད་པའི་ལམ་ལ་འགྲོ་རྒྱུ་དེ་དང་བདེན་པ་བདེན་ཐོག་ཏུ་འཁྱོལ་བར་བྱ་རྒྱུ་དེ་ལ་གལ་ཆེ་ཤོས་ཤིག་ནི་ཤེས་ཡོན་ཡིན། བདེན་པ་བདེན་ཐོག་ཏུ་འཁྱོལ་བ་ཞེས་པ་དེ་མུར་མཛོག་བསྒོང་ནས་བྱེད་རྒྱུ་ཞིག་མ་རེད། ཤེས་ཡོན་ཐོག་ནས་འགྲོ་དགོས་རྒྱུ་ཞིག་རེད། དེ་འདྲ་ཡིན་དུས་ང་ཚོ་བཙན་བྱོལ་དུ་ཡོད་མཁན་ཚོ་ཡིན་ནའང་དང་པོ་ཉིད་ནས་ང་ཚོས་ཤེས་ཡོན་དེ་གལ་ཆེན་པོ་ཞིག་ཏུ་བརྩིས་པ་རེད། ད་དུང་ཡིན་ནའང་སྔ་རྗེས་སུ་བརྗོད་ཡོད་པ་ནང་བཞིན། ཁྱེད་ཚོ་འདི་ཕྱོགས་སུ་ཡོད་པ་ཚོར་ཡོན་ཏན་སློབ་སྦྱོང་བྱེད་རྒྱུའི་གོ་སྐབས་ཡོད་མཁན་ཚོས་ཡོན་ཏན་ལ་དང་དོད་བྱེད་དགོས་པ་ལས། ཁ་གཡེང་མིག་གཡེང་དང་འཕྲལ་སེལ་སྣང་བ་སྐྱིད་པོའི་སྤྲང་འཁྱམ་རྒྱག་རྒྱུ་དེ་འདྲ་མ་བྱས་པར། ཡོན་ཏན་སྦྱོང་རྒྱུར་དོ་སྣང་བྱེད་དགོས་ལ་དེ་ཡང་མཐོ་རིམ་སློབ་སྦྱོང་ཐོན་ཙམ་དང་ལག་འཁྱེད་ཡོད་པ་ཙམ་མ་ཡིན་པར་དངོས་གནས་རིགས་གཅིག་རྐང་འཛིན་བྱས་ཏེ་ཕྱིན་ཆད་ལས་རིགས་ག་རེའི་ནང་ཡིན་ཡང་སོ་སོས་རང་རྐྱང་ཕེར་བ་ཞིག་བྱེད་ཐུབ་རྒྱུའི་བསམ་བློ་བཏང་སྟེ་སློབ་སྦྱོང་གཏིང་ཟབ་སྦྱོང་དགོས་རྒྱུ་དེ་གལ་ཆེན་པོ་ཞེ་དྲག་ཡིན།
