༢༠༡༣ ཟླ་ ༢ ཚེས་ ༢༨ རེས་གཟའ་ཕུར་བུ།
༄༅། །རྒྱ་གཞུང་གིས་རང་ལུས་མེར་སྲེག་གོ་སྒྲིག་དང་བརྒྱུད་སྐུལ་བྱེད་མཁན་གྱི་ཉེས་མིང་འོག་བོད་མི་ལྔ་འཛིན་བཟུང་བྱས་འདུག
དེ་ཡང་ཕྱི་ལོ་ ༢༠༡༣ ཟླ་ ༢ ཚེས་ ༢༧ ཉིན་རྒྱ་གཞུང་གི་ཤིན་ཧྭ་གསར་ཁང་གིས་གནས་ཚུལ་སྤེལ་གསལ་ལྟར་ན། ཀན་སུའུ་ཉེན་རྟོག་པས་ཏཱ་ལའི་རུ་ཚོགས་དང་འབྲེལ་བ་བྱས་ཏེ་རྩ་འཛུགས་དང་བྱུས་འགོད། བརྒྱུད་སྐུལ་ལ་བརྟེན་ནས། བོད་མི་ ༣ གྱིས་རང་ལུས་མེར་བཏང་ཡོད་པའི་ཉེས་མིང་འོག དར་རྒྱས་ལགས་དང་བསམ་གཏན་ལགས། བཀྲ་ཤིས་རྒྱ་མཚོ་ལགས། བསྟན་པའི་རྒྱལ་པོ་ལགས། བསྟན་བཟང་ལགས་བཅས་མི་ ༥ འཛིན་བཟུང་ཐོག་ཁྲིམས་གཅོད་བྱ་འཆར་ཡོད་པ་བསྒྲགས་འདུག
རྒྱ་གཞུང་གིས་འཛིན་བཟུང་བྱས་པའི་བོད་མི་དེ་ཚོར། ལོ་སྔོན་མའི་ཕྱི་ཟླ་ ༡༠ ཚེས་ ༢༣ ཉིན་བླ་བྲང་བསང་ཆུ་རྫོང་གི་དྲག་ཆས་ཉེན་རྟོག་ཁང་གི་སྒོ་འགྲམ་དུ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་རྒྱལ་གཅེས་པ་རྡོ་རྗེ་རིན་ཆེན་ལགས་དང་། ཕྱི་ཟླ་ ༡༠ ཚེས་ ༢༦ ཉིན་བླ་བྲང་བསང་ཆུ་རྫོང་བསང་ཁོག་ཞང་སྲིད་གཞུང་རྙིང་པའི་རླངས་འཁོར་འབབ་ཚུགས་སུ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་རྒྱལ་གཅེས་པ་ཐུབ་དབང་སྐྱབས་ལགས། ཕྱི་ཟླ་ ༡༡ ཚེས་ ༡༠ ཉིན་བསང་ཆུ་རྫོང་ཀླུ་ཤོད་ཁུང་རུ་ཐང་ངམ་བཤད་སྒྲུབ་བསྟན་དར་གླིང་དགོན་པའི་ཉེ་འགྲམ་དུ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་རྒྱལ་གཅེས་པ་མགོན་པོ་ཚེ་རིང་བཅས་ལ་བརྒྱུད་སྐུལ་བྱེད་མཁན་ཡིན་པའི་ཉེས་འཛུགས་བྱས་ཡོད་འདུག
དེ་བཞིན་དར་རྒྱས་ལགས་དང་བསམ་གཏན་ལགས། བཀྲ་ཤིས་རྒྱ་མཚོ་ལགས་ཀྱིས་མེར་སྲེག་གཏོང་མཁན་རྒྱལ་གཅེས་པ་དེ་དག་གི་གནས་ཚུལ་དང་པར་རིགས་སོགས་ཕྱི་ཕྱོགས་སུ་མཁོ་སྤྲོད་བྱས་ཏེ། མི་རིགས་ཕན་ཚུན་བར་འཁོན་སེམས་བསླངས་ཡོད་ཚུལ་བཀོད་ཡོད་པ་མ་ཟད། རྒྱ་གཞུང་ཉེན་རྟོག་པས་བོད་མི་དེ་དག་གིས་རང་ལུས་མེར་སྲེག་གི་དོན་རྐྱེན་གོ་སྒྲིག་དང་བྱུས་འགོད། བརྒྱུད་སྐུལ། རང་ལུས་མེར་སྲེག་གཏོང་དགོས་པའི་སྐུལ་སློང་། མིའི་ཚེ་སྲོག་ལ་གནོད་འཚེ། སྤྱི་ཚོགས་ལ་གཏོར་བརླག་བཅས་བྱས་ཡོད་པ་དེ་ནི། བསམ་བཞིན་དུ་མི་གཞན་གྱི་ཚེ་སྲོག་འཕྲོག་པའི་ཚབས་ཆེའི་ཉེས་དོན་ཡིན་སྟབས། སྔར་ལས་ལྷག་པར་དམ་བསྒྲགས་ཞིབ་བཤེར་བྱས་ཐོག མི་མང་གི་ཚེ་སྲོག་འཕྲོག་པའི་ཉེས་ཁྲིམས་གཅོད་རྒྱུ་ཡིན་པ་བརྗོད་འདུག་པ་བཅས། །
