༢༠༠༩ ཕྱི་ཟླ་ ༥ ཚེས་ ༢ རེས་གཟའ་སྤེན་པ།
༄༅། །ལྷ་སའི་ནུབ་ཕྱོགས་སུ་གནས་པའི་ནག་ཆུ་ཞབས་བརྟན་དགོན་པའི་དགེ་འདུན་པ་གསུམ་ ༢༠༠༩ ཕྱི་ཟླ་ ༤ ཚེས་ ༡༡ ཉིན་རྒྱ་ནག་གཞུང་གི་སྤྱི་བདེ་ཉེན་རྟོག་པས་ནག་ཆུ་ཞབས་དགོན་འགྲོ་འདྲེན་བདེ་སྐྱིད་གླིང་གི་མཁན་ཟུར་རིན་པོ་ཆེ་རྒན་ཐུབ་བསྟན་ཐབས་མཁས་ལགས་དང་། མཚན་གྲྭ་བཤད་སྒྲུབ་དགེ་མཚན་ཀུན་འཕེལ་གླིང་གི་བརྩིས་བཞག་དགེ་བཤེས་ཚུལ་ཁྲིམས་རྒྱལ་མཚན་ལགས་རྣམ་གཉིས་སྔ་ལོར་དགེ་བཤེས་ཀྱི་རྒྱུགས་འབུལ་ཟིན་པའི་མཚན་རྟགས་བཞེས་པར་ལྷ་སར་ཕེབས་དགོས་ཞེས་མགོ་སྐོར་བཏང་ནས་སྣུམ་འཁོར་ནང་བླུགས་ཏེ་ལྷ་སར་འགྲོ་བའི་ལམ་བར་ནས་ནག་ཆུ་ཀོ་ལུག་ཅེས་པའི་ས་ཁུལ་དུ་ཁྲིད་པ་དང་། ས་ཁུལ་དེ་ནས་ཕྱིར་ལོག་བརྒྱབ་སྟེ་རྒྱུ་མཚན་གང་ཡང་མེད་པར་ཐད་ཀར་ནག་ཆུར་བཙོན་འཇུག་བྱས་འདུག
མཁན་ཟུར་རིན་པོ་ཆེ་རྒན་ཐུབ་བསྟན་ཐབས་མཁས་ལགས། དགུང་གྲངས། ༤༧
དེ་བཞིན་མང་གཙོ་བདག་གཉེར་ལས་བྱེད་རྒན་བརྩོན་འགྲུས་ལགས་ཀྱང་རང་ཤག་ནས་རྒྱ་གཞུང་སྤྱི་བདེ་ཉེན་རྟོག་པས་མགོ་སྐོར་བཏང་སྟེ་འཛིན་བཟུང་གིས་བཙོན་ཁང་དེར་བཙོན་འཇུག་བྱས་པའི་གནས་ཚུལ་ཐོན་འདུག ཁོང་རྣམ་པ་བཙོན་འཇུག་བྱས་ཏེ་ཉིན་གྲངས་ཉི་ཤུ་ལྷག་སོང་ནའང་འཛིན་བཟུང་བྱེད་དགོས་པའི་རྒྱུ་མཚན་གང་ཡིན་རྒྱ་གཞུང་སྤྱི་བདེ་ཉེན་རྟོག་པས་གསལ་བསྒྲགས་གང་ཡང་བྱས་མེད་པའི་གནས་བསྡུས་སུ།།
དམངས་གཙོ་བདག་གཉེར་རྒན་བརྩོན་འགྲུས་ལགས། དགུང་གྲངས། ༣༤
བརྩིས་བཞག་དགེ་བཤེས་རྒན་ཚུལ་ཁྲིམས་རྒྱལ་མཚན་ལགས། དགུང་གྲངས། ༣༠
